Bill Gates in khangnote a thuhilhna ~ Thang Khan Lian

Bill Gates in khangnote a thuhilhna ~ Thang Khan Lian

• Nungtak baih lo hi- tua hangin hanciam in.

• Leitung in nang hong khual lo ding hi. Leitung ah nopsakna na ngahna dingin bang hiam khatah lawhcing masa phot in.

• High School ah sangkah kawmin kum khatin $60,000 na lawh khia ngei kei ding hi. Car zong na neihna ding leh tua zah sum na neihna ding thalawh masak kul hi.

• Na siapa genhak na sak leh ama siapa na muh dong ngak phot in.

• Burger bawl-a kithalawh ding zumna in tuat kei in. Na pi leh pu ten tua banga nasemte hampha sa uh hi.

• Na lawhcin kei leh na nu leh pate hang hilo hi. Tua hangin phunphun ken la, na hihkhialnate panin sinin kibawlphat sawm in.

• Na pianma in na nu leh pate na cim (boring) man khol lo uh. Inn na lei khin zo, nek leh tak a lim nono hong pia zo, laisimna ding sum leh paii hong pia zo ahih manun nang ngaihsutna sangin na pilzaw uh hi. Na nu leh pate cin lohna na gen ma-in nang cin lohna kimu masa in.

• Na sangkahna ah mi lawhcing leh mi lawhsam na mu ding hi. A taktakin ci leng sangnaupangte adingin laisim lai zawh loh ding om lo hi. Na siate nangawnin na zawh teiteina dingin hong hanciampih ding uh hi. Ahi zongin leitung nuntakna tua tawh kibang lo hi.

• TV a na muhte a taktak hilo ahih lam mangngilh kei in. Leitung nuntakna ah mi ten coffee dawnin tutu man lo uh hi. Nasep ding zongin a muh uh ciangin tu man loin sem uh hi.

• Nang leh nang na kitheihcian kei leh midang ten hong buaipih man lo ding hi. Na hun neih sunsun manpha takin zang in.

• Mi tawh kikhawlkhawl khol loin amau bekbek a thungaihsunsunte simmawh ken. Na dam leh amau’ nuai-ah na nasem kha ding hi. Company na neih ma-in amau bangin thu ngaihsunsunmi na hih ding kisam masa hi.

Kibawlphat ding hanciamna a nei, hilh theih leh hilh ding lunggulhna a nei, tua bang mite mihampha ahi hi. Mihau Bill Gates’ tung panin na theih thute zangkhial ken. Topa in thupha hong pia ta hen.

(Rev. Dr. JM Ngul Khan Pau in LUNGDAMNA AW May 2015 issue ah kisuaksak “Kumpi Solomon leh Bill Gates’ Tung Panin” panin kong teisawn ahi hi).

Bill Gates leh Restaurant Waitress

Ni khat Bill Gates in restaurant ah va hawh hi. A nek ding leh a dawn ding teng a man khit ciangin restaurant nasemnu kiangah a nasepna thaman lungdamna lahna dingin sum (tips) $5 pia hi. Nasemnu mai hong khin demdam ahih manin Bill Gates in a maisuah thei ahih manin, “Bangci na hiam lawm aw? A kilawm loin hong ho khakna om hiam,” ci-in dong hi.

Nasemnu: “Hun khat lai-in na tutna sabuai (table) mah-ah na tanu hong tu ngei a, na tanu in tips dingin $500 hong pia hi,” ci-in dawng hi.

Bill Gates in nuihsan hieuhiau kawmin, “Amah pen leitunga mihau penpa’ tanu hi a, kei pen sing tanpa’ tapa ka hi lel hi,” ci-in dawng hi.

Haksa pi-in hih ciang dong na tunna leh cithei nuamsa in na om hun ciangin na hun beisa leh na khankhiatna mangngilh kha kei in. A beisa hun pen na SIA hoih pen ahi hi. Thang Khan Lian