Party member a pawlcin theih nang thugen siam kisam

Party member a pawlcin theih nang thugen siam kisam

Thumasa!

Gam le Nam ah’ makai mikhat in adingto lutangpi ding pen tangzai mahmah ta ahih man athugen te siam leh pawl hau tektek a, Agen bang asep kei leh ki nusia kik ahihi. Mipawl khat pil mahmah hi napi Minam tuamtuam kingawm makai thei lo zong om a, autlo asem nuam lo mi zong kiom ahihi. Pilna tawh nasep thupi mahmah ta leh mitampi ading in mipi ki makaihna mun ah thugen a siamlote in nalian pi sem khin zotuanlo ahihi.

Thugen siamte lawhcin na!

Mitampi tawh nasem khawm thei Makai in adingthei leh alawh cing kici te mi tampi lak pan in Nasep nei Company nei veve mihau te in thugen siam leh avanbawlkhiat kilei in khawngzo zuakzo zaw a, Nasep zia ding ngaihsutna Planing pen agensiam leh Engineer te in ahoihzaw in suaito thei lailai ahihi. Sitni veve law tawh kituak bek hilo in aminam zui leh ngeina zui in thugen thukhen asiam te in thuzo a, buaina lian pi te thu neusak zo in buaina neute pan in thubuai te lemsiam thei uh hi. Tua man in eilam party ah mi a tamtheih nading in thugen siamna kisam ahihi.

Party pawlmi ding izonciang in.

Ei lam party ah mi a tamtheih nading pawlzong in ikuan khiatciang in ahih keileh taangmi palai ding isawl khiat te in mipi mai ah’ khuk ling polpol, Aw lingdoldol, leh aw hut gin thei te in thu genleh kua mah in muanglo thu kingailo ding ahihi. Awte siangtak leh mipite haksat na masuan leh ngaitsut na akihong sak atha ngah huaitak in agen siam te in pawl hau thungai kitam ahihi. Mipi mai ah thugen te kigin khol gige kul a, thugen manteh atelloh uh mipi ten hong dot kik leh atelna ding in Gam leh Nam khantohna akicing tak in gen pih kik siamte in pawl nei lawm nei ahihi.

Thu hong ngaite alungsim nasak loding!

Gam leh Nam makai dingte pen Biakna khat, Pawlpi khat makai tawh tehtheih loh ahihi. Biakna khat pawlpi khat makai te in nam khat bek nasep na makaih hi uh a, Gam leh Nam makai leuleu te in Minam kim avom akaang, Biakna namkim khempeuh ii lutang pi khat ding ahih man in Minam kidei dan na leh Biakna kideidan na tawh thu agen khate pawl hau lo a, gal hau thei hi. Tua ahih man in mipi mai ah party ading thu igen ciang in midang party member te zong thu hong ngai ding ahihi.

Tua hun ciang in thugen isiam leh midang party ah vote khiat asawmsawm mikhat ei lam ah hong kihei thei a, amah in alawm dingte tampi nazon sak siam lailai thei hi. Tua ahih man party pawlmi vote izon ciang in minam kim biakna kim leh Vote nakuang lui nading mun huam sung om mite alung kim theihtheih na gam leh nam khantoh theihna gen siam na in mipi thungai te lungsim nuam sak tha lawp sak eilam ah mapan na neihi.

Gentehna hoih tawh genteh ding!

Zogam sung ah haksatna adiak in Lampi te, Siamsin na sangte, Zatote Gam leh Nam makai te in panlak ding mipi tawh puah ding zun ding abulpi ahihi. Thungai mipi te adamloh hunciang in zato zuatna gamla in haksa hi. Siamsin Sang naupang te Sangpai bek zong lampi hoihlo khe tawh kipai hi. Lokho leh Gankhawi te zong tudong nasep kikhel nailo ahihi.

Tua man in party pawlmi izongciang in akhangto gam Japan, Singapore, Australia , USA cih bang leh Taiwan cihbang te nasepna Technology, Electonic nasepna, Lokhawh nasep nate Siamsin naupangte ki pattahna School bus zat te leh Damlo Zato lumte kikep ziate kikhoi zia te tuhun tawh kituak in Projector pua in mipite khuanu khuapa te leh naupang khualzin nailo te muh ding i paipai na ah lak ding ihihi.

