Tui sungah thupha namkimh om ~ ZGKK

Tui sungah thupha namkimh om ~ ZGKK (Hihin, 1989- kum, Laaitui Huallui UNICEF tui hon tungtaang, khuaah a ciahin, Laaitui Tuiphum Biakinnah ahun zatna ahi hi.)

Tui in a thupit daan

Ka neulai un, Zolai Laisimbu sungah, Cope Topa in,“ Tui omkei leh ih sithei hi,” ci in na at hi. Tuhun ciangin ah, tui omkei leh ki sithei hi, hibek nawnlo in, “Tui omkei leh ki si taktak ding hi,” cih, kitel mahmah hi. Tuamah bangin, Zolai Gamthu bu sungah, “ Leitung buppi seh thumsuah sehnihin tui hi,” kici hi. Tuabek hikei lai, Zolai Cidamna bu sungah zong, “ Mihing pumpi seh thumsuah seh nihin tui hi,” kici leuleu hi.

Tua ahih leh, hih ih leitung nuntakna sungah, tui in sehthum suah sehnih mun a tamzaw, ala ahi gige hi. Tuabang ahi taktak leh, ih nuntakna a dingin tui in a thupi belbel dinmun ala hithong hilo ahi hiam.

Laaitui khua leh tui

Laaitui khua tui ngahna taangthu – Laaitui khua in, 1874- kumin inn 27(mimal 100 approx:) tawh aki saat laiin, khua laizangh aa tui khuuk biing omkhat bek ngenghin a zatuh ahi hi.

Kumsimin, inn leh mihing akhan tektek hangin, a tuineek un, tua tuikhuuk bekmah ahi veve hi. Khua kisat zawh kum 110, 1984 ciangin, inn 550 bang ki pha in mihing 3,500 ciang bang aki phak hangin, tua khuasat tuungaa tuikhuk mah muanpi in ki nei lai hi.

Kum 1950-pekin, ka khua uh ah tuihaksatna a na omzo pek ahi hi. Tua khualaizang aa tuikhuk khatbek, khuazangin ki muang ahih man in, tuikhuk ah tui ngak, sun tawh zan tawh pawi bawlna tawh ki bangin, mi atam tawntung hi.

Mikhat in nikhat in nai 24- a neihna ah nai 16- tui ngahna dingin abei hi. Mi khat tawh ih ki muhnop leh tua tuikhuk ah ki zong leh, suallo in kimu theipah hi. A bung neihsunsun, a bel neihsunsun, a kuang neihsunsun teng uh tawh tui angak tek uh hi.

Aki it, aki ngaipipi kimlaite nangawn zong, tui ki tuhna hangin ki etsat na, ki muhdahna, ki galbawlna ki pan hi. Midang gengenloh sanggam u leh nau nangawn zong ki totlawh, ki hauhlawh, ki mai noploh lawh uh hi.

Tuabang ciang dongin tui ngahna ding, aki hanciam hangin, tui kicing cihpeuh mah a om ngeikei hi. A ngahzolote hi taleh, a ngahsa aki cing zolote in hi taleh, tui ki ngah theihtheihna a sih zonpah uh hi.

A tawpna ah, khuasung pan aki zangh tui nin luangsuk teng aki gawmna, Khua-taw-lui a suak khiatkikna mun pan khukbawlin dawhkik in a tawi leuleu uh hi. Tui pen, asiang anin in ki ennawnlo, nellthei kawtthei ahih nak leh angah zahzah uh a tawi nuam uh ahi hi.

Tua hiaa, tuabang tui ka zat na uh pan in, kum simin gilsan aki ngahbel ngeina in ki neita hi. Tua natna tawh kumsim aa a si zong a tawm nawnkei hi. Tuabek hilo, tuabang tui zatna hangin, kum zawnkhal natna ahi, a phaak, alol, a-ngawi, mihing a baanlo tampi tak zonzon kullo in, konglak vakna ah olno takin ki muthei hi.

Hihbang dan pan aki khangto ka hih manin, Laaituite in, a lungsim sungah tui bek mahin mun tampi tak a la hi. Tua a hihmanin, “Laaituite leh tui, tui leh Laai- tuite,” bang ka ciliang hi. Africa gamaa te’n, “Kham deihkei ungh!!! Tui hi, ka deih uh,” (We don’t want gold, but WATER) acih bangkeek hi ei!!! Laaituite zong tuabang linnliann ahi uh hi.(Excerpt from Pau Za Mung’s Memoirs)

Laaituite leh UNICEF tui

Tedim Sialtaang UNICEF tui in, ama namte lakah, Kawlgam sungah, a masa belbel ahi hi. Tedim zawhciangin Saizaang, 1989- kum ciangin Laaitui in Kawlgamah angah masa a thumna ahi hi.

Tuabangaa, Laaitui khuaah akhang akhangaa aki mungei kilkel nailo UNICEF tui aki ngah ngaw-ngawtak ciangin, Laaituite in, tuisikh dawn ding leh anhuan na ding ciangliann bekmah in zanghbeek uh hileh, genluat ding tamlualo, phamdawm lai ding hiven!

Tuabang bekin zanghlo in, Laaituite ii khuak in, a kaanaa a lamdan daanin; zunungg, tong, sa ki gawhaa kipan, hihkhat peuhpeuh a neihuh ciangin, a sahuan na dinguh, a sabel sungah a sahuan dingtenguh akhah (guan) phitphet zawhuh ciangin, thukh tungah suansa in a kawihphot zawhuh ciang ahi zongin;

Zu luupna ah a zuluup ding tenguh zubel sungah aguan phitphet zawhuh ciang in, a zu neekna ding munuh ah a zubel atun zawhuh ciangin ahi zongin;

plastic pipe tawh tuinaak panin tui zawlin, thukhtungaa a suanhsa uh sabel sungah tui nihngingh ngenghin ahi zongin; a zubel tunna uh ah zu leihngih ngehna dingin ahi zongin a zatziu-ziau uh in, leitungah aki mu ngeimeng menglo dan ahi aa, Laaituite ii a lamdan nakhat, midangte tawh aki batlohna khat(they make a difference)a hiding hi.

