Hunthak le Mo-thakna ~ Lian Tuang

Hunthak le Mo-thakna ~ Lian Tuang

Innkuan sung kizopna ah nu le pate lungsim tawnga om thute I gen zelzel khin hi. Tua thute langkhat a om thu tampi lakah Mote lungsim tawng thute zong tawm khawng I gen nuam leuleu hi.

1) Nu le pa thumang a nahlawh pek, cih paunak pen mote in a tekte ( pasal’ nu le pate ) thu ong mang ding, lungkim sak ding cih dan bek in ngaihsun kha leng kilawm hi.

Nu le pa cihna sungah pasalte nu le pa ( tekte ) bek hi loin mote nu le pa zong akihel hamtang theileh lunggulh uhi.

2) Ka mote pen kei ma sungsuak ka tanute bangin ka it hi ci in tekte in I mote I itzia I tangko zelzel thei hi. Hih zong a zaknop mahmah hangin a ngaihsuthuai thu om leuleu hi.

Bang hang hiam cih le I tanute tawh sawm vei za vei kikamtamna a om hangin nuta I hih manin kilemkik lel ding hi hang. Ahi zongin mote tawh khat vei kitel khial khin leng hoih takin kilemkik nading hun saupi kisam thei ahih manin mote le tanute I bawldan kibangkim thei taktak lo kha zaw ding hi.

3) Mote pen inn na sem ding, zingsang tho baih ding, nitak lumhak pen ding cih danin I lungsim ah I nei pian tek hi.

Hih thungaihsutna pen khanglui ngeina hi a tu ni dongin I si I sa sungah a om lai ahi hi. Numeite (mote) in zong tua lungsim mah na nei zaw uh a, ahi zongin a lemloh hun, ngaploh hun ciangin kimawhsak pah loin kitelsiam theileh lunggulh mahmah uhi. (Zom to zel ni ei ngaihsutna sung khawm dih ni) Lian Tuang