Malaysia gamsung ah GST phiat kipanta, GST omlohsung vangil leihuai
Malaysia gamsung ah General Election panin gualzawhna angahthak Dr. Mahathir ii makaih Goverment in hongtungding June 01 ni akipan GST phiatmaiding (Zero Rate) ci’n a tangko khiatkhit uh ahihi. (Ataktak in Malaysia gam ii GST 6% cihpen adang gamte tawh tehkakna in atamlua hilo bilbel hi. UK gamsung bangah 20% tak hiliang hi. Photo: As of 2015)
Ahi zongin June 01 nidong kingak teta nawnlo in, Malaysia gamsung ah Business asem tampi te’n tu akipan vanlei ciangin aval in akipia 6% GST pen phiatmai kipanta uhhi.
GST aki phiatmaiding taktak pen ni 10 bang kisamlai himahleh vanzuak Retailers pawlkhatte’n GST 6% aitang khiap akipanta ahihi. Pawlkhat Retailers te’n 6% Discount ci’n khiam uh a, pawlkhat te’n atawmpen tuazahmah naleileh 6% GST hongki khiamding hi cihbangin Promotion tuamtuam bawlta uhhi.
Mihau sumnei te zatdiak ahi Luxury and lifestyle Retailer Valiram te’nzong Sales Campaign kipanta uhhi. International Brand minthang mahmah ahi Michael Kors, Bath & Body Works, Charles & Keith, Kate Spade New York, Tumi cihte nalei uhleh 6% GST pen Discount in hongki khiamding hi ci’n tangkokhia uhhi.
Computer, Laptop, Notebook tuamtuam azuakkhia ahi Harvey Norman Malaysia te’nzong 6% Discount kakhiam uhhi ci’n tangkokhia uhhi. Innsung vanzat Furniture tuamtuam azuak Courts Malaysia te’nzong tuabangmah in khiamta uhhi.
Marks and Spencer te’nzong atawmpen Rm150 man nalei uhleh 6% Discount hongki khiamding hi ci’n tangko uhhi. Sungmanpha azuak Habib Jewellers te’nzong 6% Discount kakhiam uh cihi. Nektheih mohtuamtuam abawlkhia Confectionery-maker Famous Amos Malaysia te’nzong June 01 nidong ngakkul seselo in, GST Zero Rate tawh kazuakta uhhi ci’n Facebook tungtawn in pulakkhia uhhi.
Thukhat ah GST aki phiatmaiding hangin, asawtlo in SST (Sales and Services Tax) akici phiangsiah namkhat hong pankikding uhhi. Ahi zongin tua SST avaihawm Council of Eminent Persons sungah akihel Tun Daim Zainuddin in nung Friday ni in agenkhiatna ah SST pen khanih, khathum bang ziakai laiding hi ci’n genkhia hi.
Malaysia gamsung mawtaw vaitawh kisai in kipawlna Malaysian Automotive Association (MAA) ah President asem Datuk Aishah Ahmad in agenna ah hongtungding khanih khathum sungpen GST omlo, SST zong kipan nailoding ahih manin, tuahun sungpen mawtaw kikhawng mahmah khading hi ci’n genkhia hi.
More: Kumpi Phiangsiah (Government Tax)
Tuamah bangin Zomi sungah vangil atamman aleisawm te’nzong hih GST aki phiatmai hunsung, SST akipatma in leihuai hi. GST 6% cihpen RM1000 ah RM60 anoptuam hipah hi. RM5000 man aleisawm khatin GST omloh laitak alei hileh RM300 anoptuam hipah hi. Nadeih bangbang uh nalei ziahziah un (asumding aom nakleh 🙂 Sawltak #zomidaily
Comment piaknop aomleh...