Kei nong “Friend” diam? ~ Jam Daniel

Kei nong “Friend” diam? ~ Jam Daniel

Facebook tawh kizom in I muh mun mahmah kammalte le I zat theih zel kammalte anuai a bang ahihi. (Friend, Invite, Accept/Confirm, Comment, Ignore)

Bulphuh Lai Siangtho: John 15:9-17 Leitung ah kizopna tawh kisai nidangin sadaih, telegraph, email, gtalk, vzo chat, tweeter, WeChat, messenger tuamtuam cih bangin abanban in kizopna om toto hi. Ahi zongin tulaitak leitung ah internet zangin kizopna a kilimzat pen fb ahihi. Tua pen THE most popular “Social Networking” site kici hi.

Aphuankhiapa: Mark Elliot Zuckerberg. May 14, 1984 kum in New York Pynee pan KM 10 a gamlatna khuano khat ah suak hi. Suahpih unau 4 lak ah anihna hi a, adangteng numei vive ahihi. A pa Edward Zuckerberg pen ha siavuan (dentist) hi a, anu Karen Zuckerberg pen lungsim siavuan (psychiatrist) ahihi. A tenna uh New York sung Dobbs Ferry khua ah a sanggam numei 3 te tawh khangkhia uhi. Aneucil apat computer uuk ahih manin kum 10 a phakin amasapen PC Quantex 486DX on the Intel 486 bawl khia thei ta hi.

Apa makaihna tawh kum 12 a phak in ZuckNet kici lai khakna (messenger) bawl khia leuleu hi. Computer khatle khat zom in message kikhak theih na ding hanciam a apa’ sikhaan (clinic) le a inn uh kikal kizopna ah zang thei uhi. Apa in a tapa computer uukna amuhtak teh a theihbeh ding deihsak ahih manin David Newman kici computer siam khat hilhsak hi. Damdam in a siamna hong kitheih tak teh IT tawh kisai kipawlna tuamtuam te in sum tampipi tawh cial uh a, ahizongin athukzaw computer thu sinnopna neilai ahih manin tuate tawh nasep khop ding nial hi.

2002 kum in Phillips Exeter sang pan gualzawhna angah khit tak teh, Harvard University ah maban zom hi. A kum nihna ciangin a theihna le a siamna te hangin mite zahtaakna le minphatna ngah hi. Tua bangin a sang kah sungin zan khat ihmu thei peuhmahlo hi. Tua ciangin a lungsim ah thu khat ngaihsun a FaceMash kici ciamnuih na tawh kisai vote piak theih nading na khat bawl dingin ngaihsun hi. A sang ii website sung ah a kikem sang naupangte maan tampi lakah numei nih lim la khia in ‘ kua pen uang na sa zaw uh hiam? (who is hotter?’) ci’n teel theih dingin suang khia hi. Tua bangin hong suan khiat tak teh sang ii thukhun tawh kituaklo hi ci’n sang committee in thuhilhna nei hi.

Zuckerberg in FaceMash hong kipatma kha 10 lai in a lawmte khat in, ‘mipi tawh kizop khawm theih na ding social network khat bawl thei leng hoih ding hiveh aw’ cih thu na gen ngei hi. Ni khat a lawmpa tawh hong ki kum uh a Harvert sang ii email zangin kizop theihna ding hong geel uhi. A thu hoihsa uh ahih manin alawmte 4 tawh hong hanciam uh a amin dingin ‘Harvert Connection’ hong phuak uhi. A deihna un Harvert sang a kah ngei khempeuh te in khatle khat kitheih na dingin maan khah khia thei in thu le la zong suah khia thei ding cih deihna ahihi. A tawpna ah mun tuamtuam a om sang naupang khempeuh in zong a zat theih na dingun hong bawl khia uhi.

Tua bangin hong bawl khit uh teh Zuckerberg in Harvert Connection min tawh kizom in ama aituam min dang khat hong phuak a tua pen, ‘Thefacebook’ ci hi. A classmate lawmte man zaih in laibu sung ah et theih dingin koih hi. Tua pan in ahunhun in kawm tung ah suangkhia in kua thupi sazaw cih bang in kimawlna nam khat dan in bawl zel hi.

