A manpha khawmpi le kipawlna ~ Lian Tuang

A manpha khawmpi le kipawlna ~ Lian Tuang

Van laizanga sik lompi khat sungah mihing le van tuamtuam tampi om hi. Tua sik lompi pen mun khat panin mun khatah Mu-vanlai bangin leng kawikawi hi.

Huih le guah a kithuah hangin leng thei veve a, zan kim khuamial hangin leng thei veve lai hi.

Tu lai leitung pilna le khuahun luanziate hangin tua siklom leng zaza pen cidam in a pai nading mun a tun ciangin kuamah in lamdang kisa selo hi. Ahi zongin lamkal mun khat peuhah tuahsia in sihna manna khat a neih zenzen leh thu lamdangpi khat in kingaihsun zaw bilbel hi.

Vanleng tawh khualzin kipat hun 1920 kim khawngin ahih leh patauhna dikkuakna tampi tawh vanlenng a kituang dan ahi hi. Tuahsiatna sihna zong om zelzel hi.

Tua bangin tuaksiatna supna baina a tam semsem ciangin 1944 kum in Chicago khuapi ah vanleng vai khawmpi khat kibawl hi.( Chicago convention kici ) Tua khawmpi panin kipawlna khat ong piang khia hi( International Civil Aviation Organization). Tua kipawlna in a nasep ding tampi lakah vanleng tuahsia a om ciangin banghang tuahsia hiam cih thu, kan tel ding cih zong kihel hi.

Tua a kipan vanleng tuahsia a om simin a tuahsiatna ahang kikan pah in nidang ciangin tua bang tuahsiatna a om kik lohna dingin mipil misiamte tawh kikum in vanleng dangte kipuah to pahpah hi. Tua bangin vanleng tuahsiatna sihna manna tampite kipuahphna in a kineih tohtoh manin tu hun ciangin lungmuang takin vanleng a kituang thei na hi zen hi.

Tua ahih manin Chicago khawmpi pen minam le biakna deidan om lo leitung mi khempeuh ading lungmuanna khamuanna apiangsak khawmpi manpha mahmah khat na hi mawk hi.

Tua mah bangin eite in zong International Civil Aviation Organization ( ICAG) bangin tuahsiatna khialhna thanemnate sel bawl se loin kipuahphatna in nei thei leng ei mahmah a kipan i kipawlpi, i pawlpite in i minam, i biakna, i gam le lei ading a manpha thuhoih tampi a piangsakte kihi hamtang dinga, I khawmpite I kipawlnate le I buaipih mahmah thu le late zong Chicago khawmpi zah ahih pah samloh hangin a thupi mahmah dinmun ong suak thei ding hi. Lian Tuang