Jesu sisan behlap kisam hiam? ~ Dr. Ngul Khan Pau

Jesu sisan behlap kisam hiam? ~ Dr. Ngul Khan Pau

Papi khat a min Peter kici khat in khatvei phone tawh hong hopih a, “Sia aw, ka lungmang mahmah ahih manin nong huhna kisam ing,” hong ci hi. Amah thunget lawhcing mi khat kiangah a damlohna thungetsak lunggulh in a va pai leh, tua pa’n na cidam nop leh thu thum kisam tuate:

“(i) Kel (goat) khat tawh nong pai ding, tua kel si tawh na kisiansuah ding kisam (ii) A nihna ah lungdam kohna sum “love-gift” nong tawi ding (iii) Na min “Peter” zong i khek kisam ding hi, bang hang hiam cih leh Lai Siangtho min nei peuhpeuh Dawimangpa’n khem nuam phadiak” na ci hi.

Ke’n zong, hong dong na hih ciangin ci-in hih bangin ka dawng hi. (i) Kel, bawng sisan hi loin Jesu sisan kibua kicing khin zo (Heb. 9:26-28, 10:10, I John. 1:7) (ii) Lungdam kohna pen nong taktak leh na piak dingin kilawm ding hi, ahi zongin thungetna zong hong neisak loin sum hong tawi-in hong cih pen, hoih khin dingin ka um kei hi.

Thungetna sum tawh lei ding hi loin sum tha tawh vaihawm pen “leitung vai” sum zonna vai lua kasa ka ci hi. (iii) Na min zong “Peter” kicih manin Dawi mangpa in hong khem nuam deuh hi loin “Pasian tate” khempeuh a kibangin hong khem nuam hi.

Tuhun ciangin aksi zat ding kisam, bawngsi zat ding kisam a cite’n Jesu sisan kicing lo a ahih manin ganhing sisan kisam i cih leh sawltak Paul in tua bang mite “tawntung in mawhpaih” hi hen ci hi (Gal. 1:6-9). Rom mite kiangah sawltak Paul in amau gilpi ading Lungdamna Thu gen om na ci hi (Rom. 16:18).

“Thusuak” ahih leh zong Lai Siangtho tawh kituak hiam cih etcian ding kisam hi (Sawltak 17:11, I John 4:1-3). Agentehna in mi khat in, “Pasian in na mawtaw kei nong piak ding,” thusuak ngah ing hong ci leh, ke’n zong, “Tua banga kong piak ding takpi ahih leh Topa’n kei hong theisak ding hi,” ka ci ding hi.

Pasian thu tawh kihel, mi patauh nading thugen kitam mahmah hi. Kamsang khawng i kici uh a, tanglai kamsangte’ zong amau kam panin thusuak a tangtung lo, kamsang zuau na tam mahmah hi. Kamsangte zong amau tua zaa kipia hi loin Pasian in ama kam a zat manin tua tawh kisam hi.

Lai Siangtho ah ciah kik ni, Pasian thu Lai Siangtho sim loin eima ngaihsutna thusuak i sak ding lauhhuai mahmah hi. Topa Pasian in ama pahtak le damsung Lungdamna Thu tawh kituak nuntakna hong pia hen. Rev. Dr. Ngul Khan Pau