Tua hangin alawmte tawh kitelsiam lohna tawmtawm hong kipan hi. Tua bang a abawl pen mipi’n zong lunggulhna lianpi nei ahih manin mipi zat theih dingin geelna a neih tak teh $ 500,000 bang kisam ahih manin akisam teng mihau khat in sik a tua pan mipi zat theih dingin hong bawl khia a “Facebook” ci’n amin hong laih leuleu hi. Zuckerberg in Facebook tawh kisai adeihna bulpi in pilna tawh kisai ngah beh theih nading geelna ahihi. Ahi zongin a ki thuahpih a lawmte 3 in, ‘ka ngaihsutna uh (idea) hong guuksak’ ci’n mawhsak uhi.

Tua bangin Zuckerberg in ama aituam dingin Facebook hong hanciam takteh alawmte thum in Harvert Connection cih min pen ‘ConnectU’ ci’n hong laih leuleu uhi. Mi tampi in Facebook nuamtak hong zat theih na dingin Zuckerberg in gensiatna, guta hi cihna le thu haksa tampi na phu kha hi. Alawmte lungkimlo uh ahih manin thukhen zum ah amasa 2 vei a kitutna vuah thukhente in tua bang thu mawhsakna hangin Zuckerberg in $ 45 million piak dingin thukhenna na neihsak uhi. May 2011 kum dong a lawmte lungkim zo tuanlo uh ahih manin thukhente in thukicing in a ngaihsutsak kik na ding uh zum tuamtuam na khia kawikawi uh a, ahizongin thukhen zumte in na nial uhi.

Zuckerberg, Harvert University ah a kah dingin a form sung ah French, Hebrew, Latin, Greek a sim theihna thu at hi. Tulaitakin Palo Alto Califonia state ah teng hi. Facebook a bawlkhiat in kum 20 pha pan hi. Leitung ah a kum tawm pen ama siamna tawh sumlut a tampen nihna in kiciamteh hi. Tu kum 2019 kum in, kum 35 pha pan hi.

Fb zat nuam kisalua ahih manin USA gam sung a teng mimal sangin fb zang tam zaw hi. 2013 kum in mimal million 500 val in zangkhin ci hi. Tua ahih manin fb zang teng in gam thak khat sat ding hileh leitung ah alian pen gam thumna hi ding hi kici hi.

A kigenna ah phianmiah mi khat in lawm 130 bang nei a, a lawmte tawh kizopna, man khakna/etna, message simna ah ni khat in minit 55 ta bang hun zang uhi ci hi.

Mite’n Fb bangci zat uh?

• Mi pawl khat te’n kisinna mun in na zang uh a, na pil lawh uhi.
• Pawl khatte’n sum zonna in na zang uh a, na hauh lawh uhi.
• Pawl khat ten lai simna mun in na zang uh a, thu na theih lawh uhi.
• Pawl khat ten Pasian thu tangko na in na zang uh a, Pasian nasem na suak uhi
• Pawl khat ten thupha thuhoih le maan kikhakna in na zang uha, lungnop tuamna in nei uhi.
• Pawl khat ten a ngaih sutna thu thukte suah khia uh a, mite’ a ding thupha suak uhi.
• Pawl khat ten thu hoih thupha suahna in nei uh a, mite a ding tha ngahna piangsak hi.
• Pawl khat ten thu hoih thupha kikupna in nei uh a, mite’n phattuam pih uhi.
• Pawl khat ten comment hoih tawh kidawnna le ki pahtawina in nei uh a, thu hoih suahsak nopna khangsak hi.

Ei’ zat zia? Maan etna/khakna, comment piakna, like piakna, kiselna, ki kona, lawm zonna cih bang ciang bek in a tam zaw’n zang ding ka lamen hi. En’ bang phattuamna ngah?

FB ZANGTE ADING THEIHLOH APHAMAWH LE NEIHLOH A PHAMAWH:

I. Friend (Lawm)

Fb a zang khempeuh in thu tuamtuam tampi I theih theih na ding a kisam khat om a tua pen lawm ‘ friend’ ahihi. Fb na neih hangin lawm na neih keileh a manna tawm mahmah ding hi. Fb tawh kisai a thupi mahmah khat in ‘kilawmtaakna’ ahihi. Friend hihna in ki deihsak thu le la, limte ki share thei hi. I lawmte hong share khat en zong I na mu thei hi. Tua pen kilawmtaakna hangin a manphatna khat ahihi. Ahizongin ki friend keile hang khat le khat ki muhsak theilo zel hi.

