Nazareth Khua:
Rom kumpi in Herod muang mahmah ahih manin gamzaipi tak uksak uh hi. Herod in a sih main a matungah a kipia thuneih na leh vangliatnate a tate tungah ki pialo ding hi, ci-in a sih main thei hi. Tua ahih manin a sihma in a ukna gam khenthum suah in a tapa thumte khen khatta in uksak hi. Judea gamsung teng pen Archelaus uksak a, Galilee gamsung teng pen Herod Antipas uksak in, Jordan gal leilulam nisuahna gamteng pen Philip ading in nusiat hi. Herod a sih ciangin ki ukna hong nuam tuanlo a, a tapa Archelaus in ukding in hong kipat phet in mihing 3000 thahna tawh hong ki panpah hi. A pa Herod mah bangin mi ngongtat khat hih manin a gamsungah ki lemna, daihna om tuanlo ahih manin Zeisu te innkuan Judea gam-ah ciah ding hong piangtheilo in Herod Antipas ukna Galilee gamah apai dingin Kha Siangtho in Josef tungah gen hi. Tua ahih manin Zeisute innkuan pen Galilee gam Nazareth khua ah hong tengin tua panin hong khangkhia hi.
Nazareth khua pen Galilee gam leitawlam mualkuamsung khat ah omin a khuanawl mual ah kahto in khuadakleng leitung phellang tang bang kimu ci-in ki gen hi. Ni tumna lam ah khuadakleng Mediterranean tuipi ki galmuh a, tualai a Tembaw khawlna panin Tembaw a dingkhia litlit te kimu hi. A mualbul zanglei ensukleng, leitungbup ah lampi lian pen kimu a, Damaska khua leh Egypt gam ki kawmna lampi, Africa gambup tawh ki zopna zong ahi hi. Leitungbup ah tua lampi a ki limzat pen a kitawn pen khat in minthang hi. Zeisu hunma BC kum zatampi lai-in Jacob tapa Josef Egypt gam-ah sila dingin a kizuak in tua lampi tawnin paipih uh hi. Zeisu hunma kumza tampilai in Alexander the Great leh a galkap honpi te’n tua lampi tawn uh hi. Napoleon leh a galkapte in zong tua lampi tawn ngei uh hi. Rom galkap honpi te’n zong tawn zel uh hi.
Hih lampi pen khatveivei leitaw lam lamlianpi kici a, khat veivei tuipi lam lianpi kici hi. Hih lawmpi tawnin a paisuk a patio, a ki leh suk a ki leh to te pen Zeisu in muhnopsa in en zel hi, kici hi. Tua ahih manin Nazareth khua pen khua maimai hilo in minam kimin a nawk khakna khua khat leh vai tuamtuam aki hawmna khat khat hi-a, Zeisu pen tua mun panin hong khangkhia hi. Tulai pau leh khuano pan-a, khangkhia hilo in khuapi pan-a khangkhia ahi hi. Tua ahih manin Nazareth khua mi cih min ngah hi. Khuano pan-a, hong pai naupang khat leh khuapi pan-a, hong pai naupang khat a teidan, a omdan, a hekzia, a mi hopih dan ki lamdang hi.
Tulai tak ei Zomi sunga I mipil, I misiam I neihsunte zong a tamzaw Zeisu mah bangin khuano, khuaneu pan-a, asuak hita leh a khankhiatna uh pilna siamna a zonna uh khuapi ahi hi. Tua hi-a, khuano sangin khuapi ah pilna siamna ki cingzaw in omdan’ khawldan’ a kipan a nakhempeuh a khuahun lapin na nungta na kalsuan theizaw uh hi. Kamdang khat zang laileng’ mi sangin na madawk zaw den uh hi. Zeisu zong tua mun-ah khangkhia kha ahih manin mihampha khat hong suak a, Kamsangte genkholhna a tangtunna zong ahi hi. Pasian nasep dan thuman leh a khel themthumlo a hihna zong hong lak hi. Khangthak Zomite zong Nazareth khua dan a, Khua munhoih Khua kician ah khangkhiazo leng mipil misiam I tamding hi. Ahih kei leh I Zogam khuate Nazareth khua bangsak zoleng khangthak Zomite I hampha ding hi.
Khaibawi
Comment piaknop aomleh...