Malaysia, Malacca khuasung ah Kawlgammi nih temtawh ki satliamgawp

Malaysia, Malacca khuasung ah Kawlgammi nih temtawh ki satliamgawp

Malaysia, Malacca khuasung ah nasem in aom Kawlgammi pasal nihte temtawh kisatliam cih thu kiza hi. Malaysia, Kuala Lumpur khuasung aom Myanmar Embassy panin akiphuan ahi Kawlgammi te ahuh apanpihding kipawlna OPAMM panin thunei U Sein Win in agenkhiatna ah hih thupiang pen tuni August 29 zingsanglam in thupiang cihi.

Temta tawh sat athuak pen Myanmar Workers pasal mi 2 hi a, tualak ah khatpapen limliam mahmah ahih manin lunghimawhhuai dinmun ah om cihi. Sat athuak tua Kawlgammi nihte pen tulaitak Malacca Hospital ah kikem cih kiza hi.

Sat athuak Kawlgammi 2 te ii amin pen Phone Myint Naing leh Khun Tun Kyi kici hi. Hih Kawlgammi nasem nihte pen Malacca khuasung aom ansai khatpan in apusuah khiatkhit uhciang in Malaysia gammi hidingin aki ummawh pasal khatin temtawh satgawp cihi.

Hih thuthang tawh kisai in tulaitak Facebook tungah upmawh tuamtuam kigen ngeingai tek hi. Hih kong Post khiat uhpen OPAMM panin thunei U Sein Win ii genkhiat kici ahih manin, athupiangzia, amin apuam cihte pen kicianpen khatheiding hi.

Tulaitak Myanmar, Rakhine State sungah Rohingya vaitawh kibuai mahmah ahih manin, tua huhau in Malaysia gamsung ahzong hong lawhpheizel hidinghi acizong ki om hi. Hih Kawlgammi nasem 2 akisatna tungtang ah Rohingya vaitawh kisaina aomleh aomloh pen genciantheih omnailo hi. Ahi zongin abeisa hunsungah Rakhine gamsung buaina hangin Malaysia dongah hong lawhpheingei takpimawk ahih manin, tulaitakzong kidopding thupi khading hi.

Related: Malaysia ah Rohingya papikhat gammi numei nawngkaisakna tawh thong kikhia ~ ZD

Rohingya vaitawh akizop nakleh Malaysia gammi tezong biakna kibatpih himawk ahih manin, gupbawlnuampah zelding uhhi. Hih kisatna zong Malaysia gammi khat ii sat hiding in ki ummawh a, ahi zongin asatpen ii athu bangmah kizakna, ki pulakna omnailo hi.

Malaysia gamsung aom nalawm nagual te aki doptheih nadingin hihthu na hilhsawn in. Malaysia gamsung aom Kawlte zong hihvai hangin patau mahmah uh a, kidopding ki hilhsawn ngeingai uhhi. Sawltak #zomidaily