Lawm neih a thupitna: Thu thak kiza, thu hoih kiza, thanem laitak tha hong guan thei etc.Tua ahih manin lawm hoih neih khak ding thupi mahmah hi. Lai Siangtho in zong lawm hoih neih khak a thupit zia hong hilh hi.

• Paunak 17:17 Lawm citak in a tawntungin hong it
• Paunak 18:24 Lawm pawl khat te sanggam sangin kip zaw hi
• Fb ah lawmta hihna hangin hamphatna:

A. Ngaihsutna gen thei: (Comment)

Hih pen na lawm khat I thu suah khat peuhpeuh lungdampihna thu suakta takin na kum thei hi. Na lawm khat I thusuah khat peuh tua ci zaw le ci’n na ngaihsutna na pulaak thei hi. Ahoih in na pulaak theih mah bangin a sia in zong na pulaak thei hi. Tua pen lawmta khat (ki friend) na hihna uh hangin a kum thei na hihi.

B. Hawmzaak thei: (Share)

I lawm neih khempeuh ami kibang kimlo hi. Tua ahih manin Thangpu khah thu hoih khat na muh khak tak teh Lianpu in zong na simleh na deihsak hi. Ahizongin Thangpu le Lianpu ki friend lo uh ahih manin thu khat peuhpeuh ki muhsak theilo uhi. Tua ahih manin nang’ palai sem in na hawmzaak (share) thei hi. Na share na pan in Lianpu in zong na mu theita hi.

Thu hoih khatpeuh thei a, hawmzaakna (share) nasep pen a thupi mahmah khat ahihi. Ahizongin Zomite pen ahoih thu khat I share sangin ahoihlo thu khat I share ding ngaklah zaw pahpah ihih manin, tua in I khantoh theih na ding hong dal alian pen khat ahihi.

C. Lungkim pihna pia thei: (Like)

Na lawmte khatpeuh thusuah ahizongin, maan khat peuh suahna ahi zongin na muh tak teh like na piak pen lungkimpih/lungdampih cihna ahihi. Hih pen kam tawh hong phawk ing kicih kul khol lo a gamtatna tawh kizopna, ki lungdampihna khat ahihi. Adiakin kum 15-30 kikal mite in lim zat deuh uhi.

Like tawh kisai a phawk huai thu:

(1) Like hong pia khempeuh hong phawk, hong lungdampih, hoih hongsa keii hikhinlo thei hi. Nang zong like pia ngei na hih manin aman zong hong pia pong zong hithei hi. (Thacial kithuh kikna tawh kibang hi).

(2) Na theih nailoh nang tung pan lametna khatpeuh a neih manin like ong pia zong om thei kha ding hi. Thusia tuanlo hi.

(3) Nang tawh kizom innkuanpih, na naihuai sanggam khatpeuh tawh ana kitheih khak man in zong like hong pia thei hi.

(4) Like hong pialo khempeuh zong hong mudah keii, hong thupi simlo keii hipah samlo hi. Na thu suah, na maan suah hong na muhsaklo hi tuanlo hi. Like pia se takeileh amuh khak thule la ah alungkim mahmah zong mi om theilua hi.

(5) Phawk ding athupi khat in, thu ahi a maan ahi zongin na khah tak teh mite like piak ding lunggulhna tawh khahloh ding thupi hi. Hong ki like le ‘pha hi’ ci inla, hong ki like keile zong ‘pha hi’ cih theih ding thupi hi. (Like ngah ding kidemna ahihle bel a thu tuam ci ni). Hong ki like kei zongin na khah khiat thu/lim khat peuhpeuh nang tawh kizom mi 500 lakah 300 val in na mu hamtang veve ding hi cih phawk in.

(6) Like piak dan: Lungsim takpi tawh lungkimpihna in a kipiak theih mah bangin, khatpeuh thangpaih theih na ding le nawk nop pian man in zong like ki eeng piak thei hi. Lungsim kawi kiukeu khat tawh a pia zong om thei hi cih nopna hi.

Tua ahih manin like tam ngah manin nuam luat pah ding zong hilo a, hong ki like loh manin thanem pah ding zong hi lo hi.

Jesu’n mipilte le mihaute lungkim na ding sangin ama sep ding a om bangbang tawh a sih dong na sem hi.

