A daupai makaite (Marks of Successful Leaders) ~ Rev. Dr. Pau Khan En

A daupai makaite (Marks of Successful Leaders) ~ Rev. Dr. Pau Khan En

Leitung mipilte in mihing pen ahon om nuam te hi (Human beings are social animals) ci uh hi. Man hi. Nial ding om kei. Tua i hon om nopna in Makai hong kisam sak pahlek hi. Innkuan sung, khuasung tuisung, behsung phungsung, gamsung leh leitung buppi dong in makai i kisam hi. Upna tawh a kiphut Pawlpi (faith communities) te ah zong makai i kisam sem hi. Tua hi a, ipu ipa te- in, “Simbeng zong kim citciat tangzang kineih” na na ciziau uh hi. Acih nopna uh thuk in muibun lua hi

Atung a igen mihon kipawlna khempeuh anopcit na ding, a khantohna ding leh a kilem diamdiam theih nading in Makaite thupi pen hi, cih bel nialmawh thu a hi hi. Tua ahihman in hilai ah MAKAI TE pianzia igen ding a, tua ah zong upna bulphuh kipawlna Makai te hel nai lo phot in kipawlna dang Makaite thu i masak ding hi. I teldiak ding in Gam Makai (political leaders) te leh mihon Makai te i bulphuh phot ding hi.

Makaite i cihciang in

1. Makai hih nopna lungsim, lungput (motivation) thuk tak in nei in nang leh nang kipholaak kizuak tawm lo- in makai gina khat nasuah theih na ding in na lungsim kisek in kisin tawmtawm in Makai hoih khat hih ding lunggulh ngiat in la, ahizong in nang leh nang kizuak tawm het kei in. Nang lunggulh gige peuh lecin amah’n nang hong zuan lel ding hi

2. Makai gina khat suahna dingin man (cost) piak kul pha mahmah hi, cih phawk in. Na pau nop bang in pheng pau lo a, na ki iipna leh makaite sep ding a kilawm nasep khaf na sep na pen makai hoih khat suah ding na lunggulhna leh man (cost) na piakna hipah hi Nang leh nang makai ut ing ci in kigen khia takei kecin mi in hong thei lua hi.

3. Na makaih ding mihonpi nautaang te, taangpi taangta te thuakna, thumna tauna te veina (hear the cries of the of the people and empathize them) nei in.

4. Na makaih ding mipi te koici nuntak sak nuam a koilai mun tunpih nuam na hiam? cih (goal) siang sinsen in thei in la, na makaih ding nautaang te zong tel sak in. Ki muh khawm na nei den in

5. Laisim hahkat in.Na makaih na ding vai tawh kisai, Nainganzi (politics) a kipan Sumbawlna (economic) Company khat peuh ah mi hong hawmthawh het loh dingin laisim in kanbeh hamtang in.

6. Mi tawh kilholh siam ding pi ngaihsut in. Tua in na makaihna hong kilamdang sak ding hi Mi deihna panpih thei in la, mite in zong nang hong panpih theih na ding in leptuah (negotiate) siam in. Hih thu na siam kei leh Democracy hun ah daupai in na khuasuak ngei kei ding hi

7. Thuman (honest) cih tak in thuman phot phot in.Na kisik kei ding hi. Tua in mihing man phatna a hihi.

8. Vaang (power) leh minthanna (porpularity) deih lua in hong kimuh khak ding peuhmah ut ke’n la, kidawm in. Nang om siam peuh lecin tuate in nang kiang hong zuan zaw ding hi

9. Mipi mai a thugen (public speech) siam tum in. Nagen leh nasep kibang sak in. Tua na thumaanna (integrity) in nang vang hong pia ding hi. Gen atuam, sep adang hisak ngei ngei ke’n

10. Khensat ding a om ciangin hangtak in khensat gemgem in la, na khensatna dinpih gimgem in. (taking accountability)

11. Na vaang (dignity) zahtak in la , phengom, pheng ciak kha het kei in. Na vaang tang in. Na vaang kemcing in.

12. Thu zawikaih (diplomacy) nasiam na ding hanciam theih tawp in hanciam in. Hih thu, siam lo- in makai siam na suak zo ngei kei ding hi. Ahitazong in khauh akul leh a kisapna mun ah khauh gemgem lel in. “Makai khat bel kinip den kineem den thei lo hi” ci- in Singapore te Makai siam Lee Kwan Yu in gen in zong zui pah hi. (A leader cannot and should not be too soft always)

Makaih siam i cih pen suahpih suahken (born) bek hi lo in atum leh alunggulh taktak te ading in sintawm theih (learned) luat ahi hi.Nikhat khakhat kumkhar thu tawh a kingah pah hi zenzen lo- in makaih kawmkawm a sin tohtoh ding (process) a hihi.

Midang te khialh khak na te pan leh eimahmah khialh khak nate nangawn i Sia hoih pen hong suak thei hi. Lungkia kei in. Leitung Makai minthang te zong a lellel, a kiakia pimah ta hetlo a, kuhkal tak a; a hanciam tentan ciang bek un a gualzo Makai apiang pan uh a hi hi. Nangzong tuabang a apiang theilua nahihi. Kungkia kei in! Rev. Dr. Pau Khan En