Interview with Rev. Gin Khan Nang

Interview with Rev. Gin Khan Nang

Vaphual.net in khasim in interview/holimna khat beek kisuah den sawm hi. Hih January 2010 kha Interview pen Rev GK Nang ZoNet writer of the Year 2009 tawh ahihi. Mailam ah hih nu, hih pa hong interview in or ke’n hong interview ning na cih leh zong kingah mahmah ding hi! Suggestion na neih leh comment ah hong pia in.

Amasa in Zonet Writer Award 2009 na ngah kong lungdam pih mahmah hi.

GK Nang-Vaphual.netVaphual: Hehpihna tawh na tangthu tomkim nong gen thei ding hiam? (Na min, pianna, sangkahna, nasepna, leh innkuan, zi-le-ta…etc)

Rev GK Nang: Vaphualpu in hih banga holimna hun nong vaihawm theih pen nakpi takin lungdam ing. Ka min pen Gin Khan Nang hi a, Mizogamah Ginkhannanga ci-in hong gelhsak uh ahih mani tua ka deih kei a, Tan X ka laivuan ding ciangin G. K. Nang ci-in ka gelh hi. Murlen khua Miozgamah Janpan gal venh kumin 1945? (ka nu gen dan) ka piang hi. Mizogamah Tan 6 ciang ka zawh ciangin Lamka panin Tan X ka zo hi. Tan X ka zawh ciangin Pasian nasem dingin ka ki-ap a, CBA Pawlpi in Lai Siangtho sin dingin 1971 kumin hong sawl hi. Tua panin Pawlpi sungah a semsuak ka hi hi. Kum 1978 kumin Lia Ning Khan Ciin (Tangnuam) tawh kigawmin ta 3 ka nei uh a, kum 1994 kumin hong nusiat ciangin 1995 kumin Lia Cing Za Man (New Lamka) tawh ka kiteng leuleu uh hi. Amah tawh tanu 2 ka nei uh hi. Tua hi a, Ta 5 leh tu 4 ka nei hi. Nasepna lam panin Manipur CBA sungah kum 20 ka sem a, Mizogam ZBC sungah kum 10 ka sep khiat ciangin 2005 kumin pensen ka la hi.

Vaphual: Na laigelhte ZoNet (Zomi Yahoo! Groups) ah tampi in ki sim in simnop kisa thei mahmah hi. Zonet Writer Award 2009 na ngah ciang in “a kilawm pen hi mah ei” ka na ci hi. Nang bangci’n na kingaihsun a? Zolai zong tukum kum 100 cing ta hi. Nang muhna ah Zolai dinmun bang ci-in na mu hiam?

Rev GK Nang:Jan 15 ni internet ka sim ciangin Zonet makaite in Award ngah dingte a pulakna uh ka mu a, a masa penah ka min a om ciangin “Aw kei hong cingsak uh hi maw!” ka ci hi. Kei bel kilamen khol keng. Lawmte a ngah dinga kilawm tampi tak om ka sa a, lai gelh siam tampi tak zong om cih ka thei hi. Ahi zongin Net ah laigelh dingin hun neih kisam a, internet neih zong kisam ahih manin a gelh nuam leh a gelh thei ding tampi takin gelh khuan ngah lo hi ci-in ka phawk hi. Result ka theih phetin Shillonga ka lawmnu Maman ka hopih pah a, ka hilh leh “Aw lungdam huai ve leh” hong ci hi. (2008 kum Award ngah Dr. Hau Za Cin zong Murlen piang hi citciat se hi)

Zolai tawh kisai-in laibu i neih masak penpen 1913 kumin kiciamteh ahih manin 2013 ciangin Zolai tawh laibu i neih kum 100 a cing ding hi. Lai (ABC) hong bawlsak Rev.Dr. J.H. Cope Tedim hong tun kum 100 cing ta hi. Kim khat in hih ma-in lai kinei hi ci uh hi. Pu Pau Cin Hau lai pen 1902 kumin maang (vision) tawh a ngah hi a, kipuah toto-in a nunung pen 1931 kumin kipuah a, tua ban kipuah nawn lo hi. Tua pen Mualtung thuilhna kikhet kum hi. Pu Pau Cin Hau lai tawh Mualtung thuhilhna sim loh lai kigelh kei bang ka mu kha kei hi. Tua ahih manin Rev. Cope lai bawl pen mah a kician pen suak hi.

Lai pen a kipuah toto tek hi. Mizote leh kianga minam khangto i cihten zong puahto tek uh hi. Zolai pen kammal (pronoun) pawl khat gelhzia a kibat kim loh hangin a pumpi i et ciangin hoih sa ing. Tang mahmah hi. Ahi zongin India leh Kawlgam Zomite in a kician zaw-in laigelhzia a kibang nei thei lehang tu sangin nakpi-in khangto zaw lai dingin um ing. Tuma kum 20 lai sangin nakpi takin lai lamah kipumkhatna om zaw-in mu ing. Hih bangin i pai toh zel leh a sawt loin India leh Kawlgam Zomite in lai kibang, ABC kibang kizang thei dingin um ing.

Vaphual: Zolai hi in, lai lam nasepna ah Zomite in bang haksatnate tuak uh a, hih haksatnate bang ci leh pelh thei ding uh hiam? Bang ci leh laibu bawl leh hawm ki hatzaw ding hiam?