Eg. Lawm 300 na neih na lak ah lawmtaktak a na neih theih ding 10 zong phalo thei hi. Tua ahih manin fb a hong ki invite, I confirm lawmte pen fb lawm hilel a lawmtaktak hinailo hi.

Lawm hoih taktak icih pen mite’n hong pusuah san laitak hong sung tum te ahihi. Naupangno khat in, ‘lawm hoih taktak I cih pen I hih na bangbang hong thei a hong it veve te hi’ ci. Lawm hoih bang zah na nei a?

Lawm hoih Jesu

Jesu in tapa taimangpa tangthu na gen hi. A ngah ding a pa gamh ngen khia in khual hong zin hi. Gamlapi a zin khit tak teh sum nei ahih manin lawm tampi nei hi. Sum zat ding a neih lai siah lawm tampi nei hi. Ahi zongin a sum teng a bei tak teh a lawm teng in damdam in taisan uh a kuaman lawmin nei nuam nawnlo uhi.

Fb lawm icih pen kitheihna om ngeilopi fb tung tawn in lawm a kisang ihih manin lawm hoih taktak a kineih ding hamsa hi.

Johan 15:15 sung ah Jesu in nasemte kong ci nawn kei ding a, ‘Lawm’ ka hong ci ta ding hi ci.

Jesu in sum I neihman, I hoihman, I siam man a lawm hongci hilo hi. Fb lawm bangin theilopi lawm a hong sang hilo hi. Hong tel mahmah ahih manin I hi bangbangpi mah tawh lawm a hong nei ahihi.

II. Friend Request (Cial)

Na fb na hon takteh nataklam a tunglam milim dan nih aom pen hong lecin ‘Friend Request’ kici na mu ding hi. A tamzaw om thei tawntung hi. Tua pen ‘kilawmta ni’, ‘thule la ki za tuah ni’, ‘kihawm sawn ni’, ‘kizopna nei khawm ni’ ci a hong cialna ahihi. Tua na et teh na sep theih ding thu 3 om hi.

• Khatna ah lawm ding in na kipsak (confirm) thei hi.
• Nihna ah lawm ding deihloin na nial (delete request) thei hi.
• Thumna ah lawm dingin kipsakna lah neilo, nialna lah neiloin na hici koih thei hi.

Tua bangin cialna invite i muh takteh I san ziau (confirm) ziau om a, ami kua hiam ci’n I et pawl zong om a amel ahoih pianleh…, hihnu hihpa in bangdan thu bangdan lim suah hiam ci’n a sit telna zong om thei hi. A tamzaw a kitel taktaklo mi tampi kizopna ahih manin sittel ding a kisam mah ahihi. Eg. Lim hoihlo, thu hoihlo khawng mumu lecin…

Ahi zongin lawm ding a hong zong hong cial (request) tawntung khat om a, tua pen Jesu ahihi. Sum le pai na neih man a hong zong (request) hilo hi. Na mel hoih man a hong request hilo hi. Inn hoih lo hoih na neih man hilo hi. Pilna siamna kivakna na neih man hilo hi. I kicin lohna khempeuh theipipi mah a hong request ahihi.

Ama’n hong request masa hi.

– John 15:16 sung ah Jesus in, note in kei na hong teel (request/invite) kei uh a, ahizongin kei mah in note ka hong teel (invited) hi.

– I John 4:19 sung ah ‘Pasian in eite hong it (request/invite) masa ahih manin, eite in itna I nei thei hi. Jesu in hong (request/invite) masa hi.

Fb tung tawn a I ki friend pih mite in hong thei taktak hen la, en zong I invite pawl khat amau hihna thei taktak le hang I san loh ding, I invite loh ding tampi om kha ding hi.

Ahizongin Jesu in I hihna hong theilua hi. I kicin lohna hong theilua hi. Tua pi mah a lawm dingin hong cial (invite, request) ahihi.

• Rom 5:10 ah, Ama gal ihih laitak in a tapa tung tawnin eite hong kilem sak hi.
• Eph. 2:4-5 ah, Mawhna sung ah sicip dingin I om laitak in ama hehpihna, ama hauhna tawh Jesu sung ah hong nungtasak khawm hi.
• Ama gal ihi hi.
• Mawhna tawh kidim a nungtate ihihi.
• Ama mai ah I manphatna them zong omlo hi.

