ZAM Thupuak :: 15 Sep 2019 (DHS te nasep kipan kikding)

ZOMI LEAGUE – FUTSAL KIPAN TA DING

ZOMI LEAGUE :: Ih bawl ngei a om mah bangin Zomi League 2019 zong nopci tak in kibawl ding hi. Tukum Zomi League pen kuanpi kimawl loin Futsal kimawl ding in kikipsak hi. Zomi League 2019 ah Pawlpi min, Khua min leh Club min tuamtuam tawh zong kihel thei ding hi.

Zomi League -2019 ah hong kihel team 12 pha a tua teng Group 4 in kikhen hi.

• Group A Group B Group C Group D
• 1. Haupi FC 1. Buanli FC 1. ZCA FC 1. Phualva FC
• 2. Sunway FC 2. ZEC FC 2. Cikha FC 2. Pyidawtha FC
• 3. Thangkai FC 3. ZCCM FC 3. ZCF- Hatamas FC 3. Ngalzang FC

I gensa mah bangin Zomi League pen 16 September 2019 (Monday) ni zingsang tung 12:00AM in kipan lian ding hi.

ZOMI IDOL TAWH KISAI PULAKNA : Malaysia ah Khuado pawi muakna in kumsim ih bawlden ahi ZOMI IDOL pen tukum zong kumdang bangmah in bawl ding ih hihmanin a lunglutte adingin kong suaksak kik uh hi. ZOMI IDOL tawh kisai a nuai a bang hiding hi.

• ¨ Lutman pen Rm 200 hi ding hi.
• ¨ Pahtawina tawh kisai in Winner a ngah pen Trophy leh RM2000 hiding aa, First Runner Up pen RM1500 , Second Runner Up pen RM 1000 hi ding hi. Music pen ZOMI IDOL COMMITTEE te in hong bawlsak ding hi.
• ¨ Idol kidem niding pen Top (10) kitelna 01 October, 2019 (Tuesday) hi ding aa, Top (5) pen 08 October, 2019(Tuesday) hi ding hi.
• ¨ A kidem nuam peuh mah 10 September, 2019 (Tuesday) ni ciang Form kisang ding hi .
• ¨ A kidem ding te leh ZOMI IDOL COMMITTEE te 17 September, 2019 ni ki muhkopna kinei ding hi.

ZOMI IDOL- 2019 LA DING TE

• (1) Thu hongkhen ding (Sa- Solomon Tuang)
• (2) Zomi na hi (Sa – Kamsen)
• (3) Lauken (Sa – Sia Deihlian)

ZOMI IDOL -2019 MALAYSIA tawh kisai a kitelzaw in theihbehnop a om leh COMMITTEE te tung ah ki dong thei hi.

• 1. Rev. Thawng Khan Sut – 016 6443 011
• 2. Rev. Gin Khan En – 017 3342 760
• 3. Pa Tha Piang – 016 2543 352
• 4. Sia Mungpi – 018 3122 957

Hihteng tungah theihnop bangbang kidong thei aa, min sazian zong kipia theipah hi.

DHS TE NASEP KIPAN KIK DING

September 17, 2019 ni pan in DHS te nasep hong kipan kik ding uh a, kal nih sung na hong sem zom ding uh hi.RSC interview man khin in DHS phi ding a ngak te I phone te hoih tak in len hamtang sawm ni. Khat vei I vai hong kipelh leh hun tampi mah hong kipelh to suak thei ahih manin ei lam pan zong hong kisap hunhun in bawh pah lek thei dingin om den ni cih zong I ki phawk sak zel hi.

MAPANG KHAWM NI ZOMI KHUADO 2019

Zomi Khuado pawi bawl ding tawh kisai in 22 July 2019 (Wednesday) ni-in ZAM zum ah thudotpi te tawh kikup khopna kinei in, Zomi Ngeina Khuado Pawi limtak bawl dingin thukimna kinei hi. A mun dingin Zomite Khuado Hall, Chin Woo Stadium mah ki kipsak hi. Khuado pawi nasiatak a bawlna dingin sum leh pai tampi hong kisam ahih manin muanna leh lametna lianpi tawh Khuado Committee in anuai a bangin mapang khawm dingin kong zawn uh hi.

• 1. Khua kipawlna pan RM200 pan a tungsiah,
• 2. Biakna pawlpi khat ciang RM300 pan a tungsiah leh

Khua kipawlna leh Pawlpi panbek hilo in, mimal in zong ma ih pan khop nadingin kong ngen uh hi. Khuado ni dingin 15 October 2019 (Tuesday) ni dingin kikip sak hi.

