Thuhilhna na man siam hiam?

Thuhilhna na man siam hiam?

(1) Pasian’ hong thuhilhna

Pasian in lampi tuamtuam zangh mihingte hong thuhilh den hi. Hong itluat manin hong thuhilh hi-a, hong it lo hi leh hong thuhilh lo ding hi. “…Pasian in gimna tawh mite thuhilh a, khua a phawk theih nadingun gimna a zang ahi hi” (Job 36:1). Itna cingtaak zong a nei zolo mihingte nangawn in, ei bawlsa zong ahi lo, i neihsa ganhingno khat nangawn it ihih leh, eite hong nei, hong bawl Pasian in eite hong it loin om ding ahi hiam? Pasian’ hong thuhilhnate pen i siat nading leh amah i taisan nading hi lo a, ama lamah i kiheikik nading leh amah tawh i kinai semsem theih nading hizaw hi. Pasian’ hong thuhilhnate thupi san’in ama sungah a thak in ki-ap kik ding hi hang!
“Pasian in a taii mite mi nuamsa hizaw ahih manin, Vanglianpa taiina thupi san in.” Job 5:17

(2) Nu leh Pate’ hong thuhilhna

Nu leh Pate in zong, a tate uh gualtung tuang vabang pil dingin deih ciat uh ahih manin thuhilh tawntung uh hi. Nu leh Pate’ hong thuhilhnate pen i siat nading hi lo a, i hoih nading leh nuntak nuam i neih theih nading hi den hi. Nu leh Pate’ thuhilhnate awlmawh loin i om kha hiam? Thupi san’ loin i om kha hiam?
“…Na pa’ hong thuhilhna hoihtakin zui inla, na nu’ hong thugente ngai in. Tua thuhilhnate in na gamtat hong hoihsak ding a, kizepna lukhu le kizepna khi bangin hong etlawmsak ding hi.” Paunak 1:8-9

(3) Mi khatpeuhpeuh ii hong thuhilhna

Mi pawlkhat in itna leh deihsakna tak tawh hong thuhilh thei zel uh hi. Itna a om ciangin, deihsakna om thei pana, deihsakna nungah thuhilhna in zui thei pan hi. Hong mudah, hong langpan’te khawngin thu hong hilh ngeilo dinga, hong it/deihsak mite bekmah in thu hong hilh ding uh hi. Pasian zong ahi lo, i nu leh i pa, i u i nau zong ahi beeklo khat in, ei thu hong hilh cih pen heh ding leh a sia lama laak ding hipeuhmah lo a, lungdam mahmah ding hizaw hi. Kawl pau kawmpak le’ng, “Sii ta nar pen, way da nar,” i suaksak hetloh ding kisam hi.
“Thuhilhna a mang mite a maa vang ding a, Topa a muang mite a lung dam ding hi.” Paunak 16:20

– Thuhilhna man nop lohna pen, kiliatsakna ahi hi.

– Thuhilhna man nop lohna pen, kipilsakna ahi hi.

– Thuhilhna man nop lohna pen, haina ahi hi.

Kihilh napi-in a mang nuam lote bawlphat zawh nawn loh dongin kisia ding uh hi. Paunak 29:1

Limtak ngai in! Kipuahpha zo nawn lo ding zah dongin na siat ding na ut kei leh, thu kihilhna cih limlim(Pasian’ hong thuhilhna, nu leh pate’ thuhilhna leh mi khatpeuhpeuh ii hong thuhilhnate) thupisan in nuntakpih sawm in!

Itna leh deihsakna lianpi tawh,

Khazih sungah,
David Tuang