Malaysia kumpi vaihawmna PPR innsaap gamdang mite hawlkhiat ki panpanta
Malaysia gamsung ah PPR akici “People’s Housing Project” innte pen kumpi vaihawmna tawh innsaap atawmman zawdeuh hi a, Malaysian gammi tebek aomnading in avaihawm uh ahihi. Nungdiak in Housing and Local Government Minister Zuraida Kamaruddin in PPR innte asaapsak sawnte pen aki hepkhiat hunding kha 3 bek ahun kipiading hi ci’n tangkokhia khinhi.
Tulian laitakin Malaysia gamsung ah “Ministry of Housing and Local Government” ii khutnuai ah PPR Project tawh akivaihawm Building inngolpi 127 om kici hi.
Tualak ah Building innpi 86 tepen PPR nuai ah innsaapsak ngiatding in aki vaihawm hi a, inndei 75,054 Unit saaptheihding phasak uhhi. Adang Building 41 tepen neihsuak theihding “Ownership” in aki vaihawmsak hi a, tuate pen inndei bekbek 10,424 phasak uhhi.
Hih PPR ii vaihawmsak Building tepen innsaapding te adingin tawmmanzaw in, neihsuakding in aleidingte adinginzong tawmman zawthampah hi. Tua ahih manin PPR inndei te angahnuam gammi tampitak omden a, Malaysia gamsung aom State khempeuh ah innkuan 3000 panin 5000 kikal bangin PPR innte a ngahtheih nadingun angakin om uhhi.
Tua PPR innte angahthei dingtepen Malaysian gammi kum 18 acingkhinsa hiding a, innkuanbup sumlut khasum RM2,500 nuaisiahbek angah, inn anei ngei nailo tebek in angahthei ahihi.
Ahi zongin gammi pawlkhat in tua PPR innte ngetna bawlin, angahkhit uhciangin amau omlo in gamdang mite saapsaksawn uhhi. PPR inndei tepen mizawng daipaam te ading hi a, tuabangin gamdang mite asaapsak akitheihleh thu kibawlding hi ci’n National Public Complaints and Welfare Service Centre chairman Datuk A. Chandrakumanan in genkhia hi.
Tua PPR inndei tepen kumpi tungah innsaapman khakhat RM124 bek hi a, ahi zongin gamdangmite asaapsak uhciangin RM500 pan RM600 bang ngenin, summet bawlna in anei Malaysian gammi pawlkhat om uhhi. Tuatengpen zadah uhzong ahih manin, Housing and Local Government Minister in kha 3 sungin gamdang innsaap te aki hepkhiat sakding thu apia ahihi.
More: Malaysia aom gamdang mite’n Public Housing innte asaapleh ki hawlkhiading
Hihvai tawh kisai in DBKL Housing Management and Community Development panin Officer pawlkhat innvak in, innsaap te thusitna neikawikawita uhhi. DBKL Officer te’nzong innpawlkhat kongkhak tawhte tankhia in sitna kipanta uh cih kiza hi. Ih omna, ih innsaapna te bang innnam hiam, PPR Building te ahikhahiam cih kanhuai, theihhuai hi. Innnei te’n akician in honggen khollo khading a, ahi zongin ih omna venglepaam te dongleng kitheipah dinghi. Sawltak #zomidaily
Comment piaknop aomleh...