Zomi te kumkhen Khuado pawi ah Malaysia leitang tung a om Zomite khempeuh khatzong pelemlo a, ih kihel kim theih nading deihna tawh kong theikhol sak uh hi. Hih hun sungah Zomite maban ding thugenna, Zomi Idol Malaysia 2019, Laam tuamtuam, lasaknate a kipan kivakna/talent show tuamtuam zong om ding a hihmanin khuahun sia leh thusia tuamtuamte tawh kipelh na dingin thungen ciatni.

Zomi Khuado pawipi muakna in ih neihngei sa mah bangin in Zomi League kimawlna zong om ding hi. Tua ban ah tukum in Gym kimawlte in Body Building Competition kidemna zong om ding hi. By: Khuado Committee 2019

ZOMI KHUADO 2019 COMMITTEE TENG

• 1. President : Rev. Dai Sim Mang
• 2. Vice President 1 : Sia Hau Thang
• 3. Vice-President 2 : Rev. Thang Do Khen
• 4. Vice President 3 : Rev. Peter Dal Khan Lian
• Secretary : Sia Kap Za Khup
• 6. Joint-Secretary : Rev. Gin Khan En
• 7. Treasurer : Sia Joseph Tuan Sawm Tuang
• 8. Accountant : Sia Simon Pau Khua Muan Lal
• 9. Accountant 1 : Pa Thang Suan Piang
• 10. Auditor : Rev. Thang Za Cin
• 11. Auditor 1 : Rev. En Cin Pau

MEMBERS

• 1. Rev. Khen Za Dal 6. Sia Thang Zo Mung
• 2. Pa Thang Za Khai 7. Sia Kam Sian Mung
• 3. Rev. Thawng Khan Sut 8. Sia Mamang
• 4. Rev. Pau Sian Piang 9. Sm Cing San Huai
• 5. Rev. Ngin Khat Thang

ZOMI KHUADO 2019 ADING PANPIH NA HONG PIA SA TE

• 1. Sing Za Cin (Mualbeem) RM100
• 2. Zomi State Fund International, ZSF (I) RM200
• 3. IZCC Pawlpi RM300
• 4. Tuicinlui Khua Kipawlna RM100
• 5. Heilei Khua Kipawlna RM200
• 6. Mualbeem Khua Kipawlna RM200
• 7. Saizang Khua Kipawlna RM200
• 8. Lingthuk Khua Kipawlna RM100
• 9. Tuithang Khua Kipawlna RM200
• 10. Dimpi Khua Kipawlna RM100
• 11. Cikha Khua Kipawlna RM200
• 12. Tuimang Khua Kipawlna RM200
• 13. Ngalzang Khua Kipawlna RM150
• 14. Pimpih Innkuan Malaysia RM200
• 15. Tuilangh Khua Kipawlna RM200
• 16. Lalta Khua Kipawlna RM200
• 17. Phaileng Khua Kipawlna RM200
• 18. Suum Mang Ann Sai (Pudu) RM100
• 19. Singgialzang Khua Kipawlna RM150
• 20. ZCA Pawlpi RM300
• 21. Teeltui Vontawi Innkuan Malaysai RM200
• 22. MBF Pawlpi RM300
• 23. Thangkai Suangpi Khua Kipawlna RM100
• 24. Mualpi Innkuan Malaysia RM200
• 25. Lamzang Innkuan RM150
• 26. Praise Adonai Sanctuary Pawlpi RM300
• 27. Langzang Khua Kipawlna RM200

BODY BUILDING COMPETITIONS ZONG OM DING

Zomi khangnote sungah Gym kimawlte adingin zong Body Building Competitions om dinga, tua sungah a ki hel nuam ih om leh zong min sazian kipia thei pah ding hi. Khuado ni ma in kidem khol ding a, pahtawina te pen Khuado ni in mipi mai ah kipia ding hi. Hih Body Building Competitions vai a lunglut te in Sport Committee te tungah min sazian kipia thei lai ding hi.

ZOMI KHUADO 2019 FUND DING LUCKY DRAW KI LEI THEI TA

Zomi Khuado 2019 fund zon na in I bawl ahi Lucky draw dal khat ciangin RM5 tawh kilei thei ta ding hi. I minam pawipi a kibawl zawh na dingin I mapan na khat ahih manin a kua maciat in I leiciatna dingin zong kizawn phapha hi hang. ZAM zum, Khua makai te leh Pawlpi te ah kila thei ding hi.

