Kipuahna Cosmetic Products pawlkhat sungah gu kihel ci’n Warning kitangko

Kipuahna Cosmetic Products pawlkhat sungah gu kihel ci’n Warning kitangko

Malaysia gamsung ah akizuak numei te kipuahna Cosmetic te lakah gu “Poison” akihel pawlkhat om ahih manin, kuaman zangkei un ci’n Malaysia Health Ministry (MOH) te’n mipi te theihsakna nei uhhi. Tua Cosmetic Product sungah akihel Chemical pawlkhat pen ahuntungleh gu piangthei “Scheduled Poison” cih kimukhia hi.

MOH nuai aom “National Pharmaceutical Regulatory Agency (NPRA)” te genkhiatna ah tua Cosmetic Product te sungah Mercury, Hydroquinone, Tretinoin cihbang ahoihlo akihelkha om ahih manin zangkha hetkei un ci’n kidopding Warning piakna nei uhhi.

Tua ahoihlo Cosmetic Product tepen: Nuriz Shoppe – Uv Pearl Cream & Nuriz- D’solve (abawlkhia Progressive Mix Industries), Aura Gorgeous Night Cream (abawlkhia Aura Gorgeous Beauty & Healthy), NV Anti Blemish Toner 1 (abawlkhia Nouvelle Beauty Centre Sdn Bhd) cihte ahihi.

Nuriz Shoppe – Uv Pearl Cream, Nuriz- D’solve, Aura Gorgeous Night Cream cih kipuahna te sungah Mercury kihel hi.

NV Anti Blemish Toner 1 akici kipuahna sungah Hydroquinone leh Tretinoin akici ahoihlo kihel hi.

Cidamna lamsang thunei ahi Health Director-General Datuk Dr Noor Hisham Abdullah inzong tua gu apiangthei mainuh kipuahna “Cosmetic Product” tepen sapkina “Recall” bawlsak cih NST pan zanni in kiza hi.

Tua mainuh te sungah akihel Hydroquinone leh Tretinoin cihtepen “Registered pharmaceutical products” hi a, Drug Control Authorities te tungah matpongtin bawlkul hamtang hi. Tuaban ah cidamna lamsang atheician Health Professionals te ii makaihna bektawh akizangthei ahihi.

Tuabang Chemical hoihlo akihelkha mainuh kipuahna azangkhate pen amai anuhkhit ciangin avun sanding “turning red” cihi. Tuakhit ciangin omdan nopmawhsak in avun “Skin Tone” zong kilaihding cihi.

Adang Hydroquinone akihel Cosmetic Product azangkhate zong maivun leh mel kilaihsakthei a, alauhuai ahi UV Rays panin vunin adaltheihna kiamsak hi. Tuahang in Skin Cancer ki ngahbaihtuam theihi ci’n Health Director-General in genkhia hi.

Malaysia Health Ministry te’nzong vanzuak leh ahawmkhia “Retailers & Distributors” te kiangah atunga akigen, Warning akipia Cosmetic Product tepen zuaknawnloh, bawlnawnloh nadingin thu piakhinta uhhi.

Azuak teitei, ahawmkhia teitei aomleh “Control Of Drugs and Cosmetics Regulations 1984” thukhun tawh kizui in thu kibawlding hi. Tuabang in thukhun palsatte pen liausum RM25,000 bang ki liausak thei a, thongzong kum 3 bang ki kiasakthei hi. Liausum leh thongdaan zong anih in ki piathei hi.

More: Sengam ah atuh akibawltawm Cosmetic Brand minthang $171 million manneiding kiman ~ ZD

Abawlkhia Company te ahihleh liausum RM50,000 bang ki liausakthei hi.

Malaysia gamsung aom nungak leh (make-up akinuhsim khiankhian tangval pawlkhat) te aw, hih atung a, akigen Cosmetic Product tepen zat huailo cih ihki phawksak phapha hi. Sawltak #zomidaily