63 Kumcin Zomi Nampi Ni (Political View)

63 Kumcin Zomi Nampi Ni (Political View)

Zomi Nampi Ni tungtaang Muhna
Zomi Nampi Ni tungtaang siamsin masate’ ziakmah-tawh Yangon, Mandalay Uni te-ah na-kibawl toto hihtuak-a, ahizong-in tuhun lian-a “Zomi” akici mite-bek hilo-in Kawlgam, Zogam Sehtual (Chin State) sungsuak mite kigawm-in kibawl hihtuak-hi. Kawlte-in Chin A-Tha-Nae hong cihsak uh-a, Kawlte’ phuak mahhiam, kuate’ phuak-hiam “Chin National Day” ci-in dialkhaai (banner) suang-uh hihtuak-hi.

Hih-tawh kisai 1952-1988 sungteng buaina omlo-in Nampi Ni kibawl tozeel kici-hi. 1988 Kawlgam milip sosaanna hongpian nung-ah tua Nampi Ni angei bang-in akibawlzom theinawnlo dinmun hongtunna Kawlgam Mualtungmi teng-in theikim ciat-hi. 1990 nungsiah siahuai zawtham-a, Mualtungmi kuamah-in Nampi Ni bawlding Kawlgam ukte-in khaamcip uhhi. Zogam ngial bang-ah kinaakbawl hetlo-hi. Tu-a gampua atunteh huumpi-neelkaai bang-a apau giapgiap milian misiam tampite-pen hia-hun laai-a, “Kalai, kalai, tua Nampi Ni peuhmah bawl zenzen kei-vuau, hong-uk kumpite’ thumang hiit-hiat peuh-vua! ” acite pawlkhat omding-in I-seh thei-hi. Ahizong-in angam ahihkeileh ahaiipih pawlkhat-in bawl veve uh-hi.

1996 kum-in Kawlpi College-ah athu-in Zomi Nampi Ni daankhat kibawl-a, dialkhaai tung-ah “Chin A-Myo-Tha Nae” ci-in kigelh-a, Mikaang laai-tawh “Chin National Day” ci-in kigelh-hi. Thugen lasakna-tawh kibawl-a, tua-hun inbel theikeng; tu-a Zomi akici mite tuahun-a makaai lam-ah kitamzaw (Laimi akici mite’ sang-in tamzaw kacihna)-hi.

Tua hunlaai-in tuabang-in Chin State sung-a minam teng-in akipawl theihna ahangpen (kei’ muhna-ah):

Chin mintawh/ Zomi mintawh ahihkeileh Laimi mintawh hamphatna genthamding hongluang naailo ahihman-in naakpi-a kitoknawina leh kitukalhna om naailo ahihman hikha dinghi ci-in ka-ummawh mahmah-hi, banghanghiam cihleh pulehpate-in “Zo Zum”acihcih-uh Khuapi (Capital) vaai-tawh kisai lobuang Kawlgam-ukte-in Chin State hitaleh Zogam hitaleh puahna leh domsaangna neilo-uh ahihman-in kitot, ki-elna leh kibuaina piang khollo-hi. Uinote ahihkeileh voknote an I-piak laaitak-in kiphuul ziahziah, ki-piik ziahziah uh-a, anpiak ma leh anpiak khitnung-ah kiphuul nawnlo uhhi, tua-tawh mitkha-in kiseh thei-hi.

Tuabang sungpan-in CNF ci-in apatciil-in Chin State sung-a minam khempeuh ahuamnuam (athu-in) Laimi pawlkhat’ makaihna-tawh hongpiang-a, amau’ ngiimna thusuah (statement of purpose)-tawh akilehbulh-in hong gamtat ciang-in Zomi-hiam Chin-hiam khatpeuh hihna-tawh meetna genloh adiak-in Zomi kicihna ziak-in supna lianpi CNF/A te-in hong lawh-uh ahihman-in tua-in Nampi Ni bawlkhawm cih genloh amau’ cihcih Chin-pen minam min ahihlohna, pulehpate-in la-tawh thu-tawh Zomi hihna apulaaksa thute bulmat kiik-in Zomi Identity kankiik, kalkhia kiik-in Zomi-ah khauhpai theihna ding-in thasaanna hongpiang ciauciau pan-hi.