ZAM ZUM AH HONG HAWH

Mandalay Emmanuel Zomi Baptist Pawlpi kem Rev. Kham Sian Khup in Malaysia hong zin sungin Zomite hong it hong veina tawh ZAM zumah hong hawhin thapiakna leh deihsak thungetna hong neihsak uh ahih manin ki lungdam mahmah hi. Topa’n hong zatsak semsem lai tahen.

PILVANG TAK IN OM SAWM NI : Tuhun laitak in kimat kihen hong tam mahmah a, Malaysia kumpite in a gam sung ah phalna lo tawh om mitampi tak siangsak nuam ahih manin kimat kihen na hong tam to semsem ding hi ci gen khia khin uh hi. Mun tampi ah Oparasi lut kawikawi ahih manin ih om na ciat ah kidawm tak, pilvang tak in om ding hanciam ni. A thukin lua mahmah ahih kei leh vakvak loin I om na ciat ah daitakin om ding hoih zaw tham hi. A zenzen in nasepna ah thuneite in sitna khat hong neih leh kei pen UNHCR ah gambel in hong san ding ngak in a om hi ing/UNHCR card tawi gambelmi ka hi hi. Ka nuntak nading hih teng ah part time tawh na a sem pak hi ing ci-in I gen theih ding thupi ding hi.

Tua bang mah in I boss te kiang ah zong limtak gen khol in. Amau mahmah in zong hihte pen khasum tawh ka sepsakte hi kei part time in hong kuan pak zel bek uh hi hong cih sak ding zong kisam hi. Malaysia om Zomipih a kuamaciat I omna gam huih nun zia tawh kizui-in kidawm ciatni cih hong zasak phapha ung. Kiim leh pam a om mite in hong muh khialh loh dingin I om dan I khawldante kikem siam kawmsa in om ciatni. Azenzen in kimat kihenna khat natuak leh ZAM zum ah hong zasak pah in.

TUKAL ZATO LAM BUAIPIH TENG

• 1. Dim Sian Cing (Ngente) HKL zatopi ah
• 2. Cing Thawn (Tedim) Sungai Buloh Zato pi ah
• 3. Dal Sian Muan Sungai Buloh zato ah

ZATO LAM TAWH KISAI : Zato lam tawh kisaiin vai khat peuh na neih leh ZAM zum ah hong ko in. Nang a dingin ZAM palai te kiging sa in om den uh hi. Contact :Sia Mungpi 018 3122 957

TUKAL SUNG THONG LAM BUAIPIH TE

• 1. Zang Lem Siam (Tungkyaw) Bukit Jalil Camp ah kimuh pih
• 2. Thang Sian Khual (Zozang) Sungai Buloh thongah kimuh pih

KIMAT KIHEN NA TUAK LEH :Zomite sungah kimat ki hen natuak zenzen leh hih phone no. te ah na hopih pah in. Nang adingin atawntung in kigingsain om den uh hi.

• Sia Tuang Pu : 016 254 4093
• Sia Zo Mung : 017 663 6087
• Sia Maa Mang : 018 231 1365
• ZAM Hotline : 016 293 9027

DAHPIHNA PULAKNA

Suangphei Khuami, Tahan Munlai veng a teng Nu Cing Lian Man (Kum 35) in September 11, 2019 ni-in hong nusia a, ZAM/ZSM member khat ahihna tawh kizui in zum vai teng kivansak pah hi. A innkuan pihte lunggulhna tawh kizui-in aluang hawm pen pianna kawlgam ah puakkik dingin kivai hawmpih aa, September 13, 2019 nitak 4:00PM (Malaysia gam hun) in Kajang zatopi misibuk ah khakna ki nei a, September 14, 2019 ni-in kawlgam kipuak kik hi. A dah akap khempeuh tawh kibangin ZAM/ZSM pan in dahpihna I pulak khia hi. Topa’n hong heh nem kim ciat tahen.

LUNGDAM KOHNA

1. Tuan Lem Kim (Gawngmual) RM50

Panpihna hongpia khempeuh tungah genzawhloh lungdamna lianpi ZAM pan kong tangko uhhi. Hi bangin I pan khopnate hang in tuni dong a kalsuan zo I hihi. Topa’n Zomite adingin mapang zo semsem dingin thupha hong pia tahen.