Tuabang in gam khangto te nalah ciang in ikhantoh nailoh na kitel thei ding uh hi. Tua ciang ei party in gam leh nam makai leng hibang mah in nasep kisawm a, gampua akhangto mipil mihau tawh nasep ding in kigel ahihi cih gen beh to ciang in thungai hongpai te in igenteh hoihna te naciam teh ding uh a, kiteel mahsiahsiah apaipai ah alawmte tung nagen sawn sak ding hi.

Mipi thungai te ciimsaklo ding!

Party pawlmi zon na ah thugenna bekbek akigen kiza khak teh gamthu kiuk kim nailo ahih man in mipi ten hong ciimtak thei ding ahihi. Tua hunciang mipi ciimloh nading in lasa siam leh lamsiam te khat leh nih tonpih kisam hi. Lasaksa ding ciang in Biakna la ahilo gam itna la, Lengtong Pauno late, Thawn Kham late, Pu Vum Nang sak late asa siamte ton pih huai ahihi. Music khumsa in pua ziau in hong kiaukiau ding ahihi. Hih late pen Khangthak te uknam la ahihi. Puteek piteek te uk theih ding in Khuang leh Sialki tawh kituah ZOLA sit mahmah ahi Gentehna: Nang na om a, kei mipi tangtuam cih late mipi te dingsak in khatveinih vei sakpih le cin mipi te ciimlo tuam in nathugen na gam leh nam khantohna nailang bang kizom in gen lai le cin thuliim tak in hong ngai sansan ding uh hihi.

Party dangte a hoihlohna genkei in!

Ei lam party ah pawlmi tam theithei kideihman in party dangte hoihlo cih thu gen het kei in. Tuadan a, thugen aom leh mipi lam pan in dotna akhauh mahmah thu hong kidong thei hi. Ahih kei leh voice record in munkhat peuh ah na thugen kikhak sim sawn thei ding a, Party dang gensia na hih tung tawn mite in hong muang nawnlo ding ahihi.

Mipi mai ah’ na AW khan zel khiamzel kisam thei!

Zogam khuata te ah tuhun ciang pawlpi kim phial in awging pauna kinei kim ta hi. Napai paina mun ah nakizop pih party te in awging pauna set puakpuak akulloh nading in vaikhak khol huai ahihi. Eiparty ah vote hongpia loding mikhat in zong alupna pan in thu nangai khinkhia ding ahihi. Mipi maiah thugen na naneih ciang in gam leh nam vai thupi tak in igen laitak mipi te daitak in om a, amit te uh amaite uh ei lam hong en hongnga hun ‘ thugen te maitang hong et zihziah hun laitak in party kalsuan leh gimna thu mui buntak in genziahziah inla na aw ging sak deuh in.

Ahih zong thungai te lak ah party dang te hong kihel in ngamlum hehuu anunglam om te ciam nuih kawng bawl ciakciak cih aom leh Na thugen zia na aw te khiam kik in la amai a tu teng tel mialmial in thusim kigen bang in gen le cin anung lam a, tawtaa lulee teng in bang ahia? agen uh cih theinuam ding ahih man in amau thuthu hong dai leuleu ding ahihi. Tua man in thugen hun laitak aw khan leh aw khiap ziapen mipi thungai te dinmun et cik khawmkawm kisam thei ahihi.

Thukhupna!

Hih thugen zia party pawlmi ngah zia pen agen dingte hawm thawh na hilo ahihi. Agensiam mitampi omkhin zo ahih hang in agen nailo agen ding akisin omding khangno te in theih huai sa ka hih man in Eidan tawh kituak kisam kasa kahih man in konggelh khiat ahihi. Khuanu Khuapa mai ah thugensiam te mah Ulian mipil teng ituah khopna Lotdaw mun ah zong gensiam pah ahih man in mipi hamphat na ding tampi akisam thu vasungto thei ahihi. Genkhialh gelh khial aom leh kingai dam ni. Lungdam Pasian thupha!

Hau Thang