Ahizongin ama gal ihih laitak, mawhna sung ah sicip dingin I om laitak Pasian in alawm dingin friend request hong khak veve hi. Pasian in leitung mite hong it mahmah ahih manin a tapa neihsun zangin alawm dingin hong request hi. (John 3:16).

III. Kipsakna-sanna (Accept-Confirm)

Kipsakna cih pen sanna ahihi. Hong request/invitepa tawh I kizop theih na ding, thule la i kikup theih na ding hih tung ah kinga hi. I sa’n ciangin I fb sung a om thu khat peuhpeuh a ki theihpih i hihi. Ama thu suah, maan khahte i muh theih mah bangin, ei’ thu suahte le maan khah te zong hong na muhsak hi. Fb na lut sim in thule la i ki theihtuah hi. Tua pen lawm ding a kipsakna i neih man ahihi. Suakta takin kizopna i bawl thei hi.

Jesu tawh thule la na kikum khawm nuam hiam? Na lungdamna, na haksatna te hong puakpih le na ut hiam? Na masuan ding hun omlaite amah tawh vai nahawm khawm nuam hiam? Tua ahihleh a kisam khat om a, tua in hong request/invite na nakipsak (accept/confirm) ding ahihi. Na mailam nuntak zia ding Jesu’ hong invite na nasanna le na nialna tung ah kinga hi.

IV. Ignore

Hih laimal pen lawm ding a hong request/invite te na sannop keileh na nial theih na ding a hong na kikoihsak laimal ahihi.

Fb sung ah lawmta ihih theihna pen mi khat in hong request/invite ciangin na san theih mah bangin, na nial nopleh nial theih na ding ahihi.

Thukhupna:

Na fb lawmten bang ding a hong friend hiam? Nang bang ding a mi invite na hiam? Kidong taktak lehang a hang deihna taktak a gen thei kitawm mahmah kha ding hi. Tuamanin I tel lohpi, deihna theilopi lawm a kiman ihihi.

Na invite te, na accept te bang ngimna nei na hiam? Bang lametna nei na hiam?

Jesu in nuntakna thak I ngah theih na ding a ma nuntakna hong kipia hi. ( En bel biakinn pai hun laitak in vai dang khat hong lutleh vaidang mah I masak kha pahpah hi. Thunget Pasian tawh kiho laitakin ph hong lut leh Pasian tawh kihona nusia in ph tawh I taikhia hi)

Jesu in nang’ nong request kei a, ken ka lawm dingin kong request hi hong ci ahihi. (John 15:16).

Jesu in lawm ding (friend) a hong request na ahang’ a thupi mahmah om hi.

• Tawntung nuntaakna hong ngahsak nuam hi.
• Akimang tawntung ding gah hong gah sak nuam hi.
• Kha thu tawh kipawlin khantohna bukim hong guan nuam hi.
• Mite a ding thupha hong suak sak nuam ahihi.

Pasian in lawm bangzah nei na hiam hong cih sangin, lawm bangzah tawh na kipawl thei hiam cih thupi sazaw hi. Mi bang zah a ding na hun na pia zo hiam? Mi bang zah a ding na hun na zang ngam hiam? Mi bang zah a ding na neihsa/thatang na kiphal hiam?

Jesu in leitung mite hong et tak teh hoih a kisapen na ngawn bel puansia zong bang zonailo hong ci hi. I hoihna tawh lawm in hong zong ding hileh Jesu tawh kilawmta ding kuamah a cing omlo hi hang. Ahizongin I kilawmlohna le I kicin lohna sang’ hong itna lianzaw ahih manin akiam thei ngeilo ding ama nuntakna tawh hong lei ahihi. (1 Pet. 1:18-19).

Jesu’ hong sapna (friend request) anuai a thu 3 te khat peuhpeuh tawh na dawng thei hi.

• Jesu’ hongsapna na accept thei hi
• Jesu’ hongsapna na delete thei hi.
• Jesu’ hongsapna awlmawh loin na hici koih thei hi.

Tua ahih manin Ama lawm na hih naikeileh ama lawm na hi nuam hiam? Jesu in hong invite khin hi. Nang khensatna hong ngak hi. Sermon by Rev. Gin Do Khup, On 26th April 2015 (Sun) ZCF Kota Damansara, Malaysia