Antang ip 1000 muibun takin zekkhawm ni ~ Lian Tuang
Covid-19 hangin Zogam ah meikhu paisuak in gilkial dangtak beidonna khat peuh I sin khak ding lung hihmawhna tawh Pu Thomas Khanno piak Tein 100 dapphah in amah mah in ong hanciam in kibehlap toto a, tu in antang ip 1000 i nei ta hi.
Phamawh ginna in Tuithang le Tonzang ah pawlkhat kipuak khin hi. Mai lamah a kisam bangin gel in sem toto lai ni.
[Antang puak kawm in Myanmar gam in a angtan pih mahmah, a khum mahmah le a namtui mahmah ahi, hai Export Quality (seintalone) kungno pawlkhat zong Pu Thomas Khanno in a nu a phawkna tawh Mandalay pan ong puato hi. Tedim, Tonzang kim ah kihawm ding hi. Tu ma kum 20 lai pawlin zong Tuithang ah zawngtah nakpi takin a kicinna dingin thapia in panpih khin hi.]
Lungdam kipakna
I gam sungah hih natna thu ong pian ciangin mi khempeuh kipatau in kilinglawng mahmah hi. Mi khempeuh in I hih theihna tek panin hanciam in ma kipang ciat hi. Kumpi nasemte, zatolam nasemte, kipawlna tuamtuam, gamsung gampua a vekin a kisam bangin tha lawp takin ma kipang ziahziah ahih manin lungmuanhuai mahmah hi. Hih vai ah pan theihna tek pan pangin a kipiakhiate khempeuh pahtawihuai sa in zahtakna I pia hi.
Donghu antang vai
A tunga i gen sa mah bangin hih donghu antang vai pen Covid.19 hangin I gam sungah meikhu paisuak in gilkial dangtak beidonna khat peuh I tuah khak lohna dingin kigal ginna ahi hi.
Ahi zongin tu tadih thupiangte I et tohtoh ciangin natna suksia lua lo tawh kibang pian ahih manin I lung a dam mahmah hi. A langkhat lamah mipil misiamte in a gen ciangin hih natna pen khat vei bek hi loin tholh kikkik thei ahih manin kha thum kha li sung bang etcik kul hi ci uhi.
Tua ahih manin donghu antang vai zong mailamah koi ci kalsuan leng mipi ading phattuamna om thei pen ding hiam cih akua maciat in ngaihsutna kipia in ma I pan khop ding kizawn nuam hang.
Antang bek hi loin ci le sathau cihte khawng zong kiging khol zo leng a lunggulhhuai diam cih zong ngaihsun dih ni.
Hih virus galpi I do sungin antang, ci le sathau ( khanglui pau in antang tuibuk ) tawh I buai lohna dingin ma pang khawm dingin kizawn nuam hang. Ngaihsutna pha , sum le pai, tha le ngal tawh I hih theihna tek panin ma pang in tha san khawm dih ni.
A tawpna ah hih antang ip 1000 i zekna ah a kisam le a kul bangin muibun takin i kalsuan theih nadingin ngaihsutna le panpih i kipiak ding kithum nuam phapha hang. Mimal tawh ahi zongin kipawlna tawh ahi zongin khut kilen in Covid-19 buaina hun sungteng mipi nek ding an le tui kiginna ah ma pang khawm ni ci in i kizawn phapha hi. Phone le messenger tawh thu kiza toto ni. Thomas Gold Travel Agency 01 860 55 22, 01 955 86 84 Lian Tuang 09400511757
Comment piaknop aomleh...