UNICEF in Nigeria ah naupang 80,000 puksi theihding hi ci

UNICEF in Nigeria ah naupang 80,000 puksi theihding hi ci

Dec. 15, 2016: Nigeria leilu-nisuahna lamah Boko Haram Islamicte kiphinna leh ngongtatna hangin mihing hoihna ding tawh kisai nasepna ah buaina lianpi (humanitarian crisis) piang a, buaina tuakte huhna (humanitarian aid) a kipuak kei leh kum kik ciangin million kim khat a puksih/kialsih ban-ah naupang 80,000 puksih ding hi ci-in U.N. Children`s Agency UNICEF in zanhal in a patauhna thu pulak hi.

“Nigeria leilu-nisuahna lam-a Boko Haramte’ kum 7 kiphinna hangin buaina (crisis) pen thakhat thu-in siatgawpna (catastrophe) suak ta a, tu lianin naupang 400,000 puksih theih ding zah in om a, galtai miilion 2.6 a om khin zo a, mi 20,000 val in sih lawh khin zo hi” ci-in UNICEF executive director Anthony Lake in ci hi. Hih naupang 400,000 ten manlang takin kikepna ding (treatment) a ngah kei uh seh nga suah seh khat si ding uh a, tu lian bangin Borno state sung mun tam zaw ah huhna bangmah kipuak thei lo ahih manin naupang tampi in sihna tuak ding hi ci-in gen beh hi.

Boko Haram ten July kha in galkapte cin’ huhna van pua mawtawte (humanitarian convoy) Maidugiri (Boko Haram piankhiatna mun) panin Km. 70 gamla ah na suam uh a, RGP (rocket-propelled grenade) tawh a kap un bullet-proof mawtaw windshield kha a, UNICEF worker khat, aid workers nih leh galkap nih in liamna tuak hi.

Nigerian President Muhammadu Buhari in UNICEF in huhna a ngah nop manin buaina uang gen uh a, huhna sum a muhte uh huhna nasepna dingin zang loin bullet-proof mawtaw leina dingin zang uh hi ci-in a ngawh ban-ah Boko Haramte galvan lamsang ah kizo khin “technically defeated” a cihna sawt mahmah ta hi. Ahih hangin Nigeria galkap leh a kim-a om gam tuamtuamte galkap “multinational force” ci galkap kipawl ten khuapi leh khuata panin Boko Haramte a hawl khiat zawh hangun gamnuai beel in, sihpih bomb zangin mun tuamtuam suam den uh hi.

Associated Press in September kha a kipanin Nigeria gam-a khuapi lianpen leh Nigeria leilu-nisuahna nuam takin a kilut theihna Maiduguri nangawn ah naupang puksih panpan ta hi ci hi. Doctors Without Borders ten November kha-in naupang tul tampi puksih ta a, lupna 110 bek a nei Maidugiri khuapi-a zato inn ah naupang 10%-25% kipuak ta hi ci hi.

More: Rakhine galkap leh Kawlgalkap te Paletwa ah kikap, mi 10 si

Nigeria President Buhari pen March 2015 in president dingin kitelcing a, Boko Haramte beisakna ding leh nekgukna beisakna dingin kamciamna nei hi. Ahih hangin nekgukna bei tuam lo ahih manin Nigerian Senate in government agencies ten huhna sum lutte a nekgukna hangin naupang ten sihna tuak hi cih ngawhna a kan san laitak ahi hi. Source: The New York Times/Jagonews24.com/ Thang Khan Lian