Banghang in innkuan sung ki lemlo ihhiam? ~ Deih Tung

Banghang in innkuan sung ki lemlo ihhiam? ~ Deih Tung

Ka neulai thu in ka mangngilh theih loh thu khat om hi. Inn kuan khat ah unau pasal 3 bang om uh hi. A u pen in zi hong nei a, a zi leh a nu ki lem lo a, inn tuan ding bek bek hong ngaih sun uh in inn hong tuan uh hi. Inn a tuan ding uh ciang in unau sanggam te in bi ki bot pih a, bukta no khat ki lam sak hi. A hizong in thu a ngaih sun thei zaw deuh te in tua nupa te inn tuan ding deihsak lo uh a hih man in a innlam uh huh lo in a ki lem kik na ding uh ci in Pawlpi sia te, beh leng phung makai te cih dan in va pai uh a, va lem tuah uh hi.

A hizong in va lem tuah zo lo mawk uh a hih manin inn tuan veve uh hi. A U pen in inn a tuan khit teh a nihna pa in zi hong nei leuleu a, tua dan mah a hi hi. A zi in inntuan ding bek bek mah ngaih sun leuleu a, inn hong tuan sawm leuleu uh hi. A sanggam teng, pawlpi sia teng in vakho in na nu leh na pa vak ding om lo ding hi tua dan in inn tuan gun kei un ci in a va leptuah uh hang in lem zo lo uh a, inn tuan veve uh hi.

A nau neu pen uh lah anu leh a pa in akhuanung neih uh a hih man in nau pang lai in thu thei nai lo a, a nu leh pa pen a teek khit uh hang in na nak pi in asep uh kul hi. Banghang hiam cih leh sem kei mawk leh uh annek ding om loding a hih manin a sem uh a hi hi. Banghang in U zaw in innluah ding kim lai inn tuan mawk ih hi hiam?

A dang khat ka theih khat om leuleu hi. Hih te inn kuan zong pen unau nih a pha uh hi a, anu leh a pa un a tapa neu pen uh inn luah sak nuam in a tapa neu pen bek it bawl uh hi. A upen in zi a neih lai in zong sa go lo uh a, zi a neih khit tak teh inn a tuan na ding in atapa upen kiang ah gen uh a hih man in a tapa upen zong inn hong tuan hi. Tua zawh a sawt lo in a tapa neu pen pa zong zi hong nei in nu leh pa te lam et na hongsuak hi. Zi a neih ma in anu leh a pa tawh kam ki sel ngei lo a, kua mah tawh ki tawngngei lo hi.

Midik mah mah khat hi a, nungak te ngaih mah mah khat zong a hihi. Zi hong neih khittak teh a zi leh anu ki lem lo in innsung buaina hong om hi. A om na inn uh pen lui lua ta a, a inn uh hong lam thak uh hi. An huan buuk a tuam in lam deuh se uh a, inn pi zong nei uh hi. Inn lam a zawh siang uh ciang a pa uh pen nak nuam mah mah hi. Ka khan sung in hih bang innhoih ah om zo ngei kei ning ci a, ka pa tauhtauh tu in a om zo ding ka hi ta ve maw ci in a inn uh pen en en in lung kim mahmah hi.

A hi zong in nitak khat a inn uh a zawh siang ni uh a tapa in a pa kiang ah “Pa aw no ka nu tawh innpi sung ah lum nuam zaw maw? An huan buk sung ah lum nuam zaw maw? Nadeih pen tel in” ci in a pa kiang ah a inn uh lang khen pih mawk hi. A tapa in innsung khat ah om khop ding ut lo hi cih a pa in tel theih a hih man in “ Ka ta aw, bang hang in inn khat sung ah om na ding hong tel sak na hi hiam?

Hih inn sung ah om khawm na pi tuam om ding a ut na hih leh kei om zo kei ning, Ko tawh om ding ut lo na hih leh ko mun dang ah ka ki tuah uh kul mai lo dia, ka tute ngai ngel ding ka hi ve maw” ci in a pa kap sa in pai khia hi. Tua dan in a pai khiat khit teh beh makai te pawlpi sia te in a nu leh a pa pen tua dan in hawl khiat ki lawm lo hi sam kik in ci in a gen pih uh hang in sam kik nawn lo hi.Nu leh pa a vak ding kim lai nu leh pa tawh bang hang in ki lem lo in nu leh pa a teek nung in hawl khia mawk ih hi hiam?

