“Zosuan Tuailai Khawmpi 2 veina 2015 – Abucing khantohna ah”

Zomi Innkuan Singapore (ZIS), Malaysia aa om Zomite (adiak in ZAM), Kawlgam aa om ZYA (Tedim, Kawlpi, Ygn), ZOLLS leh Lamka lam aa makai upapite kamkupna, GZA Makaipite thukimpihna tawh, ong tungding 2015 April kha 23-26 sung in Zosuan Tuailai Khawmpi a 2 veina Tedim khuapi mah ah bawl kikding ong khensat uhhi.

Tua Khawmpi tawh kituak in kalsuanna lianpi honkhat thuah ding hihang:

1. April 23-26, 2015 sung
Zosuan Tuailai Khawmpi-2 veina, Tedim, 2015 – Thusunna, thukikupna, khensatna taangkona cihte nasia tak in kinei ding aa Kawlgam, India gam leh mun tuamtuam pan zong ong kihel theikha ding kilam enhi.

2. April 13-26. 2014 sung
Tuhun kalsuanzia, khantohzia tawh kizui in manglai siamding thupi aa, siam nading in uuk ding thupi masa ahihna tawh kizui in, Lamka lam pan aa university sangnaupangte ZOLLS makaihna tawh manglai hilhding ong kuansuk ding uhhi. Hihpen 2013 Tuailai Khawmpi aa maa patsa khatzong ahihi. Mangla tom nono aa kipan kihona tom nono ong hilhding aa Tedim khuapi sung ah manglai tuuk tungsak ding hihang. Adiak in ZIS, ZOLLS leh inntek ZYA in ong makaih, ong vaihawm ding uhhi.

3. ZTK-2013 pek pan aa ih sawmsawm akhuakhua aa ZYA phuhding tutung in gina tak ding khia zo lehang hoih dinghi.

Tualo tawh khangno sung thukizaakna, kupumkhatna omtheilo ahihman in minamvai, gamvai mipi lam pan a vaandingin ZYA leh khangno kipawlna kisam hihang. I minam sung thusia lasia, thupha lapha ong van ding khangnote i kisamhi.

Hihpen khangno kici khempeuh mawhpuak hipah aa adiakdiak in akiphutsa Kawlpi, Tedim, Ygn ZYAte in ong makaih, ong vaan, lam ong pii ding uhhi.

4. Tupeng suih kidemna
Khangno atamzaw in i uuk leh i kivak ahi tuukpeng kidemna ah, Lamka, Mizoram, Kawlzang (ZOFA), Tedim, Tonzang, Malaysia+Singapore teamte ong kihel ding min piaksa hiphot aa, tualo Ygn pan zong ong kithawi nuam uh cih kiza hi. Hihpen mipi lungsimla, mipi’ muhnop, mipi’ lawp kimawlna ahihman in khangnote kithutuahna, kimel theihna khangsak mahmah ding lam en hang. Hihmun ah Lamka Fooball Associationte, ZOFA, OM Sports Link leh ZAM (Malaysia-KL) in ong vaihawm, ong makaih, ong geel ding uhhi. Cup hoih mahmah(Crystal), medal hoih mahmah Malaysia pan ong khaak ding uhhi.

5. Kikup, kimuh thukhensat lian a om nailoh hang, ZZomi Artist Association – ZAA (Lamka) ong makai in ii Zomi lasiam teng ong kisutuah uh henla, minam kalsuanna ah a siamnate uh ong sungkhia le uh lunggulh hihang.

6. Tu’n i lunggulh mahmah leh a neihhuai mahmah khat in, leitung pianzawh cikmah aa i neih ngeinailoh Zomi Numeite Khawmpi ahihi. Hih hunsung mah tawh kitiuak in nei zo in Zomi Numei te’n a lungsim uh ong sungkhia le uh i lunggulh hi. Tuading pen vailian leh i neihngei nailoh ahihman in GZA lamlahna tawh Zonu’ Tongluan, ZAM (Malaysia-KL) leh Khawmpi i bawl nading Tungtuang Khua in vai khempeuh ong makaih, ong vaihawm, ong sem khia ding uhhi. Hih Khawmpi bel i bawl masakna ahihman in Khawmpi ong siim khempeuh anvaak zawh nading kihanciam nuam aa Malaysia aa om i mipihte, i makaite kimuanghi.

Khawmpi bawlna munding Tungtuang ihihzawh kei leh Tungzang hihamtang ding ci sese (Sia Zambawi) hi.

Hihhun sungteng adiakdiak in ii GZA Makaipi 6 teng ong kim hamtang nading uh i Thungetna ahihi.

A Thupi mahmah, i zat khialh den khat in:
Hihbang vaihawmna khempeuh pen eima minam vai ahihman in hihsung aa kihel khempeuh kuamah sum tawh cial, lamsap kipia cihbang kizang loding aa ei leh ei i minam aa ding kipiak khiatna, i kihel khaak a kipah huai hizaw ahihlam milip in i tel ding kisamhi. (Minam vai kalsuanna ah kua mah in sum thalawhna in na gelkhol het loding hihang)

Zin leh lengdo ding khempeuh innteek ZYA teleh khangno kipawlna tuamtuamte hiding hi.

Abeisa 2013 ZTK lai in gampua pan huhna mimal in ong piakhia Pa Thang Tul Mung, Rev Mang Khan Khup (Canada) Rev Zam King Mang, Pu Khual Za Kham(Portland), Pa Pum Za Chin (Norway), gamsung pan Rev Dr Do Suan Mung, Rev Dr Go Cin Zam, Rec Dr Jacob Mung, Pa Mang Piang, Pa Go Lian Tuang, Pa Cin Khua Pau cihte tung lungdam ikoh kawm in tutung zong kipawlna ahi aa, mimal ahizongin i minam vai ah i kihel nopleh kihel thei hihang cihzong ong taangko kawmpah kahihi.

Hihtawh kisai in ZIS in mimal khakhat S$50 ta kha 6 sung, ZAM makaihna tawh Malaysia aa om i mipihte in mikhat khakhat 0.50 sen (mi 27,000) ta kha 6 sung mah sum don kipanta hi.

Hakha Khuapi ah ZOFA, Tedim Khuapi ah ZOsuan

Zomi kalsuanna ong piicing semsem kasahi.

I kihel theih bangbang ah thasial hetlo in maapang ciatni.

Vai khempeuh telnop a omleh ZIS Makaipi Dr Cin, Thuvanpi Khawmlay, Khangno makai Dr Lun tetung kidong theihi.

Hang Khan Lian
Block 646#13-115
Jalan Tenaga
Singapore 410646