Australia gamsungah Refugee te luttheih nading Program thak “Community Support Programme (CSP)”

Australia gamsungah Refugee te luttheih nading Program thak “Community Support Programme (CSP)”

Australia kumpi in agamsung ah Refugee te a luttheih nading Program thakkhat vaihawm uh a, tuapen atomin CSP kici hi. CSP cihpen amalkim in “Community Support Programme” acihna hi a, tukum 01 July 2017 ni ciangin akicingzaw in Australian Government in tangko khiatading cih DIBP (Department of Immigration and Border Protection) pan kiza hi.

Ataktak in hih CSP cihpen CPP panin hongki pankhia ahihi. CPP pen amalkim in “Community Proposal Pilot” kici hi. CPP akici Australia pan kisaptheihna Program pen 2013 – 2014 kumpan in akipankhia hi a, kum 3 sungbang zangmankhin uhhi.

Australia gamsung aom Company khatpeuhpan ahi zongin, kipawlna akician Community khatpeuhpan ahi zongin, innkuan ahih keileh meltheih tanau, mimal khatguak mintawh ahi zongin CSP tungtawn in “Humanitarian Visa” ki ngetsak theihi. Australia gamsung atungsa te’n ahi zongin, Australia gamsung ah sumbawl Business Community te’n ahi zongin Refugee te panpihna ah akiheltheih nading uh ngimna tawh kumpi in hih CSP pen avaihawm uh ahihi.

Tuabang in Australia gamsung panin sapna Application abawlsak te’n asumbei khempeuhzong apiaksak uh kulpah bekthamlo, Australia alentheihleh atunzawh kumkhatsung akisapna khempeuh avaihawmsak uh kulsakpah leuleu hi.

Tua ahih manin CSP tawh Australia gamsung panin asapsawm “Proposer” te’n sum akicingin aneih uh phamawhpah a, Financial Statement leh Bank sungah sum bangzahnei cihdong in sitcian masaphotpah uhhi.

Hihbang in CSP tawh kisaptheih nadingin sumbeipen CPP sumbei zahtawh ki bangsakding ci uhhi. (The Visa Application Charge for the CSP will be the same as for the CPP)

Abeisa 2016 – 2017 kum huamsung CPP tawh kisaptheihna ah sumbei pen Primary Applicant (PA) mikhat ciangin Australian Dollar A$30,000 (RM97,000) ahihi. Innkuan makai “PA” khitzawh mikhat aki behlapsim in asumbei dingzong A$5000 ta ki behlap hi. Abeisa CPP tawh sumbeizah leh athu akicingin PDF tawh nasim nopleh: Community Proposal Pilot Information (2016 – 2017) PDF File

Gentehna: PA in zi/pasal aneihleh mikhat aki behlap hipah ahih manin nupa kopkhat sumbeiding pen A$35,000 hipah hi. Tuaban ah takhat aneihsim, aki behlapsim in A$5000 ta sumbei ki behlapding hi. Nupa kopkhat leh ta khat aneite akigawm in A$40,000 beiding cihna hipah hi.

Sumbeiding khempeuh piakpah kulsak uh a, deihlopen in Visa ngahloh nakhat aneih zenzenleh sumbei khempeuh piakkik “Refund” cihbang omloding hisawnsawn hi. Sum tampi beikul himawk ahih manin, tuciangciang Zomi sungah CPP tawh apai kizakha nailo hi.

CPP akici “Community Proposal Pilot” pen CSP “Community Support Programme” tawh kilaihta cihzong 30 May 2017 ni in CPP te Website ah genkhiakhin uhhi. Note: CPP te website ahi https://cpp-apo.net pen phiatkhinta uhhi.

July 01 ni ciangin Australia kumpi website khat ahi DIBP (Department of Immigration and Border Protection) panin athu akicingzaw in hong suakkhiasak ding uhhi. Home Affairs Website >>>

Abeisa CPP hunlai in kisaptheihna Application bawltheih hunpen 2016 – 2017 kum aidingin July khakhat sungbek ahun pia uhhi. Tua ahih manin hih CSP vai alunglut te’n July 01 ni ciangin DIBP te Website nahawh unla, athu ala akician in nasimpah hamtang un. 2017 – 2018 kumsung adingin CSP tawh mi 1000 lading uh cihi.

CPP hunlai inzong Zomi sungah kuamah atheihcian ommello hiam, Application abawl kuamah kizamello hi. Hih CSP vaipen Australia kumpi in avaihawm thak ahih manin, ih minam sungah ahunlap in ihki hilhsawn, zaksaksawn kawikawiding deihsakna tawh kong pulakkhia uhhi. Sawltak #zomidaily