Bang na kengsak a? ~ Hau Za Cin

Bang na kengsak a? ~ Hau Za Cin

Ahih kei leh, bang na pia a? Bang tawh na kha khia a? Bang na tawisak a? Bang tawh na pattah a? Lawmte khat in hong gen na ah, “Mopawi ka simna khat ah inntek te in a tanu khakna thu gen a, a manawh lamte kiangah hibangin vaikhak hi. “Ka tanu uh pen inn ah na’ zong ka sepsak ngeiloh uh hi. Na zong sem theilo hi. Laikung laidal bek tawi thei hi. Tua manin na’ na semsak kei un. Na dawm mahmah un…” ci hi,” ci hi! Takpi maw ka cih leh, takpi mah hi, ci hi. Ka manglam hizaw leh ut sing e, ciin nui kawmin ka kikhen uh hi. A manawh lamte in ‘koh, ka mo deih dan uh hih namte hi’ cih bang genlo ahi tam maw.

Inn ah lengla hong hawh ciang bangci na vaidawn a? “Hong hawh maw?” ci ziau maw, ahih kei leh “No hong hawh lungdam si e” ci zaw maw. A ciah uh ciang, “Na mangpha un” ci ding maw, “Mangpha hoihtak na man un” ci zaw ding. “Hong hawh maw” cih ciang deihpha mello a dotna tawh kibang dektak bang hi.

A tualam a kawk lian loh hang. “Na mangpha un” cih zong tuni a nong hawh uh a tawpna hita hen, tuni pan mangpha na manta un, hong hawh nawn kei un cihna tawh kibang dektak hi; tua cihna lam ahih loh hang. Ka tanu uh huih mut ding zong ka phalloh uh, aktui dop a ka dop uh hi, cih ciang ka it mahmah uh hi cihnopna lam sang koh it cihtak ka it uh hi in koh kep koh khoi bangin khoi thei kei nuteh ci-a kisialna, kiphatsak kampau tawh kibang dektak hi; tua cihna ahihpah lianloh hangin.

Na’ zong a sem ngeilo hi cih ciang bel ko nasep na kisinsak ta nung ei cih tawh dawnkik dinga pha hi; dawnkik a kul tuanloh hang. Nasep na kisinsak ngap mahmah lel ung ei, na patau kei un, ko inn pan nasep tampi sin mahmah inteh cih dinga pha hi; cih a kul tuanloh hangin. Noh zong mo nasem theilo na kisap uh leh hong zonpih thei nung ei na patau kei un ci-a dawn pah dinga pha hi; dawnpah a kul tuanloh hangin… he he he…

Papi khat in a tapa khua lamah a gina phalo pen khuapi a a sanggamte kiangah koih nuam, va tonpih, “Ka tapa pen inn ah a om ciang laisim nuamlo, vakvak, mi van khawng gugu in noh kiangah hong koih leng hoihtak in na kepsak le uh cin a ci hiveng aw” va ci daidai hi. “Nang a pa kiangah zong hoihtak omlo pen koh zong bang tuazahpi in kong buaipih ding uh kisam amaw?” cih dinga pha ahi; cihpah a kul tuanloh hangin. Ka tanu uh zu dawndawn in noh kiangah om leh zu a ngawl theih khak leh ci hiveng aw…. aw, koh zong nang tanu zu ngawl theihna ding nang na kin kei leh kong kinpih uh kisamlua amaw?” cih kik dinga pha hi; cihpah a kul tuanloh hang.

Christian a suak masa innkuan pan khangkhia khat in, “Ka vakna inn pawlkhat ah i Topa Jesu lim lianpipi nei napi uh hoihtak kisuanglo, kilawm tak, zahtak takin kisuanglo; tutphah nuai khawng ah kia, laibu kawm khawngah kiphah neunau, zuak tung khawngah sawi deda in kikhai lenglong; i biak Pasian zahtaklohna tawh kibang sa ing. Suang nuam i hih leh hoihtak suang sitset ding, suang nuamlo i hih lelah suanglo vet ding, tua hileh hoihsa ing. I biak Pasian thupi simlohna tawh kibangsa ing,” hong ci ngeungau hi. Sawtpi, tampivei tak a ngaihsut ciang a lungsim ah diksalo, hoihsalo in hong genkhia hiding cih ka ngaihsut ciang ‘hi’ ka sakpih mahmah hi.

I Topa bang i kengsak a?

Thusimlohna maw. Zahtaklohna maw. Hih ningniangna maw. A lim bek hilel ciin a tak tawh kisai kei i ci maw. I Pasian in a lim i bawl dan theikhin ding ci leng, a tak i bawldan zong tua bang hi na ci ding hileh bangci’n i gamtat hong ngaihsutsak tam. Pha hi, hong ci diam. Aman zong ‘thusim kei ning’ hong ci diam? Topa lim leh mel bangtawh i tonkhawmsak a. Thupi takin i bawl hiam, thusimlo in i thaangkoih gawp hiam.

Mi inn ah na hawh ciang bangin na lungsim hong sukha pen a. Na ciah ciang inntekte in nang tungah bang thupha or impression hong ciahpihsak a. Bang hong kengsak a? Bang hamphatna tawh na ciahkhia a. Mangpha khakna tawh maw, tuibuk muamkhat tawh maw, ahih kei leh niangtui hai khat dawnna tawh maw? Mehteh mehgah tun khat maw, cikhum tun khat maw… I Topa Jesu in bel “go in peace” (Luke 7:50) ciin mawhnei numeinu na khakhia hi.

I hawh i ciahna khempeuh ah mi gamtat pan banghiam khat kikeng hi, kiciahpih hi. Nang gamtat pan mite in bang a ciahpih a? Nang mi gamtat pan bang na ciahpih a? Bang na kenga, nang kiang pan mi’n bang a keng a? Kiphatsakna maw. Hazatna maw. Itna maw. Piaknopna lungsim maw. Huhnopna lungsim maw. Huatna lungsim maw. Mi gensiatnopna lungsim maw. Na paina khempeuh pan banghiam khat na ciahpih hi, na keng hi – – – tua pen bang a hiam? Nang kiang pan zong mite in bang hiam khat a ciahpih uh hi, a copy uh hi, a keng uh hi – – – tua dingin bang hileh na deihpen a? Hau Za Cin (Phuitong Liim)