Armed Forces nuaia laisin theih dan

Armed Forces nuaia laisin theih dan

India galkap nam thum Army, Navy leh Navy ten officer dinga laisin ding mi la zel uh hi. Armed Forces nuaiah Course a tuam tuam kisin thei hi. Tua Course tuam tuam te pawlkhat hih a nuai a tea hi hi:

MBBS: Armed Forces Medical Collge, Pune a MBBS sin ding kum simin mi 130 kila hi. Pasal te adingin seat 105 hi in numei te adingin seat 25 ki koih hi. Hih muna lut theih nangin 10+2 (PCB) ah a niam pen 60% muh kuul hi. A apply a tam ciangin cin haksa zel cih bel phawk huai hi. Interview dinga kisam te kuan lam leh ciah lam train leh Bus fare kipiaksak hi. A ki teelcing ten a laisinna uh a zawh ciangun a tawm pen kum 5 sung sem dingin Born Sign masa uh hi. Army ah sem lo in mundangah a sep ua leh a laisinna man uh Rs. 20 lakhs ki liausak ding hi. Doctor te pen Captain pan in kipan pah uh hi.

B.Sc (Nursing): Armed Forces Medical College a nursing sin ding kumsimin mi tampi ki la hi. Hih course sin thei ding in 10+2(PCB) ah a tawm pen 50% muh kuul hi. A graduate ciangun Military Nursing Services ah sem uh a Leautenant pan kipan uh hi. Major General dongin zakhangto thei uh hi.

General Nursing &Midwifery: 10+2 Science(PCB) hoih taka passed te adingin hih course sin nang ngetna piak theih hi. A sin zawh ciangun Military Hospital ah Nurse sem uh hi. Pasal te adingin zong sin theih veve ahi hi.

B.E/T.Tech: Armed Forces College of Engineering, Pune a sin ding 10+2(PCM) a 70% mu pha ciangin ngetna piak theih hi. Navy te sponsor ding ahihleh 75% muh kuul lai hi.

Hih a tunga i gente a hun kuan ciang Employment News ah ki suaksak zel hi. A lunglut te adingin High School pana kiginkholh ding hoih hi. Interview pen New Delhi ah ki nei in a pai te Second Class train ticket kipia hi. Engineer lam tawh kisai pen Navy ah sep ding tampi om hi. Banghang hiam cih leh Navy pen a nasep dan uh sensang in pilna kitangsam phadiak hi. Helicopter Pilot ding bang tampi tak kitangsam den uh hi. Khasum lah hoih mah mah laideep hi.

India gamah galkap ding kisinsakna(training) mun tuam tuam om hi. Tuate pawlkhat gen mawk mawk leeng:
National Defence Academy(NDA): Army officer te kum thum(six Semester) sung aki sinna mun uh ahi hi. Hi mun pan a zawh ciangun amau omna ding mun tekah kipuak zel hi.

Sainik School: Central leh State Government pankhawmna tawh Sainik School ki din hi. Tu in Sainik School 24 bang pha ta hi. Sainik School a ki phuat na hang pen Pasalno te lungsim pumpi galkap officer dinga sinsakkholh nang ahi hi.

Rashtriya Military School: Tu ma lama Military School kici pen Rashtriya Military School ciin a min kikhek hi. Tu in India gamah mun nga ah om ta hi. Tua a omna mun te Ajmer, Bangalore, Belgaum, Dholpur leh Chail ahi hi. Pasalno Class VI te adingin Entrance Exam bawl zel uh hi. Hih pen CBSE ah ki affiliate ngiat hi. Seat Reservation pen 75% JCO leh OR te’ tate ading hi in adang 33% laka 20% pen a semlai galkap officer te’ tate ading ahi hi.

Rashtriya Indian Military College(RIMC): Hih pen March 20, 1922 a ki phuan ahi hi. Pasalno galkap officer a suak nuam te ngaihsutna a kidin ahi hi. State government in a lut dingte written leh interview neisak hi. RIMC pen NDA lut theih nanga kiginkholhna hi pipen mai.

Indian Military Academy(IMA): Kum 1932 a ki phuan hi in Dehradun ah om hi. India gama galkap officer ding kisinsakna hoih pen ahi hi. Gamdang officer ten zong hih munah a sin hun uh om thei zel hi.

Officer Training Academy(OTA): Short Service Commission Officer te training na munpi hi in Chennai ah om hi. Army Service Corps, A.E.C, Judge Advocate General Branch, Corps of Engineers, Signals, Electricals & Mechanical Engineering te sinna mun ahi hi.

College of Military Engineering(CME): Army, Navy leh Airforce a lut dingte’ Engineering sinna munpi hi in Pune ah om hi. Jawaharlal Nehru University nuaia affiliated ahi hi. B.Tech/M.Tech sinna hoih mah mah khat ahi hi. Hih muna sin dingte in 10+2(PCM) ah a tawm pen 70% marks muh kuul hi.

National Defence College(NDC): Kum sim in kaal 47 sung Civil leh Defence Officer te training na mun ahi hi. Gamdang officer ten zong hong zuan zel uh hi.

College of Defence Management(CDM): Hih pen Osmania University ah ki affiliate hi. Master of Management Studies(MMS) degree ki ngah thei hi. Galkap nam thum te management lam sinna munpi ahi hi.

Defence Services Staff College(DSSC): Hih pen India gama Military College upa pen pawl hi ding hi. Galkap nam thum officer te banah Civil lam officer te zong hih lai munah training zel uh hi.

Pau Tun Thang