Pate’ huzap khat ~ Rev. Zam Khat Kham

Pate’ huzap khat ~ Rev. Zam Khat Kham

Pate Ni khawng hong tun ciangin mi dangte bangin pate tawh i kithuahna, pate tawh i khan khopna cihte gen ding khat beek nei le’ng ka ut den hi. Kum 2 khawng ka phaka ka pa a si ahih manin tua bang sut theih ding om het lo mawk hi. Pate’ thupha ka san bang ahi tam? Pate’ huzap ka gen ding bang a om a leh?

Khat vei, U Enno, Pum Khan En, tawh Kawlpi panin Tedim dong mawtaw ka tuang khawm uh hi. Thucin thutang genin nuam ka sa uh hi. Ama’n “No pen na pate’ khang pan no khang ah, khang kithuapa pilna kizom suakte hi mawk na hih manun mi dangte in hong pha zo lo hi ung” hong ci tangtanga, i pate lah i khua theih ma-a si khin hi lelmawka tua banga i luahsuk leh kizom suaka a kithuap ngakngak ding bang om ding hiam? ci-in ka ngaihsun hi.

I pate’ pilna leh theihnate ei’ sunga hong kithun lah hi lo, ci-in ka ngaihsun hi. Ahi zongin a cih tham kei zongin ka phawk thak thu zong hong om veve mah hi. Pate’ thupha, pate’ huzap, pate’ gou cih khat na om veve ahihna ka phawk kha hi.

Zan deuhin Sia Cinpu Hau Za Cin Suante in laibu khat hong post ngei a, England gama kikhen 1954 kuma Rangoon University Project tawh “Chin Hills Linguistic Tour” tawh kizom Dr. Henderson’ muhkhiat thute laibu-a kigelh hi ngel leh kilawm hi. Tua project vai Dr. G. H. Luce in Journal of Burma Research Society sunga kigelh, tua journal ka pa’ laibute lakah oma ka neihna thu ka genin a post ka comment hi. Mi kim’ neih ahi khol lo na khat na hi a, i pate tua bangin pilna sinna ah na madawk kei le uh tuate nangawn a kinei het lo ding ahihna ka phawk hi.

Tua khit a sawt lo-in Sia Cinpu mah in Zolai kum 50 a cinna pawi kibawlin Lamka pan souvenir laibu a kibawl pen thu hong gena, a nei a om leh mu nuam mahmah ing, ci-in gen hi. Ke’n ka neih lam ka gen hi. Man pawlkhat zong ka zaiha ka khak ni. Tua sungah ka pa H. Go Suan Nang in university student ahih lai-a English-a a gelh “Cing Khup and Ngambawm” zong na kihel hi.

Hihte, kei’ neih hi lo a, kei’ khang zong hi lo hi. Pate’ khang hi. Ahih hangin U Enno’ cih zong maan veve tham ahihna ka mu hi. I pate’ tung pan i hamphatna zong a om tham mah hi cih thu ka phawk hi. Pate’ huzap khat kingah kha veve ahih lam ka phawk hi. A mel i muh ngei loh i pate nangawn tua bang ahih leh a neu-a kipan pa tawh a khang mite bel a hampha mah uh hi ci-in tua bang mite na hamphatna uh kong gen nuam hi. Happy Fathers Day. Rev. Zam Khat Kham