A muibun thungetna (Jeim 5:15-16)

A muibun thungetna (Jeim 5:15-16)

Hun khat lai-in mizawng mahmah innkuan khat om a, amaute in ta nih nei uh hi. Mihau khat ii’ huang sungah, huan cingh in om uh hi. Mihaute’ huang sungah nasem in, a piak bangbang uh ne in a om uh innkuan khat ahi uh hi. Tua bang teng tawh kum tampi hong om tohtoh uh ciangin, a mihaute un zong cimtaak mahmah ta uh ahih manin bangbang hi leh hi te innkuan pen i huang sungah koih nawn dah mai ni. Hawlkhia mai ni cih mihaute nupa hong kithukim ta uh hi.

Tua leh nikhat mihaute nupa a huangcing uh(mizawng innkuan)te kiangah huang cingh in a omsak nawn loh ding vai uh gen dingin vapai uh hi. Tua mizawngte’ tate bek innsungah omin na kimawl uh a, mizawng nupate na om lo hi. Tua leh naupangte in a nu leh a pa uh khaan sungah om cih thei uh ahih manin, nu leh pa aw, hong pusuak un, i mihau(Boss)te hong pai hi,” ci-in samsam uh hi. A nu leh a pa uh pen hong paikhia tuanlo uh ahih manin a vangh panin mihaute nupa leh a ta teng un a etsim uh leh nupa zawng te gel in khutkilen in khitui naptui luang in thu na ngen uh hi.

Hih bangin a om uh mihaute nupa in amuh uh ciangin amau na ngawng a khitui uh hong luang liang hi. Tua leh mizawng nupa te thunget man ding ngak in inn sungah na tu uh a, a sawt loin nupa te hong pusuakkhia uh hi. Mihau pa in zong thugen hong kipan pah a, “Tuni-a, kong paina uh ahang pen, hih ka huang sungah hong omsak zo nawn lo ding ka hihna thu hong gen dinga, hong pai ka hi uh hi.

Ahi zongin hibang in Pasian’ kiangah lungsim takpi twh thungen in khitui naptui luangin na omnate uh ka muh ciangin, ka lungtang hong sukha mahmah a, tha zong ka ngah mahmah hi. Pasian in na thungetna uh hong dawng a, hi huang sung panin paikhia dinga, kong sawl noppen tu’n kong sawl nawn kei ding hi. Ko innkuan tawh a kibangin i semkhawm i nekhawm dinga, innkuan khat bangin nuam takin i omkhawm ding hi,” cih thute mihaupa in hong gen khia ta hi.

Tua thute mizawng innkuante’n a zak uh ciangin Topa hoihna pulak kawmin, mihaute nupa tungah lungdam hong ko uh a, tua ni a kipan in amau zong mihau innkuan khat hong hiziau mawk uh hi.

Eite in zong i haksatna ading, i lungkham i sin khamna ading, i maban ading cihte thungetna-ah lungsim takpi tawh i hel ngei hiam?

Lungsim takpi tawh Topa’ kiang nai-a ngah ding cih upna tawh thu i nget nak leh, a sia pen dinmun, a lauhuai pen dinmun ah i om phial zongin, tuate khempeuh pen Topa’n thupha tawh hong kilaihsak kik ding hi. Amen.

Khazih sungah,
David Tuang