Malaysia ah Chin te khat temta tawh kidawtgawp
Malaysia gamsung aom Chin mikhat temta tawh kidawtgawp cih Meipi FB Group pan kizasawn hi. Tua akidawtgawp pen pasal, kum 23 aphakhinpan khat hi a, aminpen Ni Mang kici hi. Amahpen Kawlgam, Chin State sung aom Hakha, Malsawm khuapan kici hi.
Zanni Tuesday (06 December) ni in UN Card tettan tu (Card Renew) dingin apai ahihi. Lamkal ah zingsang 9:30am hunpawl in migilo te mi 4 in Motorcycle tawh phu uh a, akhe taihkha in tuksuk hi. Atuk khitciangin temtawh satgawp uhhi.
Apumpi tungah liamma mun 30 bang om ci uh a, ahi zongin silo in avengkiim aomte huhna tawh palik te’n zato napuakthei uh a, tulaitak zato ah kikem cih kiza hi. Akhe zong kitan ahih manin sittawh zopkulding ci uhhi.
Atuahsia te genkhiatna ah hihpen sumdeihman in, damiah taih cihtepawl tawh kibanglo a, Kawlgammi kahih manin hong bawlsia uh hiding cihi.
Hih thupiang tungtawn in Zomi te’nzong ngaihsut huai thu hongtam semsem hi. Tulaitak ihzakzaksa mahbang in Malaysia gammi te’n Kawlgammi te hong nuamtuam khollo uhhi. Rakhine State sung minamvai buaina hangin Rohingya ahilo, Kawlgammi limlim hongki muhdah a, hongki suamkhakding lauhuai mahmah ahih manin, kidop siamding thupi mahmah hi.
More: US in Japan te tui a tumtheilo vanleng puakna kisam
Khuasung navakciang inzong Kawlgammi nahihlam hongkitheihloh nadingin kidopsiam in. Kawlgammi nahihlam hongki theihsese lohhangin phamawhlozaw khading hi. Gammite lakah omdan, tatna, paudan kidopding thupi hi. ZD Sawltak #zomidaily Note: Amau Zomi kicilo uh a, Chin kici ahih manin, amau kicihdan in “Chin te khat” ci’n konggelh uh ahihi.
Comment piaknop aomleh...