Upna ii Zia le Tong pawlkhat ~ Rev. Fr. Damian Dal

Upna ii Zia le Tong pawlkhat ~ Rev. Fr. Damian Dal

Upna neihna dingin ki sikkikna kisam hi. Topa Jesu gupkhiatna thu hongtangko na ah, agenkhiat masak penpen thu in, “Namawhna uhpan ki sikkik un” (Mk 1: 14ff) cih ahihi. Nungzuipi te leh kamsangte in zong tua bangmah in na hilh uhhi (Sawltak 2: 38-42; 1Thess 1: 9f).

Upna in thungetna leh biakpiakna tawh picing semsem in, akhangcing semsem dinga hihi. Thungetna leh biakpiakna tawh akhangcing lo, anungta lo upna in, silah nungta singkung tawh kibang upna ahihi. Banghanghiam cihleh, alungsim ah Pasian om hi cih theihna khatbek omlai in, tua theihna bek nungta lai a, ahi zongin tua theihna in upna nuntakna piazo nawnlo in, akhang nawnlo, atehte a nosuakzo nawnlo singkungtawh kibang hi.

Upna in “kei”, “ka” cih te tungah gualzo in, “Ei”, “Ko” tawh honglaih sak ahih manin, upna in innkuankhat hongsuak sak hi. Tua thu hangin, Topa Jesu in “Vantunga om ka pa aw” ci in, honghilh lo a, “Vantunga om kote pa aw” (Mt 6: 9-13; Lk 11: 1-4) ci in, thunget zia ding leh upna nei mite kizopzia le nuntakzia ding honghilh ahihi.

Upna in theihtelna hongpia hi. Upna in Pasian deihna tawh kituak thuman thutak hongthei sak hi (cf. Phil 3: 10f). Pasian tungah upna liantawh zahtakna, Pasian i upna hangin ama deihlo nate tungah muhdah na leh, upna hanga hongpiangkhia Pasian kihtakna in pilna kipatna hi a, leitung pilna khempeuh te tungah agualzo pilna zong hi in, asia apha khentel theihna, thu hoih thupha hong thei tel sak hi (cf. Late 111:10; Paunak 1: 7; Paunak 9: 10; Mt 11: 27; Lk 10: 22).

Upna in lungmuanna ahihi. Pasian tungah upna nei i cih ciangin, sihna nuntakna Topa in len a, leitungah bangbang tuakin, bangbang kathuak zongin, Topa hehpihna, ama hongitna in eite tungpan paikhia ngeilo bektham lo in, leitungah ithuakna khempeuh tetungah thaman hongpia laiding hi cih, lungmuanna khamuan na ahihi.

Hebrew 11 na sungah hong kihilh thu in: thu ummi te in leitungah khualzin mi hi in, Topa hongciamsa thupha te tungah lungmuanna leh khamuanna tawh Pasian hongsap ni leh hundong khulzin mite ihihi. Topa hongciam thupha leh gamhluah za ahi, a Tapa Jesu sihna leh athawhkik na tungtawn in hongpiak thupha te, honggumpa hangin ngahding hi hang cih lungmuanna (cf. Heb 12: 1, 3) ahihi.

Upna in Pasian deihbanga nuntaknang vaipuak hongguan hi. Topa Jesu in honggen in ah: singkung pen agah tawh kithei hi (Mt 7: 20) na ci hi. Upna nei mi icih in anuntakzia tawh kithei ding ahihi. Upna nuntakna in itna gamtat na ahihi (Gal 5: 6; James 2: 21-24).

Upna in nuntak khuasak zia te hongmakaih ding ahihi. Laisiangtho ah Israel minam te nuntakzia te i etciang in, Pasian tungah a upna uh aki makaihsak na thu i muthei hi. Christian masa te in, a upna uh kima kaihsak in, a upna uh masuan in, tawphah in, minam sutpi, u le nau sutpi munah Jesu Topa koih uh ahih manin, simmawh bawlsiatna, thahna, Vumpi te an in kipia in, mei in kihinghal himah ta leh tuate khempeuh tungah Christian nuntak khuasak zia te nalak in, a upna uh amaute nuntak khuasak zia nasuak sak uhhi. Rev. Fr Damian Dal (Leuven, Belgium)