Hihbang thu in, Laaituite a pahtaak huai ahih leh lah a lamdang mahmah hi dingaa, tua hilo aa a awi khuailo, a maizum huai khat ahih lehlah, kuamah tawh aki tehthei lo hidingin ka um hi.

Bangleh bangleh, THUPHA lianmah mah aki helna tui, Laaituite in hihbang niingniaang tawhaa azat lelleluh in, a cikziat huai, a diipkuat huai, a mulkimh huai mahmah thukhat a hiding hi.

Thupha namkim

Mihingte in Leitungah ih nuntak laitakin hi taleh, ih sihzawh ciangin hi taleh ih nopsak theihna dingin THUPHA namkim(a picing THUPHA) ngah dingin ki han ciam tek hi. Tuabang THUPHA ih cihin, cidam leh thahaatna, lungnopna leh lung muanna, pilna leh siamna, hauhna leh liatna, hawihna leh phatna bek hilo lai, min thanna leh vaangliatnate zong ahi lai uh hi.

Tui! bangci dan tawhin zangh lehang

Pasianin tui khatbek bek ahong piakna tawh a bucing THUPHA aki ngah theihluatna dante in;

Neek leh dawnna pan

Tuisikh siangtho tawh anhuan ahih kei leh ne in dawn lehang, pumpi cidamna, tua tungtawnin thaatnaleh thakhauhna leh hawihna phatna ki ngahthei pah hi.

Zatna pan

Tuisikh siangtho tawh ih pumpi, ih niikten ih puansilh, ih kuang ih keu, ih uum ih beel, ih inn ih lo siangtho sak lehang, cidamna, tua tungtawnin thathaatna leh thakhauhna bek hilo lai, hawihna phatna ki ngahthei pah leuleu hi.

Tuisikh siangtho tawh ankung nam tuamtuam aa kipan, mehgah mehteh namkim, ciingin huan bawl lehangaa, tuate zaantaak an in nei lehang, tuate tungtawnin neihna leh hauhna aa kipan, cidamna, mulmaamna leh thahaat thakhauhna baanah, hawihna phatna ki ngahthei pah leuleu hi.
Tuisikh siangtho tawh aak, va-mim, vatawt, vok, keel, bawng, sial aa kipan gan bek hilo, ngasa zong khawi lehang, tuate mah ne in zaantaak an in nei lehang, tuate tung tawn mahin neihna leh hauhna aa kipan, cidamna, tua tungtawnin thahaatna leh hawihna phatna ki ngahthei leuleu hi.

A tungaa tuisikh siangtho neekna dawn na leh zatna tungtawnin, mel bek hilo ci leh sa leh tha hawih zong ki ngahthei lailai liang hi.

Cidam na

Mihing khat in, pumpi taksa, lungsim leh kha aki gawm bupkhat tawh aki nungta ahi hi. Pumpi taksa leh lungsim adam hangin, kha adam kei leh; lungsim leh kha adam hangin, pumpi taksa adam kei zel leh; kha leh pumpi adam hangin, lungsim a damkei leuleu leh, tua mipa, cidam siang a kici thei kei ding hi. Pumpi taksa, lungsim leh khate, a thumin a damkim ciang bekin, tua mipa nuntakna in cidam siang kici theipan bek ding hi.

Ih ci a damsiang leh, ih mel zong a hawihtheih ding zahin hawihpah in, tua tungtawnin lungnopna, lungmuanna leh khamuanna ki ngahthei pah ding ahi hi.

Pilna leh siamna

Ih ci a damsiang leh, apil nailote nangawn ki pilin, a pilsate zong, pilsemsem in, zawkan in apil lai dinguh hi. Ih pilna tawh ki zui in nasep dan leh bawl dante ki telmah mah ahih manin ki siampah ding hi.

Hauhna leh liatna

Cidamna leh thahaatna, pilna leh siamna, hawihna leh phatnate tawh ih khua saknak nak leh, ih mabaan peuhpeuh ah gualzawhna, daupaina, mavan lawhcin lawhphatna ih ngahpah hi. Tuabangin ih hihleh hauhna leh liatna in hong zuipah hamhtangh ding ahi hi.

Minthanna leh vaangliaatna

Ih cidam ih tha haatin, pilin ciimin, hau in lian in, ih mel zong ahawih lailai leh, ih deih aa ih deih kei zongin minthaanna leh vaangliatna te in nial zawhloh ding zah dongin ahong suulzuih pah ding ahi hi.

Tui sungah thupha namkim om

Pasianin Leitung mihingte a bucing THUPHA ahong piak ciangin, cidamna leh thahaatna a tuamin, pilnaciimna leh siamna alam tuamkhat in, hauhna leh liatna dankhat tawhin, hawihna leh phatna zia a tuamkhatin, minthanna leh vaanliatna a tuamin cihbangin a tuamtek in ahong pia ahi kei dingaa, tui khatbek bek ahong piakna tawh zong, a picing THUPHA aki ngahthei lua ahih lamtak, aki telloh khak ding; Laaituite tui zatdan bang lellel bek tawh aki zaangkhai ngaihsut khakkha ding lung himawh huai kasa hi.