Kiteen kum tamsemsem ki ning semsem ~ Job Cinpi

Kiteen kum tamsemsem ki ning semsem ~ Job Cinpi

Kiten kum tam semsem ngaih mel hoih semsem cih ding hi napi nupa kaal sungah kiten kum tam semsem ki-ning semsem cih ding tawh a kibang nupa pawlkhat om thei uh hi. kiten ma ahi a, kiten khit a sawt nai lo hun lai-in khat le khat kikoih kilawn khak bek zong khuasik mul tho pah vangvang liang thei hi. Khut le khut a kizut kha bek nangawn zong ihmu thei lo liangin zan thapai-in kingaihsun hi.

Kiten kum hong tam semsem a, mel le sate, pumpi etlawmnate hong kikhel ciangin nupa kaal kizopna zong hong kikhel ta hi. Khat le khat khut kilet ding zong baih nawn lo hi. Khut kilen a kizut ding, khat le khat kilawn khak ding cih pen ei le ei a kilawng bang lel ta a, cithak khuat zahin zong a nop nawn loh hun, lunggulhna a om nawn loh hun om ta ding hi. Gen cim thei lo, zak cim thei lo cih hunte a bei hong bang ta ding hi.

Tua bang hun a tung phial zongin, innkuan sung nupa kaal sung a nop theih nadingin nupa tampite in tua bang hunte na nawk suak zo uh hi. Lungkiatna a om hangin lungnopna thalawpna tawh khek thei uh hi. Tua thusim bang a hiam?

Nidang bangin a pumpi a etlawm nawn loin, a meivunte vuai ta a, a etlawm mahmah a khut a khet iplah nading om nawn lo hi. Ahi zongin nasepna pan gim mahmahin inn ka ciah ciangin ka tawlngakna mun a nuam pen a phei tung ahi hi.

Nidang lai bangin a pumpi tungah a namtui tuamtuamte a nam nawn loh hangin ka nek dinga hong bawlsak meh gimnamte namtui sa-in ka nam den hi.

Itna thu kamkhumtakin hong gengen loh hangin, no nuta ading hong cih den pen ka lungkim mahmah hi.

Nidang bangin sep le bawl a zawh nawn loh hangin kei ka dam lai teng nek ding dawn ding kong lungkhamsak kei ding hi, cih kammal sangin ka lungmuan zawkna dang om tuan lo hi.

Khuamuhnate hoih nawn loin samzangte in thu gen ta mah leh aw ling keuhkeuh sa mahin, “U aw,” hong cihcih lai mah zaknop kasa pen hi.

Dam lo kisa-in kamvak bakin om napi sinkham kei in, na kiangah kei om den ing, hong cih mah ka lungmuanna hi pen hi.

A tute kem dingin zong tha nei nawn lo napi, kim le pam ah nungak tangvak kithuahte a muh ciangin, ei hun lai -in ci-in tu ma kum sawmnga val lai a thu pawlkhat tawh hong noh kik zel sangin ka lungsim a nosuahsak zaw om tuan lo hi.

Kining cih pen a omsa nam khat bekbek a zangte ahi uh hi. Thaksuaksak ding tampi om cih a phawkte in midangte muh nai loh nangawn tawh a nupa kaal kizopna uh thaksuaksak uh hi. Nupa kaal kizopna pen a thaksuak den ding hi a, lungsim thongkiatna ahi kei hi. Job Cinpi (Zomi Laisim Nuamte)