Thai pasal khatin akiteending ni 5 asapin alawmnu thautawh kaplum

Thai pasal khatin akiteending ni 5 asapin alawmnu thautawh kaplum

Thailand, Chumphon’s Tha Sae District sungah numeikhat mopawi abawlding ni 5 akisap laitak in thautawh kikaplum cih The Nation pan kiza hi. Tuanu minpen Nontiya Krowjatturat kici a, kum 25 aphakhin khat ahihi. Mopawi bawlding in abuai mahmah laitak, mopawi bawlding ni 5 bekbek in asamlai ahihi.

Tua kawmkal ah monuding pen lametlohpi in Wednesday zingsangin alupna tungah asisa in kimu hi. A awmsung tautawh kikap ahih manin, asisa in aluanghawm akimukhia ahihi.

Tua numeinu ii a innkuanpih tezong mopawi bawlding in akilimgin mahmah, akithawithawi uh hi a, ahi zongin monuding ahi atanu Wednesday zingsangin asisa in alupna ah na ommawk hi. A mopawiding pen Sunday ni hi a, aki teenpihding pen Ronnachai Panchart akici kum 26 aphakhin khat ahihi.

Tua numeinu lametloh laitak in thautawh akikaplup ciangin alawmpa pen ki muangmawhpah hi. Alawmpa pen numeidang khattawh aki thuahthuahlam azandiak in tua numeinu in theikha a, tuapan in buaina akipan hidinghi ci’n numeinu ii apa’n genkhia hi. Tua tungtawn in palik te’nzong alawmpa muangmawhpah uh a, kikanpah hi.

Police te’n alawmpa thusitna aneih uhciangin alawmpa ii athahlup nahitakpi mawk hi.

Tua numeinu Nontiya Krowjatturat ii Facebook tungah zanni ciangciang mopawi Pre-wedding Photo akizaih pawlkhat ki entheilai a, alawmpa tawh anuihmai hiuhiau Photo te kimuthei hi. Tuabek thamlo, numeinu in mopawi sapna Wedding Invitation Card tezong Facebook tungah khahkhia in, alawm agualte kiangah mopawi hongsim un ci’n sapna neikawikawi kici hi.

Numeinu pen Community Hospital zato khatah asem hi a, alawmpa zong Provincial Electricity Authority ah asem ahihi.

Alawm ngaihpa, aki teenpihdingpa in ama sangin amoizaw leh sum ahauzaw numeikhat aneihsimlam atheih ciangin buaina piangpahpahthei cihi. Numeinu in kikhending ciangdongin genzel himahleh alawmpa’n thumbawlzel in, adang akithuahpih numeinu tawh kaki thuahnawn keiding hi ci’n kamciam piazel hi.

Chumphon Police Commander asemlaitak ahi Pol Maj-General Sontichai Awattanakulthep in agenna ah alawmpa in tua numeinu sihna vaitawh kisai in bangmah theikhakeng ci’n nialnial masa hi. Ahi zongin anunung ah adang lawmngaih aneihvai leh aki teenpihding numeinu pen thautawh akaplup ahihlam palik te tungah genkhia hi.

Tuapa genna ah mopawi bawlnawnloding kacih hangin, ka lawmnu in Cancel nuamlo hi. Tuaban ah ka lawmngaih akhatpen tawh kaki khending uh hong hanthawnden in, hong lauthawngsak denhi ci’n genkhia hi. Tuahangin akiteenma ni 5 asapni in thautawh akaplum himawk hi.

More: China ah mopawi bawlma akimawl, akidelhleh monu inntung pan kia in si

Motalding kimlai alawmnu thautawh kaplummawk ahih manin, kimansuak pahhi. Mithat bekthamlo, alawmnu akaplupna Pistol thauzong Licence neilo ahih manin, tuatengtawh thu kibawlding cih kiza hi. Sawltak #zomidaily