Banghang in innkuan sung ah ki lem loh na om mawk hiam? Ih piang ma in ih nu leh ih pa pen a ki it mah mah, aki ngai mah mah nu pa a hi uh hi. Ih piang khiat na ding in nau paai ta hi cih a ki theih tak teh ih nu te pen vang nei ki sa in mi mawk mawk hi nawn keng ei kei zong ta nei ding hi ta ci in kua ma dot loh pi in a nau neih lam mi lak ah a ki sial kawi kawi ih nu te a hihi. Ih suah khiat khit teh ih nu te in ih meel hong en uh a, a lung uh kim in a ci uh dam zo tang hial a, a gim na te uh phawk kha lo uh hi. Sun in ih pa te lokho in a gim mah mah uh hang in zan tha pai in hong tawi zo lai uh a, hong awi awi zo lai uh hi.

Bang hang hiam cih leh nang lehkei pen ih neu lai in ih nu te in hong nak it lua mah mah uh hi. Ih meel a hoih kei phial zong in hoih si e hong ci den ih nu leh ih pa bek mah a hihi. Ih hai mahmah zong in pil si e hong ci ci ih nu leh ih pa bek mah a hihi. Ih khel a, ih kap den zong in ki zen si e hong ci ci pen ih nu leh ih pa bek mah a hihi. Ih ek hong siatsak in ih ihmut kal na ngawn hong en cik den ih nu leh ih pa a hihi. Mi te in puan thak a neih ciang ih eng ding utlo uh a, sum leh paai nei lo pi pi mah ei ading in hong lei sak ten tan ih nu leh ih pa bek a hihi.

Sang ih kah na ah ih hai pen zong in pil hongsa veve ih nu leh ih pa a hi hi. Mi te lak ah puan hoih lo pen ih silh ding hong deih lo uh hi. Nitak khawng ih vak ciang inn ihtun dong hong ngak in a na ih mu lo ih nu leh ih pa a hihi. Khua sung ah bang a ci diam? A vak na ah bang a tuak diam ci in a om na mun pan in thu hong na nget sak den zong ih nu leh ih pa bek mah a hi ding hi. Ih pawl pi sia te, ih beh makai te hi masa lo ding a, ih nu ih pa mah a hi masa hi. Zi ih neih masiah siah pen inn kuang sung ah buai na om ngei lo hi ta se mah leh zi ih neih khit teh bang hang in inn kuansung ah buai na piang gun hiam?

Zi neih ma a, nu leh pa tawh a ki tawng ngei lo khat zi a neih tak teh nu leh pa tawh a ki tot tot leh bel ….a zi hang a hihi.Teek leh mo bang hang in ki lem lo ih hiam? Teek te in zong ih mo te nasep ding, an huan khat huan ding na san en cik in muang lo cih dan pan in zong hong ki pan ding hi. Teek te in zong mo te saisai luat ding hi lo a, a hi thei mah ding hi cih lam in ki lak siam hong kul ding hi. Mo te in zong pen teek te pen nu leh pa mah ci a, aw khum tawh hopih siam a, leitung thupha dawh siam ding a hihi.

Mo hoih te in a innkuan sung cidam na hi a, inn kuan sung ah ki tot na ki sel na veng hi. A lawmpa pah tawi siam in nu leh pa thupha dawh siam a hih man in a teek te in zong it a, suan len khak pung in ci dam uh hi. Nu leh pa te in ta 10 a nei uh zong in vak zo mahmah lel uh hi ta mah leh ta 10 in nu leh pa vak kik zo lo mawk hi hang. Hih thu pen khang thak Zomi sung ah ngaih sut taak leh ki puah phat huai thu ka sa hi. Teek leh mo ki lem lo cih om nawn kei hen a, teek te tung a thu pha dawh siam mo te a khan sau in suan leh khak pung uh hen. Teek te in zong mo hoih a neih man in atapa tung leh a mo nu tung ah lung dam uh hen a, Topa hoih na hang hi ci in Topa hoih na phat ta uh hen. * Khialh na a om leh hong mai sak un. Lunggulhna, tupna kician nei a, a hanciam mi ading in hih leitungah a piang zolo ding a om kei hi. Deih Tung