A 5 veina ZBCA Khawmpi nuamtak in kizo siangta

A 5 VEINA ZBCA KHAWMPI AH BWA GS ZONG KIHEL THEI IN NUAMTAK IN KIZO SIANGTA: LUNGDAM UNG TOPA

THU MASA: Tutung Tuipi galkai Zomi te adingin athupi mahmah khawmpi khat ahi A 5 veina ZBCA Khawmpi tawh kisai Pasian ompihna hangin lawhcing mahmah ahih manin Topa tungah lungdamna iko masa hi.Biakna pawi pen anei Pasian hi a, anungta Pasian biakhawm ding leh ama adingin nahoih sem khawmdingin kipai ahih manin khawmpi anei taktak Pasian ahihi.

INNTEEK TE THUPI LUA:

Innteek ZBCM of Tulsa te pen mimal 600 kimpha hi-in apanmun ciat uh zo mahmah uha, Hotel room 200 bang kizang in Siate upate khangno te akipan amau panmun ciat ah thupi lua mahmah uh hi. Hih bangin zindo siam innteek pawlpi te tungah ZBCA gambup kilungdam mahmah hi.ETteh tak mahmah pawlpi ahihi cih khawmpi sim khempeuh in kimu hi.

ZIN 900 BANG PHA :

Tutung A 5 veina ZBCA khawmpi ah zin bekbek 900 bang hongpha mawk in Hotel room 200 akidm sitset hongsuak mawk hi.Meltheih inn a tung pawlkhat omlai liang hi. Hibangin Zomi ten anungta Pasian thu sungah lungdamna hangin iki kaihkhop ziahziah pen thupi mahmah hi.Khua 50 kim pan zin hongpai hi.

KAWLGAM PAN ZIN 40 OM THEI:

Tutungin Khawmpi sungah Kawlgam pan Pasian nasem te leh upa makai te zin 40 bang hongom thei in thangah huai mahmah hi. Hih bangin Pasian nasem te pawlpi tuamtuam pan hong om theih manin lungdamna lian mahmah hi.

BWA GS SEMLAI PA HONGPAI IN THUGENNA NEI:

Abeisa kum 10 sung BWA ( Baptist World Alliance) leitung gam 124 ah General Secretary asem laitak Dr. Neville Callam in Zomi te sapna hong thupi sim mahmah in hih pawipi sunga Saturday nitakin Sermon lungkim huai takin hongnei thei a , mipi in tha kingah mahmah hi. Leitung gam 124 adingin thugil kician mahmah hong at hi uhteh ci ahih manin thangah huai kisa lua hi. Agenna thupi khat ah, ” Pawlpi pen mihing neih hilo in anei taktak anungta Pasian ahihi” ci hi.

Tukum pen BWA GS akilaih kum hi in, athak a kiteel pa pen Dr. Elijah Brown hi in tunung in ZBCA makai ten Kawlpi ciang paipih uh hi, amau geel pen mipi mai ah panmun ki ap khin in , zum nasep pen Jan 1,2018 ciangin kilaih pan dinguh ahihi. HI bangin in leitung gam 124 leh organization 238 ah alian pen pen te in Kawlpi leh Tulsa te ah ZBCA te vaihawmna tawh hongphak theih manin alamdang leh tangthu thak hoih mahmah ahihi.

July 29,2017 nitak in BWA in Full membership hongsanna hangin lungdamkohna ankuang luina thupi takin kinei thei a, anuai atengin Kawlpi leh USA ah kigawm in lungdampihna Lai leh thugenna hongnei thei uh hi.

1- GZA pan.
2- LZI pan
3- ZBCM pan
4- ZCLS pan
5- ZNCM pan.
6- ZWA pan.
7-ZYA pan.
8- Zomi Culture Department pan.
9- KBVA pan.
10- SKVBA pan.
11- NKVBA pan.
12- TTBA pan.
13- KZBA pan.
14- TVBA pan.
15- ZZBA pan.
16- TBCA pan.
17- HBA pan.
18- CTBA pan.
19- KSCM pan
20- CBA -Lamka pan.
21- RC pan thugenna .
22- Zion Church pan.
23-AG Section 2 pan.

HIh atunga tengin Zomi mintawh BWA ah Full membership ngahna hangin lungdampihna lai leh lungdampihna thu tomno genna hongnei thei uh a, thangah huai mahmah hi. Kawlpi a Papi khat genna ah,” Tuni in Zomi te in Pasian thu tawh Laisiangtho tawi kawm sa in Leitungbup ah suahtakna angah ihi mawk ta hi” cihthu honggen a, ka ngaihsutsut leh akhial hetlo na himawk hi. Leitung gam 124 ah meeting kahtheihna thusun theihna leh thugen theihna ingah mawk pen suahtakna lianpi khat hitaktak kasa hi.

BWA KHAWMPI TE AH ZOMI TE KIHEL THEI TA DING:

Nidangin BWA khawmpi te ah Zomi te akihel sam hangin min tuamtuam tawh akihel ahihi, ahizongin tu in Zomi min mahmah tawh Leitungbup Biakna khawmpi ahi BWA te ah Zomi te eimin mahmah tawh khawmpi kisim thei ding , meeting kikah thei ta ding leh thu kisung thei ta ding ahih manin thangah huai phadeuh deuh hi.

Kum 2018- BWA Annual meeting ding – Switzeland khuapi Zurich hiding a, Kum 2020 BWA Congress munding Brazil gam hiding ahih manin tuamun ah Zomi ten lam hoih nono alak thei dingin ikuan hongkul ta ding hi. Leitungbup mai ah ihihna Identity kilak thei ta ding hongsuak ta hi.

