Alunglut huai August kha

Alunglut huai August kha

1988 kum buaina pan kipan in kawl galkap te’n 100% thuneihna hong lakik leuleu uh hi. Tulai dan mah in ki mudah mahmah a, langpan theih bang tek in kipang hi. Thautawi a pang zong tampi mah om hi.

Tua kawmkal mah ah hong ukna uh kum 22 hong cingto ziau in, mipi atamzaw ut takei leng 2010 kum November ni 8 ni in gambup kitelna hong bawl tentan uh a, amauteng mah kideih piak in vompi sahawm ziau uh hi.

Kitelna aman khit phet November 13 ni in mipi’ makai ASSK amatna uh pan in suahtakna pia uh hi. 2011 kum March kha ciang in U Thein Sein in kumpi tokhom hongla in USDP party in kumpi hong semto hi.

Lem-etna sang in kikhelna tampi hong bawlto pah zuahzuah uh ahih man in leitungbup lokzo mahmah uh hi. Lokzo lua kisa in US kumpipa Barack Obama nangawn nih vei vilvel hong pai in U Thein Sein tawh kimu hi.

August Kha

2011 kum August kha 18 ni in U Thein Sein in “Thautawi kipawlna khempeuh tawh ka kiho nuam uh hi” ci’n hong tangko giap ciang in ki lungdam in ki lawp mahmah hi. (Kihopih to pah ziahziah takpi uh a kawlgam tangthu ah minam thautawi pawlpi lak ah aki gimneih pen ahi KNU tawh 2012 kum January 12 ni in State level thukimna suaikai zo hiau uh hi)

August 19 ni

Hih ni pen buainapi aven kipat ni hi. Hih ni in mipi makai ASSK leh U Thein Sein akhat veina kimu uh hi. Bogoke Aung San i man (photo) mai ah anih un dingkhawm litlet in man akizaihna uh TV ah hong suahsak ciang un kilungdam mahmah a, “Zing ni thak hong suak ding aita ve maw” kici tek hi.

2010 kum kitelna party lianpen ahi NLD leh apawlte (ZNC/ZCD, SNLD, ALD etc.) in anuaksan uh himah leh hih ASSK leh U Thein Sein akimuh ni vua kipan in ASSK pen kitelna ah lutnuam in ui meikang hong bang hiau mawk a, kua mahmah in khozo nawnlo hiau hi.

August kha pen thupi simsim a ka ciapteh khat ahi hi. 2012 kum August kha in zong atawntung a NLD tawh kikop a galkap kumpi alangpan tiilteel den minam party makaite U Thein Sein in kimuhpih a tualak ah ZNC/ZCD pan Pu Gin Kam Lian zong kihel hi.

Tulai ah Pu Gin Kam Lian in U Thein Sein’ kiang ah thongkia atupa (anaunu’ tapa) Go Pian Sing akhahna ding zong ngen a, khah takpi pah uh hi. Ih gennoppi bel “August kha lunglut huai” ahihna hi. Mipil te’n: “History repeats itself” ci uh aih teh atung a te dan vial khat hong tungkik dekdek tading aimai tam kaci hi.

More: August 24 khit Kawlgam khuahun ~ Pu Thangboi

August kha hong nai mahmah ta hi. Khuahun hong hoih dingkal ih ngahlah mahmah kawmkawm mah in ih thungetnate zomsuak tinten ni e maw. Shalom to Myanmar!!! Genkhialh a om leh ngaidam, Mung Laan Thang (Yangon)