Haksatna leh buaina sung ah Zomite ~ Pau Khat Suan

Haksatna leh buaina sung ah Zomite

U le nau,
Zomite i tuahkhak haksatna leh thubuai, vaibuaite ah Minam bup huam a nasep ding a om ciang, thugen ding a om ciang, vaihawm ding a om ciang..

GZA leh ZC in ong makaih hen la, Student Union/ Association , Youth Association leh Party cihte field ah gamtang in, gamdang a om Zomi kipawlna leh pawlpi khempeuh in amau’ munciat pan mapang henla i vekpi in GZA leh ZC makaihna nuai ah pukdiam thei hile hang…

Kei mimal lunggulhna..

Kipawlna tuamtuam, Biakna Pawlpi leh Partyte in nasep khiam ding, neusek ding cihna hilo a, Minambup a huam ding vaihawmna leh ngaihsutna peuhmah munkhat ah tun’khawm, gawmkhawm, ki thuza in vaihawmkhawm thei hile hang, i thu kihual ding a, lompai thei ding ihih man in thakhauh zaw ding lunggulhna ahi hi.

Ei’ kipawlna vai, Ei’ pawlpi vai, ei’ party vai cihte GZA leh ZC ah va ko, va dong ding cihna hi tuanlo hi.

A tawpna ah, MP, MLA kiteel a teelcingte nangawn in GZA leh ZC tawh a kisam bang in thu kikum in ma pangkhawm hileh deihhuai mahmah asa kahi hi. Tua in i Minam ong thakhauhsak ding hi. Namdangte leh Kumpi thuneite nangawn in ong zahtak, ong kihta tuam ding uh hi.

Minambup vai ah khutkhat tawi, khekhat khai bang in, lawngkhat in gingkhawm, luangkhawm thei hi lehang cih lunggulh luatman hi.

GZA leh ZC in zong kipawlna, Biakna/Pawlpi leh Partyte’ Minam ading a nasepna thapia, hanthawn cihbang ciang bek hilo in, amau mahmah mapang in Tu-te’ mai ah pai a ong makaih ding uh lunggulhna zong a pulak nuam kawm ihi hi.

Pau Khat Suan