KIDEMNA TUAMTUAM TE THUPI THEI LUA:

Tutung in kidemna nam tuamtuam oma, tua te pen:
Choir; Drama; Quartet; Duet; Solo leh Laisiangtho lotgen ahihi. Pawlpi 33 kipawlna sung pan in tampi tak mah kidem thei hi.

Kidemna tampi te lakah Choir pen – Akhatna- ZBCM of Tulsa ; Anihna ZACC of Seattle leh athumna ZCC of Louisville ten ngah uh hi. Siam kim thei mahmah uh a, matpia te bangin hamsa sa mahmah uh hi.

WORSHIP TEAM, MUSIC TEAM LEH MEDIA TE THUPI LUA:

Worship team ten ahun manlianlian in hong kipat pih uh a, thupi mahmah uh hi, music team te zong siam thei mahmah hi, media te zong kician mahmah hi. Akisam omhetlo in amau panmun tek ah zo mahmah uh hi.

MEETING ZONG NUAM MAHMAH HI.

Meeting kah pen mi 240 pha thei hi. Sum zui mizui hi.
Tutung in mailam kalsuanna dingin thupi mahmah ahi Constitution and Bylaw hoihtakin kikipsak a, lungkim huai mahmah hi. Laibu neu in kibawl dinga, asawtlo in kihawmkhia ding hi. I gama Laisiangtho sang 4 te Ks. 500,000 ta tawh mapanpihna neihdingin kigeel hi.

1- Kalay Theological College- KVBC neih.
2- Tedim Theological College- TBC neih.
3- Faith Baptist Bible College- EBC neih.
4- Bethel Bible College- AG neih.

Pasian nasem te thapiakna leh pilna adingin khaici tuhna danin akingaihsun ahihi.

BIAKINN LAMKHOPNA KINEI THEI :

Zomi te pen USA gamsungah pemta leh zin danin ingaihsutna koihnawnlo in innteek taktak ihihna ilahna dingin Biakinn ineih kul cih kimu khia hi, tuahangin biakinn lam khat a om leh ZBCA gamsung in pawlpi khat leh khat kipanpihna kinei in tutung in anihveina kipanpihna $60000( Tulsawm guk) pen Zomi Christian Church – Bowling Green te tungah kipia khia hi. Mailam ah zong hidan in biakinn lamkhopna neih zeldingin hoih kisa hi.

MAIKUM A 6 VEINA ZBCA KHAWMPI MUN LEH HUNDING.

Maikum a 6 veina ZBCA khawmpi mundingin Zomi Christian Church ,Bowling Green te muanna tawh iseh mah bangin hongsang uh a kilungdam mahmah hi, tutung in zin 900 bang pha ahih manin maikum teh atawmpen 1200 peuhmah phadingin kilam en hi. Ahun ding pen kipawlna tuamtuam tawh akituak lo thei pendingin ci- in July Nipi thumna dingin kikipsak hi.Hih July Nipi thumna pen mailam ah zattohtoh dingin kigeel hi.

PAWISIM IN VANLENG , MAWTAW TAWH KITUNG ZIAHZIAH:

Nidangin innlam ah pawi isim ciangin khe bekbek tawh ipai a, tuhun ciangin vanleng leh mawtaw tawh kipai ziahziah ta hi. Adiakin agam la mahmah ahi, Seattle,leh Portland panin vanleng tawh nai 5 bang kileng hita leh mi 60 kim bang pawi sim in hongleng mawk uh a, lamdang kisa mahmah hi.

ZBCA IN AMULKIM HUAI ZOMI TE SIHNA TE AH PANPIH:

Zomi sungah amulkim huai deuh a sihna te pen ZBCA in nungngak san lo in anuai abangin mapanpihna kinei hi.

1- Pa Stephen Kim – Des Moines -IA.- kikap lum- RC
2- Pa Piang – Dampi khua – Pata thum tuikia- AG
3- Bo Pau – Cikha ah innkang pata te kangtum.- Tuiphum.
4- Nu Lun -Tonsim- Mizogam ah innkang pi tute thum kang tum- Presbyterian.

All D PAHTAWINA MI 16 PIA KHIN.

ZBCA in Zomi te laipil ding adeih luatna in Kawlgam Zomi sunga All D ngah te pahtawina in Ks. 1,000,000( One million) mikhat tungah akipia pen tun mi 16 tungah Ks. 16,000,000 kipia khin ta hi. Mailam ah pilna lam ah mapan mahmah dingin kingaihsun hi.

LUNGDAMKOHNA :

Tutung in Topa ompihna nasia mahmah hi, Lasa dingin akisam ahi India pan Liani ( Moibiaklian) leh Kawlgam pan akisam ahi Kimboih( Dim Lam Kim ) te zong lasiam thei mahmah uh hi.

Speaker teng pen:

1- Rev.Langh Za Kap – GS,ZBCM.- Friday Nitak.
2- Rev.Dr.Neville Callam – GS, BWA – Saturday nitak.
3- Rev.Pau Khan Khai – GS,ZBCA- Sunday hunpi.

ZBCA pen Biakna kipawlna hi, ahizongin akisapna dungzui in Zogam leh Zomi te adingin mapang nuam den kipawlna ahihi.
ZBCA in gamleh minam kipawlna te tha pia in pahpih den hi. Akisam bangbangin mapan pih den hi.

ZBCA tha hongpia khempeuh te tungah kilungdam mahmah a, ZBCA tha pia zonailo te tungah zong thungetna kineihsak hi.

A 5 veina ZBCA khawmpi hongzawh pih Topa tungah lungdamna ikoh kawmin hongtung ding a 6 veina khawmpi imuak hi.

Topan Israel te amakaih bangin Zomi te hong makaih den tahen.

Lungdamna leh lungkimna tawh.