Minam hihna (National Identity) i cih… ~ Tual Khan Suan

Minam hihna (National Identity) i cih… ~ Tual Khan Suan

Minam khat hihna (identity) ciaptehna dingin tehkakna a kineih theih hangin khat leh khat gawm pen nih (1+1=2) or bem leh bem gawm pen bem (0+0=0) cih tawh kiteh thei hetlo hi. Tua bang mah in Pasian in leitung ah Adam leh Eve bawl a hih manin a ma suan leh khak vive hi hangin minam kibang vive hi cih tawh gen leng, muhna kibang hetlo suak ding hi. Tua bek thamlo in a vom teng minam khat, a kang teng minam khat cih bangin a vom leh kang thu tawh zong kiciapteh theilo hi. Beh leh phung, khua leh tui bek en in zong kiciam teh theilo hi. Minam khat hi cin kiciapteh theihna ding thu khat bek en in i gen leh kicing khin zo lo hi.

Minam khat hihna (national identity) pen huang saupi nei a hihi. Tua mah bangin minam khat i identity ciaptehna dingin a hang (factors) tuamtuam om hi. Tua a hangte huam khatlo, a hih kei leh tua ahangte khat bek en in, minam khat i identity i ciapteh leh tua ciaptehna pen kicing zo hetlo ding hi. Minam khat i identity pen tua minamte i khotang nuntak zia (social life) zia tung pan in ki en a kiciamteh hi zaw hi.

Tua minamte i sisan khanggui, ngeina (cultures), zia leh tong (traditions), tenna mun leh mual (geographically location), pau (languages), nek leh tak zon zia leh mel leh puam kinai zia cih bang en in i tehkak ding thupi pen hi. Minam khat i neih minam hihna (national identity) a piangsak a hang (factors) te pen a tawntung in kikheng den a hih manin tua minamte zong khua hun tawh kituak in ngaihsutna kikheng den hi.

Gentehna khat ah, hun khat lai in tuhun a Zomi hi’ing a ci minam sung panin tuhun a minam dangte hong ciaptehna Chin/ Kuki cih pen kinial valval lua lo hi. Minam khat i identity dinga tehkakna a kilam dang sak a hang (factors) te khat, or a vek in a kikhek lamdang nan hangin tua bang lungsim kikhelna hong piang a hihi.

Minam khat i identity ciaptehna dingin tua minam hi’ing a citeng hi cih tawh ciamteh leng kilawm hetlo ding hi. Tua minam hi’ing a citeng pen a taktak in a mau a dingin minam hihna (national identity) a kul nawnlo a hi zaw hi. A mau pen tua minam min leh hihna a kiciamteh zo suak uh a hihi man hi. Minam hihna (National identity) pen a kimu theinate (identical) tawh ciapteh leh tehkak ding hi zaw a, feeling or emotion peuh tawh tehkak ding hilo zaw hi.

Gentehna in Kawlte khat pen Kawl sisan nei a hih manin a ma ut leh utloh thu tawh Kawl minam pan taikhia ziau theilo ding hi. (Hih mun ah gammi- citizenship leh nationality khen kul hi.) Sisan khanggui zui a minam ciaptehna tawh kileh bulh in, khankhiatna leh ngeina zuihna hangin minam ciaptehna zong a thupi khat a hihi. Kawl lak a suak, khangkhia a hih manin Kawlmi suah gawp hi cih kiza zelzel hi. Hih tawh kizui in gentehna dang khat ah, tulai tak a Kawl gam sungah i minam party Zomi Congress for Democracy (ZCD) party sum kempipa, Kumar bang a sisan khanggui zui in Zomi a hih loh hangin a khankhiatna leh a ngeina zuihte hangin Zomi in kiseh hi.

Tual Khan Suan @ Zomi Forum on Zomi Identity 2016

https://www.youtube.com/watch?v=Nx1vLKeSlMc

Minam khat i identity ciaptehna dingin “tua minam a ut teng” cih tawh khensak leng zong kikhial mahmah ding hi.“ A ut teng” cih tak teh a tangzai mahmah a bat hangin dai (fence) a um tawh kibangin neu cik a huam lam kithei khalo mawk hi. Kipawlna khatpeuh ah “ a ut teng” cih paulak in kipawlna phuh in, kidong taktak leng tua kipawlna a thapia mi seh-li-suah, seh-khat in “ ka ut man hi” hong ci khollo kha ding hi.

Kipawlna maimai sang a thupi zaw minam hihna (identity) pen “ a ut teng, a utlo teng” cih peuh tawh khen sat a, dai kaih ding hoihlo hi. Gentehna in Zomi bangin i minam min dingin ci ni cih hoih sakna tawh “ a ut teng, Zomi, a utlo teng Zomi hilo” cih tawh khenlian leng sisan khanggui kizom Zomi sisan nei sinsen pawlkhat pen a khinkhia suak lian hi. Pawlkhat in Zomi sisan a neih a, 100% Zomi a hih hangin Zomi kicih ding ut pah lo kha ding hi.

Kamphen kullo teng pen minam khat hi cih bulphuh ding minam khat i identity a ciap teh ding hi leueleu leng zong hamsa mahmham ding hi. Mihing pen nuntak zon zia a kibat loh bangin i khan khiat na mun kibanglo a hih manin kampau BEK bulphuh ding minam vai gen theih loh leuleu hi. Minam dang lak a khang khia te in a mau minam pau pen zang siamlo kha ding hi. Tua bangin minam dang zi/pasal neite sung pan a suak ta/tanu ten zong tua minam pau zang siam kimlo thei hi. Tua bang mite en kik leng lah a sisan uh pen a nu leh pa sisan mah nei lai veve uhhi.

Tua a hih teh, minam khat i identity pen a hang ( factors) khat bek en a gen ding hilo hi. Tual Khan Suan