Rev GK Nang:Lai lamah i haksatna pen nam nihin gen theih sa ing. Khatna-ah tenna gam kibat lohna leh biakna Pawlpi tuamtuam hangin lailamah zong haksatna om hi-in thei ing. Cih nopna-ah Zomite a tamzaw Kawlgamah omin, pawl khat India-ah omin, i tenna gam tawh kituakin paizia khat tek kinei hi. Kikawmna leh thu kizakna haksa ahih manin lai lam nasepna in zong thuak hi. Gamkhat, leitang khatah om hi lehang tu-a sangin lai lamah kihat zaw dingin um ing. Tua mah bangin Pawlpi tuamtuamah i kikhen ciangin lai lam nasepna in nakpi takin thuak hi. Minam in a thuak mah bangin lai in zong thuak hi ci-in mu ing. Bang hang hiam cih leh Pawlpi khat in laibu i bawl hangin a lei ding tam om zo lo, pawl dang in zatpih lo, laibu kikhawng lo hi mawk hi. Laibu a kibawl ciangin zong a hawmkhiatna lamah haksatna om pah hi. Ei pawlpi sung pana kibawlte kilei nuam deuh, kithupisak deuh cih dan kinei lai-in mu ing.

Tua ahih manin hihte i pelh theihna dingin Pawlpi deidan om lo Lai lam kipawlna tangzai mahmah khat kinei hen la, Publishing Company bang nei zo lehang deih huai sa ing. Tua ciangin kum khat sunga laibu kibawl sung panin a hoih pen kiteel khia hen la, letsong kibawl zo leh laibu tam kinei baih pen dingin um ing. Zonetpute in “Writer of the Year” hong bawl dan mahin e. Tua in thalawpna nakpi takin piangsak dingin um ing.

Vaphual: Lai tawh kisai I gen ciang in laibu, magazine leh newspaperte bek hilo a, tuhun ciang in internet technology tawh nasep theih ding tam mahmah ta in, lai lam nasep zong baih sak tuam mahmah hi. Zomite in hih new technology te zang in lai lam ah bang ci sep theih ding i hiam? Bang hang in hih internet technology pen lai lam khantohna ding in kisam/lo hiam?

Rev GK Nang:Tu lai new technology zat siam ding pen thupi mahmah hi. Ahi zongin i haksatna khatah gam khangto gama omte sim loh buang, India leh Kawlgam a inn lam omte adingin a van neih haksa-in internet mahmah zong kisap zo lo ahih manin deih zahin hat zo nai lo hi ci-in ngaihsun ing. A kizang siam lo leh a kideih lo zong hi ci nai kei ni, a kizang ban taktak nai lo hi cilehang man pen kha dingin um ing. Zang zo lehang tuhun ciangin library nangawn laibu lei kisam nawn loin internet panin kingah thei ta hi. Tua ahih manin internet khawng deih zahzahin -US gam khawng mah bangin i zat theih hun ciangin nuam mahmah ta ding hi. Tutung zong US ka om laitak hi kei leh hih award ka ngah kei ding hi. India panin internet deih bangin kizang zo lo ahih ciangin lampi om vet lo hi. Tua banah new technology lam a phattuampih thei dingin no khangno lam lungsim hatte mah in hong hanciam le-uh teh piang thei ding hi. Upat khit ciangin i siamna zong limit ta mawk hi.

Vaphual: Lai pen minam khantohna tehna in ki zang thei a, Zomite bang ciang tung in na ngaihsun hiam?

Rev GK Nang:Tu ciangciang kei muhna panin Zomite pen i nuntakna ding tawh kibuai lai phot hi-in mu ing. Nuntakna ding, sangkahna ding, nikten puansilh ding tawh kibuai lai ahih manin lai gelh ding, laibu lei ding cih lam pen lungsimah lutzo nai lo danin mu ing. 2009 kum sung Laibu kibawl bang ka ngaihsut ciangin Siamsin Magazine khawng cih loh buang laibu gina kibawl leh a kikhen kei bang tam thei lo mai hing. Tua ahih manin niam mahmah lai phot cihna hi lo ding hia.

Vaphual: Tuhun leitung ah English mah thupi in nekzonna zong cing pen cih I thei tek hi. Bang hang in Zolai kisam hi ci lailai ding I hi hiam? Khangthakte’n Zolai a kisam uh hiam?

Rev GK Nang:Mikang lai pen a kisam mahmah khat hi mah. Pau zong tampi siam ding hoih hi. Ahi zongin pianpih pau leh lai vala kisam zaw om thei dingin ka ngaihsun kei hi. Mikang pau siam a, lai a theite semsem in pianpih pau leh lai siam ding kisam zaw kan kha dingin um ing. Kei bang pen English tawh ka gelhsiam loh man zong hi ding a, ahi zongin laibu ka bawl ding ciangin Zolai mah tawh gelh ding bek ka lungsimah om hi. Bang hang hiam cih leh mi nautang in sim thei hen la, phattuampih leh cih ka deihna hi tawntung hi. English hi leh nam dangte tawh zat khop theih a, hoih mahmah hi. Ahi zongin ei sung i et ciangin Zolai mah kisam sa lai ing. Mipi theih theih ding leh phattuampih theih ding ngaihsut huai sa ing. English tawh kigelh laibu zong kisam hang, Zolai a gelh zong tampi i neih ding kisam sa ing.

Vaphual: Vaphual – Zomi News & Online Magazine min in, hun nong piak man in lungdam kong ko hi.

Rev GK Nang: Kei zong lungdam ing ei. Topa Thupha. Source: Vaphua.net