ZomiDaily :: Hissho Sushi Company apankhia Founder & CEO ahi Philip Maung pen 1989 kumin USA gamah gambel in anatungkhat ahihi. Kawlgam kumpi te’n Sen minamte siavuan suahtheih nadingin Medical School ah lutsakloding cih ki deidanna hangin Kawlgam pan taikhia a, USA gam anazuan ahihi. Chinese Ethnic khat hi a, Doctor asuaktheiding khat Sushi Boss asuak ahihi.
USA gamsung alutcil in a ipsung ah $13 bekbek kanei cihi. USA atun akipan Sushi Industry hoihtak kantelpah a, Sushi Business mah sempah ngekngek hi. 1998 kumciang in azi Kristina tawh asumneihteng uh gawmkhawm in Hissho Sushi ci’n Company khat kipankhia uhhi. Company khat kipankhia cihhangin amau nupa in a zawhkhopkhop in innpan in Sushi bawl uh a, Supermarkets leh Cafes te ah puakkawikawi uhhi.
Tuabangciang bektawh ongki pankhia ahih hangin Hissho Sushi pen khangto semsem a, tuni in USA gamsung ah Sushi Bars 400 val leh nasemmi 200 val neita uhhi. Hissho Sushi Headquarter pen North Carolina State, Charlotte khuapi ah om a, 46,000 Square Foot azai Facility inn leh huang lianpi neizota uhhi.
Philip Maung pen 2006 kumin “Ernst & Young Entrepreneur of the Year Award” cih pahtawina ah kitelna Nominate ngahngei hi. 2007 kumin Entrepreneur Magazine te’n Hissho Sushi pen America gamsung ah akhangto pen Company 500 atelkhiat lakah kihelzo hi. Adang pahtawina leh minphatna zong tampi ngahkhin a, Sushi Industry ah aminthang mahmahkhat zong ahihi.
September 08, 2011 ni-inzong President Obama in “President Jobs Speech” aneihna ah Special Guest khatin aki heldingin Michelle Obama sapna ngahhi. Special Guest dingin Michelle Obama in mi 23 bek asap hi a, tualak ah khatin akihelkha ahihi. Hissho Sushi Company pen aki patzawh kum 13 bang apha hita a, kumsim mahin khangtoden hi.
USA gamsung ah nungkumsungin sumzon summuhna hoihhetlo himahtaleh Hissho Sushi pen 62% bang sumlut Revenue khangto ahih manin President Obama inzong pakta mahmah hi.
Hissho Sushi Company thu ahi zongin, Founder & CEO Philip Maung thu ahi zongin na simbeh nopleh http://www.hisshosushi.com leh https://www.facebook.com/philipmaung te ah ki simbeh theiding hi. ZomiDaily
Comment piaknop aomleh...