Tuni Zogam ~ Pu Go Sawm Khup

Tuni Zogam ~ Pu Go Sawm Khup

Tu ni pen, Zogam Tedim Gamhuam sung ah, Zomi minsuang ZCD Party in 2020 Kiteelpi ah a MP Kuanglui ding kiteelna a bawlsawm ni hi cih thu kongzing pan za mahhang ei. Zogam tangthu ading in, Politics lam ah kalpi khat akisuan cileng kikhiallo ding hi. Party sung ah Primary Election akibawl cih theih hi.

ZCD Party min tawh MP Candidates dingin angen mimal (11) sung pan, Kuanglui ding mimal (5) a teelkhia ding ci uhhi. Tuni a kikhia Vote tang teng leh Tonzang gam pan a kipuak Vote tang teng pen July 27 ni ciang, CEC Meeting sung ah hongkhia dingin, Tedim gam sung pan Vote tam angah penpen (5) leh Tonzang Gam sung pan Vote tam angah penpen (4) (mimal 6 sung pan) teng pen MP Candidates ding a teelcing hiding cihdan in, Pu Kamlian in hong gen hiven.

Tonzang Gamhuam sungteng bel Delegates tengin Vote vakhia hilo in, Palai khat kisawl in, tua Palai in Vote va kaikhawm cimawk in, tuazong, a lungkim huai takpitam cih, anung ciang hong kilang in um ing. Bangbang hileh Party sung ah Primary Election ahong bawl himhim uhbel thupi sa khinta ing. US Gam vai zawzen cih ding hi.

Tedim Gamhuam ZCD Primary Election sung ah, Khua khat panin atawm pen Tangmi (Delegates) Nihta in Vote khia ding ci uh, Mimal atam khualiante panin atamna zui in Tangmi Thum akiseh om cihzong zakbeh ing. Kumpi thuneite vaihawmna hilo ahihciang, Party sung a Kiteelna bawlnazong a khatveina hipanin, thuman takin hong sem theimah uhtam cihzong alunglut huai khat hi bilbel hi.

A thupi penpen in, Secret Voting zangin Primary Election akibawl suak ahih manin, Vote kikhia bang teekmah in ateelcing tengmah lungkim takin a kikipsak ding, a kiteello mimalkim zong alungkim ding kisam peuhmah ding hi. Tuamah bangin, CEC pawl ahi zong, khat leh nih in, Vote Rigging cih dan, Veto Power tawh lumlet cihdan, Vote gu cihdan, ih kisin nailoh ding lunggulh huai ding hi.

Minam Party ci in, taangpi taangta in ahong ciapteh laitak, tu khanghun a thu leh late Transparency omtak in a kivaihawm laitak, Party in diktatna leh thumanna cih kammalte a siksan laitak in, Vote kikhiate ahi bangin kipsak theih ding, sansiam ding kisin kul ding hi.

Zogam Makai dingin ZCD Party panin kua in Kuanglui leh kilawm cihbel Delegates tengin hoih asak nam leh a deihna uh tel mahmah ding uhhi. Tuipi galkhat panbel, Zogam sung a sandan ahi Zogam Makai ding cih dinmun tuamtuamte ban ah, Minam a thupisak, Zomi Movement tha apia, apanpih, agum (atel sinsen cihzong kisamlai) hi ding, Zomi Party hihna leh dinmun pen thusim in, ZCD Party a phungvuh ding, Minam Dinmun alamto ding cihte kilunglut in um ing. Tualo, GZA Kipawlna in a deihdan dinmunte a kipan, khua leh tui in adeihdan ahi Khantohna lam asem takpi ding cihtebel genkullo cini. MP khat hihna tawh dinmun kisam vive hi.

Tuaciang, tu khanghun ah Zogam Makai ding cihbel, ih kiim ih paam, adiak in Zomi-te zong hong khangto peuhmahta ahihteh, Politics thuthukte leh tu laitak a thulianpi in a kigen ahi, Leadership Capacity, Rule of Law, Good Governance cihte limtak mahin atel sinsen, Makai utne, Thugen siamna ciang khawngbek hilo a, Pilna zong anei kisam mahmahta hi cih taangpi in kitheita hi.

Tua ahihteh, Laitan kician anei khollo, cimai ni Tan Sawm zong akantan zo nailo, ahihkei aleh, atung a kagen Politics thuthukte asin ngeinailo athei khalo taktakte, ahih theih aleh Zogam MP dingin hong kithawi naikei zawmaileh hoih in um ing. Tan Sawm a kantan khakei zongin, Politics thuthukte sinin, ZCD Party tha apia tawntung hih ding ciangbuang kisam in um ing.

Social Media sung a thu kikupna, Zoom Meeting a thu kigente, Pestel Talk a thusinnate ih ngaih ciang, Zomi khangthakte kikhangto, kipil kisiam peuhmahta in, ZCD Party in Zomi khangthakte mai ah, Minam min tawh Pilna Siamna kician aneilo khat Zogam Makai dingin ih teelkhakloh dingzong kisam tamai in um ing. Laitan neilote ka thusimlohna hi peuhmahlo in, ih kiim ih paam khangtolua mahmahta ahih man hizaw hi.

Bangbang hileh, tutung in ZCD Party in Primary Election aneih himhim thangah huai sa ing ei. Tua ka cihteh Party dangte ka langpanna hilo hi cini. Sandan kibanglo, genkhialh a omleh kitelsiamna leh ngaihdam kingenhang ei.
Takkheh Zogam! GSKhup (Zogam – Tuipi Galkhat)