Tua thamlo-in, Nampi Ni I-bawlkhoppih Laimi te-in UNHCR lamsang-a humna hongpiathei kipawlna lam-ah “Kawlgam ukte anial malaakna (Anti-Burmese Government Movement)” min-tawh upaphual luutna leh nenniamthuak (oppressed) namneu hihna paulam-in tua Zomi akicite’ sang-in madawkzaw-uh ahihman-in gambelhna lam-ah hamphatna naakngahzaw uh-a, tua ciang-in Zomi akicite nangawn naakpi-in hong deiidan-uh, “Chin” cih kiukiau-pen amau’-abek bang-in buplaak-uh (Chin I-utman hilo hitaleh) Chin State sungsuak minamte’ ading-a hamphatna leh noptuamna khempeuh ahihtheihzah-in la uh-a, hihpen politics kimawlna-ah muiibunh zaw-uh cihna ahihi.

Politics cihpen leitung buppi-a minam khempeuh akikheelna, khanna, kiamna abangkim-pen minam tuamtuamte’ politics kimawlna tungtawn-a apiang vive ahihi. Itna leh thukhualna-tawh akisuun zolna-tawh namneu valhtumna malaakzia(assimilation policy) vive-tawh leitung minam khempeuh akalsuan ahihi. Hihte nung-ah, kumzalom 21 nungsang gamlian (gamlian I-cihte hia hunpekpek-a assimilation policy azatsiam mahmahte ahihi) te-in “namdeiina (racism)” naakpi-in do (ado bang-in mapang) uh-a, ahoihkhomkhat ciangpen koikoi-ah namneu hihtheihnate (minority rights) kikhung kim-hi (Kawlgam-ah om naailo himahleh).

Hihbang-a asia khinsa, nidang-a Nampi Ni abawlkhawm, alungdamkhawm, alaamkhawm khinsa gamsehtual khat sung-a minamte aneenneen, akeekee-in kithehzaak-in kikhenthaang cihpen politics kimawl mite’ ziak ahihi. Politics kimawl cihciang-in ama’ namneu khatbek-in adangte khengding, ama’ nam-in phungcing-in lianding, namdang’ tungtuang theiding cihte-tawh akitawsawn lungsim leh sepkhiatna ahihi.

Zogam I-cihcih Chin State (Kawlgam lamkaai) sung-a minam akihuamtuam kiukiau-pen hihbang-in CNF/A te’ kalsuanna- leh amau’ ukzawh Laimite’ ziak-in akibawlkhawm ngeizeel khinsa Nampi Ni-pen kibawlkhawm nawnlo-a, Zomite-in “Chin National Day-pen Zomi Nampi Ni” acih mahbang-in Laimite-in “Laimi Phunpi Ni” ci-in tua-bektawh pha lo-in, “No Zomite-in Chin pau theikei uhteh, ko Chin te-in kampheen akicing nei-ung” ci-a akithuzawh ngiat ding-in numei naupang dongtak thunzo uhhi.

Tua ahihman-in ataktak-in “Chin” mintawh kalsuanpih ding-a Laimite-in ateel Zomi a-omte “hong lokgawp zo-kei nanteh, hong buaisak zokei nanteh” acihteng ahihi. Kawlgam ukte-in Mualtungmi te’ lakpan “honglok zo-kei nanteh” acihtengbek aza khang saksak uh-a, “hihpa kidop kuulsim inciai” acihte mawhna neilo hiphialmahleh tawlnga-sak ziauziau-hi. Tua-tawh akibanglian mah-in Laimite’ sung-ah amapang Zomi peuhmah-in Laimite’ policy lokzo ngeingei lo-a, lokzo ngeilo dinghi.

Hihbang political contest sung-ah Zomite naakpi-in pilvaang mahmahding kisam-hi. “I- thiam tuk, I- meel tha tuk” cihciang maimai-tawh Vankul bang-in laampah pualpual, paupah buatbuat cihte kidop hunlua ta-hi. Gentehna-in Zomite-in Nampi Ni bawl ding-in avaaihawmna sung-ah Laimi palaai sehlo pi-in (seh lehangzong hongpai loding hi) tua cialpi-ah Laimite honglaam kaangkaangleh ama’ mipihte naakpi-in sinso-in heh mahmahding uhhi. Tuamah bang-in Nampi Ni bawlna ding-in palai hongsaploh kawmkaal-ah Zolaam-peuh, Zola-peuh va laam-in va sa lehang “gualzo” kisa mahmah-in nuui hiuhiau lelding uh-a, ngaihsutna anei Zomi pawlkhat-in nasa mahmahding uhhi.

