Malaysia, Klang Factory pan aki pummat numeinu ki mukikta

Malaysia, Klang Factory pan aki pummat numeinu ki mukikta

Malaysia, Klang vengsung aom Factory khatpan aki pummat, Kidnap athuak numeinu pen ki mukikta cih theStar pan kiza hi. Friday zingsanglam in Kampung Jawa vengsung aom Factory panin aki pummat hi a, Friday nitaklam 10:30pm hunpawl in akimatna phualmah ah ki mukhiakik hi.

Tua nupinu ii atapa ahi Arri Thevan kicipa in agenna ah nitaklam ciangin Phone tawh hongki zasak a, nanu pen anasepna Factory gei ah ki puakkik khinhi ci’n hongki zasak ci’n genkhia hi.

Atapa zong azakphet in nuamlua mahmah in, delhpah vingveng a, anu amuh ciangin amanlang in zato ah paipih suakpah hi.

Tua nupinu pen akibetna alu leh akhut ah liamma pawlkhat omhi. Tulaitak zato ah kikem in, tawlkhat zato ah ki koihsuakphot kulkhading cihi.

Atapa in agenbehna ah tua amatcip Abductors te’n anu kiangah ATM Card leh vanmanpha Jewellery apuakteng ngen uh cihi. Ahi zongin anu in Phone bek pua a, Handbag apuakloh, bangmah ngahding aomlohlam atheih uhciangin amancip te’n anu pen betsakgawp uh cihi. Kanupen cidam in hong ciahkiktheih kalung uh dammahmah a, ahi zongin hong matcipsak tezong amanlang in akimatkhiat theihnading ka lunggulh mahmah uhhi ci’n genkhia hi.

Hihvai tawh kisai in palik thunei ahi Shah Alam OCPD Asst Comm Shafien Mamat inzong agenna ah nupinu pen kisat, kibenggawp in mawtaw sungah ki sawnsukcip cihi. Mawtaw sungah alutkhit phetin amit kituamsak ahih manin, tua amancip tepen amel asa bangdan cihpen nupinu in theilo cisawnsawn hi.

Apumpi tungah apuaksunsun ahi Mobile Phone leh vanpawlkhat suhsak uhhi. Tua miginalo damiah tepen aki zonsan laitak hi ci’n palik te’n Saturday ni in genkhia uhhi.

Hih nupinu pen Friday zingsanglam in Mercedes Benz mawtaw akang khattawh pasal nih in amatkhiat uh ahihi. Amatlian laitak uhzong CCTV panin Video Record om ahih manin, Social Media tuamtuam ah tawmveisung in ki thehzakpah zihziah hi.

Police te’n hihvai pen “Section 365 of the Penal Code for kidnapping or abducting with intent to secretly and wrongfully confine a person” thukhun tawh Case kibawl in, tua apummat te matkhiattheih nadingin aki hancian laitak hi ci’n genkhia uhhi.

Video: Woman abducted outside Kampung Jawa factory found

CCTV sungah aki etkik ciangin Mercedes Benz mawtaw akang khat Factory Gate mai ah akhawl kimuthei hi. Tuaciang in numeikhat hong pusuak in, mawtaw nungah angak pasal khatin laidal Document tungah letmat thuhsakding in kithawi hi.

Tualaitak in tua numeinu pen zawhtawhthu tawh mancip in, mawtaw anunglam tutna ah sawnsuk hi. Numeinu pen kitomgawp himahleh mawtaw asungpan inzong pasal khatin nalen in, nakaitumsuk a, kongkhak khakcipsuk hi.

More: Philippines ah ngawngtan athuak Germany gammipa luanghawm ki mukhiata

Tuakhit ciangin apualam aom pasalpa pen Driver Seat ah tusuk in mawtaw hawlkhia vingveng hi. Hih thubuai Incident pen tuzingsang 9:40am hunpawl in thupiang ci a, khuavak mipi muhtang mahin akiman, Kidnap akibawl uh himawk hi. Sawltak #zomidaily