Thuthak tomkim ~ The Tedim Post (12 Aug)

News In Brief: Thuthak tomkim ~ The Tedim Post (12 Aug)

2020 kiteelpi ah vote(mee) pia thei ding Myanmar gammi gam pua lam a om te adingin Embassy zumah form 15 tawh a kisiauh theih hun pen a tungin August 5,2020 a nunung pen in sang ding cih himah ta seleh tun a ni khinto in Embassy pawlkhat ten August 12 leh adang pawlkhat ten August 15,2020 dongah khinto uh hi.

21 Century Panlong Khawmpi a 4 veina ah kumpi lam thunei ten AA thautawi kipawlnate a sap kei vua leh ko zong hih khawmpi ah ka kihel ding leh kihel loh ding pen kician nailo hi, ci-in TNLA makai Mai Aik Kyaw in August 8, 2020 in gen hi. AA leh TNLA te pen belpawl thautawite ahi uh hi.

2019-2020 Matriculation Exam aa kawlgam bup ah Top 1 a ngah Ma May Thet Htun pen Bella Cosmetic Company ten a lungdampihna leh a pahtawina un ama ut ကလေးအထူးကုဆရာဝန် a pian dong panpih ding ci hi. Bella Cosmetic te in sangnaupang 100 val bang Bella Scholarship Program pan scholarship pia khin uh hi.

Leitung mun tuamtuam ah COVID-19 pianna hangin nasem thei nawnlo leh sangkah thei nawnlo in a om Myanmar gammite amau omna gam ciatah kumpite vaihawmna tawh a kila kik ahi Myanmar gammi pen August 8, 2020 ciang mimal 10,014 phata hi, cih thu kiza hi.

2019-2020 laisin kum gilbem sungpan tan 10 phi mimal 178 lak pan 60% val ahi mimal 108 in gualzawhna ngahuh hi, cih thunei ten genn uh hi. Gualzawhna a ngah sangnaupang lak ah numei 14 leh pasal 164 pha hi.

Leitung ah amasa pen in Russia gamin COVID-19 natna dalna zatui pen Russia gamsungah official tak in kizang theita hi ci-in August 11,2020 in kumpi pa Vladimir Putin in tangko khia hi. Tua zatui min pen Sputnik-V hi a, tulaitak COVID-19 natna dalna dinga akibawl zatui nam 6 bang a nunung pen in sitna a kinei laitak ahi hi.

India te president lui Pranab Mukerjee pen Aug 10, 2020(Monday) ni in COVID-19 positive hi, cih thu ki za hi. India gamah August 11,2020 ciang cases 2.26 million val om a, tua lakah 6,39,929 pen active cases hi in a si mimal 45,257 leh a dam kik mimal 1.58 million om ta hi. India pen leitung bup ah USA leh Brazil khit ciang COVID-19 cases a tampen thum na ah om hi.

August 10, 2020 ni-in Indonesia gam a om Sinabung meimual puahkhamna ah a themnengte pen vantung lam meter 5,000(16,400 ft) bangah lengto a, a vut te pen a nai a om khuakiimte ah ki thehthang mang hi, cih thu kiza hi.

South Korea gam mun pawlkhat ah guah ni 44 sung bang ciin ahihman in mun 400 val ah mencipna leh tuikhanna hangin mimal 18 in sihlawh khin a, mimal 16 bang kimu nailo hi, cih thu kiza hi.

Lebanon gam Beirut khuapi ah puahkhamna a piangzawh kal khat khitteh kumpi lam nasem khempeuh a kumpi nasepna tek uh pan khawlna ding lai pia in khawlna nei tek uh hi. Hih puahkhamna ah minal 200 val si in 7,000 kiim bangin liamna tuak uh hi.

Hongkong a Daily News Media nasem Jimmy Lai Chee-ying pen Aug 10, 2020 zingsang lam pawlin a inn ah ‘Gamdang kumpite tawh kipawl khawm cih upmawh na’ tawh kiman hi. A ki man mi 7 lak ah a tate nih leh Next Digital aa ulian mi pawlkhat zong ki helh kha uh ci hi.

Covid19 nat na hang in kawlgam ah Basic High School 7,000 val a om lak ah 4,000 val bek ki hong kik thei pan aa a dang 3,000 val te pen Cidam na tawh ki tuak loh na hang in ki hong kik zo nailo hi.Private sang 1,001 a om lak ah a lang kiim bek ki hong kik zo pan hi. Source : 7day news, , Eleven Media, Yahoon News, The Weather Channel, Bella, The Indian Express, VOA Burmese. Thukai Khawm: Lu Lun, Shang Shang.