2015 kum ZCD gualzawh lungdampihna

2015 kum ZCD gualzawh lungdampihna

Dear zahtaak ZCD makaite aw,
I lamet leh I ngaklah mahmah 2015kum, kiteelna ah ZCD in Tedim ah mun 3, Tonzang ah mun 3 ong ngah uh ahih manin I lungdampih mahmah hi. ZCD makaite’ ki piakkhiatna, khangnote tangzang takin nasem in makaite a panpihna, tua teng hangin gualzawhna a ngah hi cih pen nial theihloh hi. A kipia khia khempeuh tungah zahtaakna i pia hi. Teelcing nailo ahi Tedim leh Tonzang , Hakha leh Kalay pan ZCD candidate Pu leh Pi khempeuh tungah zong I lungdam mahmah hi. Mailam ah mun khempeuh ah gualzawh nangin hanciam kul lai hi cih nasep maban a nei ihih na zong mangngilh kei ni.

USDP( Galkap panpih party) in lel dipdep bek thamlo in upmawhna zah sangin NLD in mun tampi ah ong zo mawk uh hi. Chin State enleng CNDP thahatna dingin akigen Hakha-Thantlang-Matupi-Kanpetlet-Paletwa, USDP thahatna Mindat, CPP thahatna Falam, cih tengah NLD in ong zo mawk hi. 2010kum USDP’ hatna Tedim, Tonzang ah ZCD in 6, USDP in 2 leh NLD in 1 cih bang ong hi dimdiam hi.

Bangmah buaina omlo in, thuman taktawh apai suak leh 2016kum March kha bei April aa kipan NLD in Kawlgam kumpi ong sem ding hi taktak ta hi. A kician mahmah khin hizaw in, tu laitak aa kumpi/Galkap makaiten phaltak in a tutna awn ding maw awnlo ding cih tung bekah kinga hita hi. Mipi in sepding teng kisem khin hiphot in President Thein Sein’ kalsuanna etcik ding bek hiphot ta hi. Kawlgam gamvai thutheite khempeuh phial in bel “ lauhuai lualo ding hi, nungkik nawnlo ding hi” ci kim phial uh hi. Ih Gam ah zingni thak ong suak dingin ong kipan ta hi. Nak lungdam mahmah hang.

Chin State ah zong NLD in MP 24 lakah 12 ngah cih danin I thei hi. State Government bel NLD in ong makai ding hi limlim phot hi. Union President in State Chief Minister(CM) ding pen direct in guang ding ahih manin NLD mahin Chief Minister sem ding hi. Union President I a guang, CM dingpen State Paliament in kipsak ding ahi hi. Hih munah Party kibatloh manin “deihlo” cih theih omlo , mawk deihloh cih om theilo in, I deihlohna a thu tawh genkul aa, a thu pen 2008 Contituition sunga om CM hihtheihna ding thute tawh a kituak kei leh bek deihlohna pulak thei ding cih hipan hi. Tua ahih manin Union President I a guang CM penhmah a kikip sak hizaw hamtang hi. NLD in MP 12 (50%) lian bek ahih phial hangin State Government dingin dingthei veve hi. A kisam bulpi pen CM hi in, CM in ama deihteng or a dang Party pan amau deih khat peuhpeuh tawh State kumpi dingin ong ding ding hi.

NLD leh ZCD khut kilen in I kalsuan khop theih nak leh Zogam ah ei deihna bangin thu ong luang ding ahih manin lungdam mahmah hang. USDP leh Galkap MP te a tangthei vetlo ding hiphot uh hi. A beisa aa NLD leh ZNC/ZCD a din khopna a nasep khopna te en leng mailam ah kipawlkhop theihloh nang omlo in ki kalsuan khawm thei mahmah ding hi. Union Government ah ahi zongin State Government ah ahi zongin panmun hoih zong ngah zo kha hamtang dingin lamen hang. NLD tawh kipawl khopna hangin I ngah ding panmunte hoihtak in I zatsiam ding pen ong thupi mahmah ding hi.

ZCD, mipi’ ong muan mah bangin amuantaak ihih ding ong thupi penpen ding hi. NLD zong I kipawlpih bek hi in, ei aa hilo leh ei makaih hilo ahihna pen I tel mahmah ding kisam hi. NLD Gambup makai hita leh NLD State makai pen Ei ihih lohlam zong I ki theisak kik nuam hi. Ei lampan Politics ahih manin i kidem zekzek zong ong kul veve ding hi. Mailam ah ei mun khempeuh zong ong deihgawh veve kha ding uh hi. Tua bek hilo amau NLD Party khutsung thuneihna om ahih manin hamphatna khat aom ding teh amau Party zawhna mun mah masak zaw kha hamtang ding uh hi. Khial kici thei tuanlo ding hi. Tua bang hunteh lungduai takleh nampi lungsim tak tawh na ma ong phu veve un. Party khat leh khat ki nawtna a om leh zong kimawl siam sawm ni.

Ih lelh le zong khasia sekei ni. Na nungah mipi om hi ung. Thanem lo ding hi hang. Sitnipu bang om kei leh mun khempeuh ah ong dem veve ding uh hi. Ei deihna tawh ong kalsuan hetlo dinguh ahih manin I pilvang ding thupi hi. Tedim leh Tonzang simloh pen NLD cihtheih ahih manin nasepna, minam vai, gamvai khat peuhpeuh ah I pilvang ding thupi mahmah ding hi. Ih zat siam kei aa, ih zat theih keileh, ih ki pawl siamkei leh, NLD zawhna pen ei aa dingin supna lianpi, guallelh lianpi ah ong tun baih zaw kha mai thei ding hi.(Kawlgam bup NLD makaipi ten State NLD te, tungah (or) Union Kumpi NLD in State Kumpi NLD tungah septheihna thuneihna tampi pia kha ding hi)

ZCD in muanna taktawh I ngah,Mipi’ ong piak panmun lianpi te leh I neih thuneihna te zangsiam ni. Mailam khangthak Zomi khempeuh aa dingin, Chin State bup leh Kawlgam bup ah, ong pai ding kum 5 sungin, Political Foundation hoih mahmah te ong phut in khaici manphate nong vawh na dingun muanna leh zahtaakna lianpi tawh kong thum hi.

Lungdam

Khup Lian Thang