AD Kum 2011 – Kualalumpur aa kibawl Zomi Nam Ni pan Zo suante tung phawn thakna – 1

Zomi ulehnau,
Minamte apiangsak Topa Pasian in, ong piansaksa Zomite, ngimna lian mahmah, tupna lian mahmah, deihna lian mahmah, zatnopna lian mahmah, lam-etna lian mahmah tawh ong piansak ahihlam phawk tawntung ni. Lamdung lamvai ah, zukham ankham in na om zongin ong lam en lai hi.

Tuma Kum 800 lai in tuni tuhun aa Kawlgam akicihna mun ah Pyu minam, Zo minam, Mon minam, Shan minamte teng uh aa Kawl minam in acihtaak nailo hitaleh, tuni tuhun in Kawl minam bek om cihtheihphial hi-in adang teng mangthang khin uhhi.

AD 1850, Mangkang kumpi in Kawlgam bup alaak madeuh aa kipan Kawlgam Suahtaakna ngahkhit 1950, kum 100 sungin Zo minam million 2 pan million 3 taang mangthanghi. Upmawh hilo hi.

Hun khat lai in minamdangte’n Tharla wadi acih, Zomite’n Tuikang gun icih gunpi dung ah Zomite adim aha in teeng ahihman in Zote kuam cihna, Chin-dwin(Chin=Z0, dwin=kuam) Gunpi cihtawh amin kilaih zahdong dingin Zomite akiteeng ngei ahihi.
Tuni tuhun in Tuikang, Chindwin gun dung ah Zomi malkhat zong kimu nawnlo hi. Mangthang thelthang minam ihihi. Alangkhat pan gen ding hileng ong kivalhtum ahihi.

Tua ahihman in hunkhat lai in, Tuikang gun pan nitumna, sak leh khang Zomite tenna gamgi teng enkik hileng gam zai mahmah sung aa kiphah minam ihi ngeihi.

Zomite Kawl gam ah abul mahmah, apil mahmah, alian mahmah minam ihihlam i kammalte tungtawn in kimu theihi. Gtn. in, Zo=(Zaw, Zu), inn=(eng), khuul-(gu), vok=(vuat), nambat simna (khat,nih, thum…sawm=(se)) cihte Kawlmi te mahmah in ei kiangpan angah uh ahihlam kician mahmah aa, India gam khanglam pan aa angah uh Kawllai (Tamilte lai)tawh agelhciang a aw lian ngah zolo ahihman in lai-pau tawh asim suak uhteh akibang nawnlo, akilamdangtawh akibang hibek aa Zomite’n abul anei lai ihihi.

Tai Chawn akici galhang minphatna ngah Matu pa Kawllai tawh agelh uhteh, Taih Chun(Aungsan Thuriya Taih Chun) in gawm uh aa ei nangawn in aminbul theilo zahdong ihihi. Ukpi Con Bik zong Son Pet cipong uhhi. Zomi ahihlam bang atheilo hilai hang.
Tuamah bang in,
Pakokku District sung aa Zaw ci aa kilo minamte zong ataktak “Zo” hi uh aa Kawllai in “Zo” gelhtheilo ahihman in Zaw asuah uh, Zaw akici suak hiponghi. (Tuhunteh ZNC te’n Zo pen akinai thei pen ong gawm uhteh Zu awsuah apua ciang in ong gelh uhhi)

1850 kiim in Tuikang gundungsuk aa kipan Irrawadi gun piau suk teng ah Zomite tam mahmah ahihman in, Ava Mangpa (Mindon Kumpipa) hunsung in Zaw minzi U Pho Hlaing acih Zo Minister a minthang mahmah, apil mahmah khat a om lam Kawlgam tangthu ah tuni dong kigengen lai aa, Zo minister(minzi) Pu Laang cihkhat hingel ding aa Kawllai tawh akigelh ciang Zaw(Zo) Minzi(minister) U(OO, Kawllai) Phu(Pu) Hlaing(Laang) asuah uh hiding kician mahmah kasa hi. Tua hunlai in minam dang tuam khat in om lai mahmah ahihlam kician mahmahhi.

Tua hun lai aa Zo akici minam(Zaw) teng bangzah taktak bang phathei ding cih, tuni tuhun, tua dungsuk aa population tawh kaleh ngaihsut kik ciang awn 2 pan awn 3 peuhmah pha ngel ding ahihhang, tuni tuhun in Zo(Zaw) hi ung cinawnlo in Kawl hi-ung cizaw ta uh ahihman in amangthang hi aa Zo taktak ahon amang aa amangthang ihihi. Tua pen kum 100 sungbek hilelhi.

Hun khat lai in Tuikang gun paiu suk leh nitumna Chin State dong, Zo suante tenna ahihhang tuhunteh, Zomi hi-ung aci khat mahmah om nawnlo ahihman in, Kawl asuak mangkhin ihihlam kician mahmah hi.
Tua lak ah Shan pawlkhat in ong laihelh(Khampat, Homalin, Khamti) hibek aa tua Shante nangawn koi lam tung cih kithei nawnlo in, lah om nawnlo uh aa Kawl suak khinta uhhi.

Minam valh tum lamsang ah Kawlte etteh huai mahmah kasa aa, alangkhat pan en lehang amangthang, athelthang mahmah minam ihihi. Pyu te beimang, kivalh tum khin in, Mon leh Shan zong tamnawn hetlo mawk uhhi.

Tu aa bangta ihpai laileh asawtlo in, ei a omlai tengzong mangthang ding hihang. Ong ki valhtum ding kician mahmah kasa hi.

Hihpen, AD Kum 2011, Zomi Nam Ni, KL(Malaysia) pan Zo suante tung Phawn thakna (amasa) ahihi.

Hang Khan Lian