A Khasiat Huai Zomi Numei

A Khasiat Huai Zomi Numei

Zomi tangval no khat in Zomi nungak 3 gai khat in gaisak mawk hi. Tua nungak 3 te mun khat a omkhawm uh hilo hi. Khat pen Zangkong ah hi. Zangkong a pen agai lam zong kithei lo a hong suakvat ziau hi. Agil ah zong kilangh hetlo himah tase leh anau pound 6 gik a cidam tak in suak thei hi. Alawm agual teng in lamdang sa in a nu leh a pa nangawn in zong lamdang sa mahmah hi.

Pasian akihtakna tawh anau bawlsia ngam lo in sim paai a anu apa nangawn’ tung ah gen ngamlo hi. Anu apa’ omlohna Zangkong ah asuah khiat dong omcip hi. Anu in asuah lam azak ciang in “Nu” himawk ahih man in zumna hehnate nusia in vanleng tawh hong lengsuk pah vingveng hi.

Lainat lua mahmah kahih man in tuni asuahna zato ah kava pai hi. Pasian in hih LST mun tawh ong hopih hi. Matthai 18:12 – 14

Note in bangci ngaihsut na hi uh hiam? Mi khat in tuu zakhat nei hen la, a tuute khat mang leh, mualtungah a gamta adang sawmkua le kuate nusia-in tua a mang pen a zong dingin kuankhia ding hi lo ahi hiam? 13 Note kiangah kong genin-ah: Tua a mang tuu a muh ciangin a mang lo tuu sawmkua le kuate tungah a lungdamna sangin a mang pen tungah a lungdamna lianzaw hi lo ahi hiam? 14 Tua mah bangin vantungah a om na Pa un hih naupangnote khat zong a sih ding a deih kei hi.

Mihing te’n bel ih hoihna 99 sang in ih hoihlohna 1 hong ciapteh sak zaw mah taleh Pasian in ih hoihna 1 ciapteh ding sang ih hoihlohna 99 maisak ding baihsa zaw ahih lam ka phawkthak mahmah hi. Pasian in ih hoih man a hong itding hi peuhmah leh a ittak ding khat zong ih om kei hi. Ih hoih loh pipi mah ong it ahi hi. A Ma’ ong Itna in kicing khinlua hi.

Pasian in abawlsa nate en in “Hoih ei” cilel mawk hi. Ei’ hileng “Anak tom lua, asam hoih kei, akeng sang lua, anung kul lua, hua singkungte ahiang hoih kei lua” cihmah bang mah tamsak mahmah ding hi hang. Pasian in bel “Hoih” ci ziau hi. Pasian in hoih acih nak leh ahoih hilel hi. Mite’n hoih ongsa kei zong in Pasian in “Hoih” ong cih nak leh phazo lel hi. Zeisu’ tatkhiatna sisan hang in Pasian’ Mai ah mihoih asuakte ih hi hi.

Lungneuna ding bang mah omlo. Maizum zong kullo hi. Ong koko ong zahpihpih te khawng awlmawh kullo hi. Ong phatphatte nangawn in bang mah ong pia zolo aih teh ong ko te’n ong piazo hetlo kan ding hi. Pu Song Theu in mawtaw tuang kawm in avan apuak keenkaan dan a puak keenkaan ding hilo a Zeisu’ tung ah suat ding hi. “Ka hakol puak nop” ci hi. Ih vangik teng ong puakpih zo ding leh ong puakpih nuam Zeisu bek mah om hi.

Maizumna leh lungneuna pen Satan’ vanzat hi in tuate khawng kizawh sak ding hilo hi.

More: Nupi naupaai khat numeibit Virgin laite bangdan in Hymen sianailo

Cih teng khawng tawh tha vapia ing. A lutung ah khut nga in thu ka ngetsak teh thunget dan ong nuam mahmah ahih man in ka lungdam hi. Pasian in a Nuta un cidamna leh mapaina thupha hong piaksak peelmawh ding hi ci in ka um ngiat hi. Amen.

Kiu khat pan
(Mung Laan Thang)
Zangkong