Khangthak Zomite-in naakpi-in ngaihsutding ahihi. Zomi Nampi Ni asiim bang-in I-paina munpen Laimi Phunpi Ni ana-hih khaakding kidop-huai mahmah-hi. Laimi Phunpi Ni-ah nava kihel man-in bangmah apiang ding-in umlo khading himah lecin, political contest-ah amaute-in hongzawh nading-in ava ki-ap/ ava-kipumpiak nahi gige-a, tualam na-theih keilehbel na’ minam inzong bangmah-a hongmantheih lohding khat nahi-lel dinghi. Hihpen political view/opinion hi.

Thudang khat-ah;
Zomi Nampi Ni-pen Pasian’ hongpiak, athupi mahmah khat bang-in zekbang-a laakding khangthak Zomi sung-ah kilawm taktak khollo dinghi. Hong kipatna-pen zonet sung-a hong kisuut tungtawn-in 1948 pan-a kipan hihtuak ci-photni! Ukpi thuneihna beina aci-tawh Ukpi beina aci-tawh Democracy kipatna aci-tawh saandaan om diudeu khading-a, avekpi-in ahi vive-hi. Tua sung-ah Capt. Mang Tung Nung-in Zomi Nampi Ni (banner: Chin National Day) akibawlna khat-ah (alaaibu Zo Suan; Canada, in neilaai khading) hun-a athugenna-ah; Za Hre tepawl-in “Chin State Day” cihding hizaw, Kawlgam sung-a nampi khat-a kigawmkhawm kimlaai Nampi Ni tuambawlbawl lehang kipumkhatna omlo dinghi” acihpen hihbang-in dawnna-tawh suut-hi;

“tuabang ngaihsutna aneite ui-bang ahihi. Kawlgam dialpeii (flag) tung-a aksi tang 5 lakpan-in tang 1 abotkhia ahihi. Union of Burma ci-a manpi hualkhat akithutuah nading-in namneu tuamtuamte’ sung-ah kithutuahna omkeileh bangci union piangthei ngeiding ahihiam?” ci-in ui-ko, ak-ko-in Capt. Nung-in ko dikdek-hi. Cihnopna-ah, Kawlgam en baanzo nawnkei phot-hang, Chin State buppi genloh Tedim, Tonzaang Khuapi sehteng nangawn I-huamzo laai-hiam? Lamka lam-a Paite, Simte, Vaaiphei cihte nangawn akihuam zolo ngaihsutna-tawh:
“Zomi Minam Khat” cihding sang-in Tedim Chin ahihkeileh Tedimmi, Tedimpau cihte peuhtawh I-kalsuan ciang-in I-huamna toii tektek-a, nidang ciang-in Dim Chin, Saizaang Chin, Losau Chin, Teizaang, Sihzaang Chin, Paite Chin cihbang-a I-lawhnop khaakding dahhuai mahmah-hi.

Abeisa 2002 kum, January 1 nitaak-in Malaysia pan-in Zonet sung-ah I- Nampi Ni ka pahtawi na-in “Sweet February” thuluu-tawh laaikhaak ka-guanghi. Tua hun-in Zomi min sitset sawmvaal bang-in “Lawm-aw, Chin National Day” bekmah kicizaw ve-aw, Zomi cihcihpen kuamah-in hong saanpih keiveh” hongci uhhi. Tuahun-a amaute’ genpen “Tedim Tonzaang longal-in Zomi kicihding utkei” aci hi-a, azia-om (reasonable) mahmah-hi. Ahizong-in asia-huai mahmah-ah; tuhun-in Tedim Khuapiseh leh Tonzaang Khuapiseh mahmah pan-a apiang mite pawlkhat-in “Zomi” kicihding sang-in “Tedim Chin/ Chin” kicihding uutzaw-a akici-ngiat hong-om takciang-in Laimite’ political trap sung-ah a-awkcip khinta hi-a, I-kaihkhiat sawmleh hongdo lianlianding cihna ahihi.

Tuahi-a, kumzalom 21 sung-ah abeisa-a mite kimawlna sung-ah sukzeel, tozeel cihbang-a I-dinna pan-in Zomi-ah dingkip lehang-a, taangtawng pekpek pan-a pulehpate’ neih tohtoh Khuado Cialpite, Sialsawmte leh Sawmzuu, Pawlzuu cihte minam kithuahkhopna-in ahoihpen leh alawp-huaipen ding-in zanghzeel lehang-a, Zomi ngiat-in atuambawlzo I-hihngap keileh Laimite’ organised Laimi Phunpi Ni khawng-ah va-kigolh keilehang Zo Tuunnu laambang apaak zawdiam ci-in Zomi Nampi Ni thupuak hihteng kahong khaak-hi!

Zokhai
Melbourne
Australia