Adelaide Easter Conference – II

Adelaide Easter Conference – II

Sunsung Seminar neihna ah hong makaih Siate’n a nuai a thulu tawh kizui in thu hilhna hong nei uh hi. Sia. Do Khup – New Life, Sia. Do Dal – Modern Family, Dr. Muan Thang – Well Life in Australia, Sia. Khup Sport Ministries, Sm. Cingpi – Dance Ministries, Sia. Khaibawi- Leadership & Discipleship, Sia. Sian Thang – God’s Law for Community cih bang dan ahi hi. Sunsung thusinna ah aki hel mi za valden a, Khasiangtho in hong ompihciat ahih manin akua mahpeuh ciimke cih bang omlo in nuam kisa mahmah ciat hi. Thungai te’n thugente deihna tel pahpah uh ahih manin thu gente’n zong nuamsa in thugensiam cih min ngahbeh uh hi.

Khawmpi zang dingin Melbourne panin ZMC, ZBC, Emmanuel, MBCC, RC leh Pawlpi tuamtuam panin hunngah peuhmah hong kihel ciat uh hi. Pawlkhatte bang a inn uh tawhkalh liangin hong pai vingvengh uh hi. Nupi naunen honpi khat zong hong pai uha, thupi kasa hi. Melbourne Zomite bel khauhpai mahmah mawk uh ei! Sia. Do Dal zi Syamah Thian in maikum ah ko Melbourne te-in Easter Conference la nungei, ci-in mipi mai-ah hong phuangkhialai ahih manin kum kik ding ngaklah huai hi.
Innteek Pawlpite zindo siamdan leh aki thu tuah dan uh etteh huai mahmah hi. Zomi 100 val omin Pawlpi 4 kim bang aom hangin zin dokhawm, ki khawmkhawm’ laiailiai uh hi. Bawlung(tuukpeng) suihna zong nasia tak in Sia. Khup( Sport Ministries) makaihna tawh om-a, Adelaide leh Melbourne te’ a khatna kituh in Melbourne te’n golkhat tawh zo dektak uh hi. Tua ahih manin Adelaide Zomite zong maikum Easter Conference ding lawpdiak uha, Melbourne aom Zomi khangno te’n bel maikum ah limtak hun zatkhop theihna dingin sapna dan pian a, a tuat uh hi leh ki lawm hi.

Adelaide aom Zomite pen sum le pai zonna lam ah zong, na khangto mahmah uha, innhoih anei honkhop khat omta hi. Innsap leh inn man zong mundang khuadangte sangin niamzaw, ki manzaw hi. A mun pen zang dihdiah hi. A mite zong maimai vetlo uh hi. Pa Dal( Vangteh) bang pen ni dangin Delhi ah ka lenglapi khat uh hi-a, a tunna zong sawtlua nai hetlo napi’n innhoih mahmah khat leh Mawtaw hoih mahmah nih na neikhin in a nasep hanciam dan leh innlam aom a pate a et dan thupi kasa hi. Nu le Pate lungkim sak photleng thupha kingah ahih manin ka nu le ka pate ka et masak hi, ci-a, tua manin innhoih lohoih a nei hing aci tawh kibang mawk hi. A inn uah ka hawh uh leh Mohlim mahmah leh Coffee lim mahmah hong pia uha, agim bang’ namtui vauvau hi. Tuamun ah Dr. Sing tawh ka ki mukha uha, amel atha leh a kampau dan, atat, a hekzia Doctor ding mah in kilawm hi. Tua panin Pa Dal tapa Pau tawh Sia. Paul Khaipu te’n ah ka hawh uh hi. Sia. Paul Khai te’n zong innhoih mahmah na neita uha, zatnuam in Pa Dalte inn mah bangin na kicing mahmah hi. A tapa khat min Vanleng tungtuang acih pen zong a taktak in ka mukhata a, a tate I etteh Pasian thupha sang mahmah uh cih ki muthei hi. Sia. Paul Khai in ni danga, ka kiho na uh na mangngilh nailo hiding hiven, Adelaide ah hong paiding kisa a, cih hong pholak kik a, ka kisuang dekliang a, kei zong kisa mah hiveng ahi zongin hong lemlo kik kacih loh ding, adang om tuanlo mawk hi. Mihingte agel a tangtung sak pen Pasian himawk mah ei!

Tutung Easter Conference pen nidang banglo in Sia. Do Khup leh Zin mangpite zong Pasian in zangh mahmah in nuam kisa mahmah a, mi tampi khitui naptui luang in Pasian mai-ah ki ap uh hi. Khangno nungak tangval te’n zong nuamsa uha, Christian khat I gamtat luhek ziading tel beh semsem uh hi.

Khathu lambek hilo in nisim leitung nuntak na ah a mailam kalsuan ziading uh a muhbeh tampi om hi. Zotang pawlkhat te’ bangin Aussie ah Zolia melhoih a tamlam theihlawh in Zolia pawlkhat te’n zong Aussie ah Zotang melhoih a tamlam theih lawh uh ahih main singdang namcih zata lai-ah Zophual vakop banga, itna anei ka Zomipihte mah tawh mapangkhawm ning, nasemkhawm ning, nungta kalsuan khawmning cih gelna lungsim nei lawh uh hi. Nupi papi pawlkhatte bang in hici bang eimi khat le khat ki khawlkhawm, ki mukhawm a, Pasian phatkhopna pen ko a khanghamta ding in thukhat hi-in tute, tate leh khangthakte mailam ding, ka ngaihsutteh Khathu lambek hilo taksalam ah zong manpha mahmah hi. Mangpau kasiam loh leh I ngeina a kibat loh tawh namdangte sangin ka Zomipihte mah mak in, mo in deih zaw ing, neinuam zaw ing. Tua hi leh I ngeina kepna nam khat hipah hi, cih zah dongin thu a mulawh pawlkhat om hi.

Innteek Pawlpi te’n lah zinte ann hong vakna bekbek uh a sum in dollar tul tampi beilawhta le-uh kisiik ngiatlo in ka mipihte hizah ka vakkhak uh nuamlua ung, leiba zong neikei ung, Pasian thupha hi, tua sangin tam neizawlai le-ung HOTEL ah na vekpi un hong tungsak nuam ung, ci-in Sia. Sian Thang in hong gen beh a, thupi kasakna akhang semsem hi. Lai Siangtho in galkap tampi neihna hang hilo, Ka Khatha bek tawh nama na tun ding hi, na gualzo ding hi, acih bangin innteek Pawlpite atam loh uh hangin a sepna uh khauhpai mahmah hi. Topa’n a zahtampi in na thuksak kikta hen. Pasian gam ading nasep na leh Zomita dingin a etteh tak Pawlpi na hi uh hi.

Nuam mahmahta leh Lengtong Pauno in tungsun ni lengmual ah hong suak, lawmgual ngaihteng tawh khenna ding hi-e, a cih bang danin khenna ding lenkawl ni hong suak naikeita se mah leh zingkhua hong vak in ka Vangleng uh ni 6/04/15 nai 9:30am a lengkhia ding ahih manin utta kei le-ung thobaih in ka puanlom uh zial in nungkaih vei pipi mah in kaciah uh hi. Pa Dal(Laitui) leh Pa Sum(Tuikhiang) te’n hong kha uha, Vanlengkuan ka tun uhteh Emmanuel Pawlpi makaite thusiamna tawh kiallap ann(breakfast) ne-in ka man uhteh nai hong cingta ahih manin ka kikhen mai uh hi. Maikumteh Pasian in lem hong sakpih leh Melbourne ah kimu kik nei ei guai. Ko zong nomah bangin nazuang ung. Thungetna ah kiphawk zel ni, cih ding loh ngal adang omthei nawnlo hi.

Ka vanleng uh ahun man mahmah in hong lengkhia in Brisbane ke tun uhteh Syamah Cingboi leh a lawmte’n Emmanuel Matawpi tawh hong nadawn uha, Zozuu khaihsa bungkhat tek Khawmpi simteng hong pia uh hi. Brisbane Zomite bel khauhpai mahmah mawk uh ei!

Khaibawi