Leitung thumna panin minam aa ding ~ Thang Siangh

Leitung thumna panin minam aa ding ~ Thang Siangh

Phuluum phulnang a petlet leikha :: LEITUNG THUMNA panin LEITUNG KHATNA tun ding ollo hi. Zomite sungah mitkeuh khuamu thei masa Pasian naseem tuucing icihte ahi hi. A taltang tawh phu-in gamdang paimasa amaute mah ahi hi. Phuluum phul nang leikha’n petlet acih bangin a petlet masate ahi hi. Apha a bawlzolo a om hangin a tamzaw in, amau pawlpi bek thamlo-in Zomi bup hamphatna ahi, Pilna-Saang lianpipi hong uh hi.

Tuazah nangawn pawlkhatte in ahoihlam leh azaizaw-in enlo-in “tuute taisan, lonona zuan,” ci-in zahpih uh hi. Tua ngaihsutna pen muhnatoi cilel ni. Mimal in aphuut masak lohin mipi in khuavak muzo lo hi.

USA katun cilin hong it mimuanhuai pawlkhat in lai hong khak uh hi. “Hong ciah in, i gamah Pasian nasep ding tam hi,Jesu hong kumta ding hi” ci-in hong taibawl piansim nong uh hi. A sawtlo-in tua mite mah in, ” katate sangkah nang sum, biakinn lam nang sum, crusade bawl nang sum” ci-in huhna hong ngen uh hi.

Pasian upluatman leh gam leh minam itluat manin gampua pailo ding, cihmawk pen hong toilua deuh sam hi. A kiseeklo siikpeek tawh sing i phuk sangin heihiam mahmah tawh phuk leng nopzaw hi. Hei tangkhat tawh i phuk sangin singphukna set zang leng nopzaw hi. Pasian nasep zong sum omlo-in kiseem theilona mun om hi. Pilna tawh a seemte in zaitakin naseemzo uh hi. Leitung aading i seem zongin pilna kisam hi. Lungdamnathu nasepna ding pilna kisam hi. Sum leh pai zonna dingin pilna kisam hi. Ih minambup pilna khuavak hong musak masa Biakna Siate pahtawi siam phot ni.

Muvanlai kha tawh

Gamdang puapial zote talzol zaw itheih ciangin Zomi khekhaizo khempeuh kipanin phutzawhna zuanin atultulin kipaikhia hi. Ih phawk vanglak ciangin khaktan zawhin omlo leuleu hi. Zogamah mi omlo zah hiphial ta hi. Ih gam ih leitang tungah genthei lua ihihmanin Pasian in hong nusia lo hi. Hong keem ding leitung kumpi thuneite hong sawl hi. Democracy gam Humanright omna mun hong zuatpih hi. Tua pen eitha leh ei pilna hilo hi. Pasian in Muvanlaikha tawh hong lenpih ahi hi. Ih tunna gamte pen leitungah gamnuam gamhau penpente ahi hi. Canaangam luah ihi hi.

Mapan bangci lak ding

Deihteel theihnamun kitung hi. Bang teel ding ihiam? Bangtawh kipan ding ihiam? Ei Zomite pen Society kiciantak zong kineizo lo hi. A tuamtuamin ektak bangin kitakkawikawi hi. Lawngkhatin ki-awnglo-in mipum omzahzah eimun ciatah ki-awng hi. Hi khempeuh pen Pilna-khuamuhna tawphah tawmluatman ahi hi. Ih tawphah background neilo lua ihihmanin, Europe Phd khat leh Zomi Phd khat ciatciat phylosophy kikhailua kikim cih om theilo hi.

Zomite i taangsap lianpen PILNA ahi hi.

Kawlkumpi in hentonsa-in hong koih hi. Tu-in leitung gamlian gamhau pen munah Topa in hong kha hi. Ih sepnop khempeuh teeltheih ahi hi. Mikhempeuh aading kongpi honsa-in kikoih hi. Khangno hun neilai khempeuh in, PILNA mah hong phultaitai le ucin kadeih hi. Gam leh Minam domna dingin a kisamlo omlo ahizongin, Politic mipil gam makai nuamte in, Law Science kisam hi. Tua bang tampi ih om keileh, i kipawlna khatpeuh, politicalmovement khatpeuh khauhpai ngeilo ding hi. Buhkung bangbek hiding hi.

Ka omna khua pen Columbia, MO sung ahi hi. Khuaneu kici a, ahizongin Mandalay cia pha lahlo hi. Domestic Airport pen Yangon sangin lianzaw hoihzaw pek hi. Nikhat motor accident in zum katung hi. Lai-at khat in, Attorney nadeih hiam, ci’n hong dong hi. Attorey-Lawzers bebek -500 om nadeih tel in hong ci hi. Kawlgam lungtang puak tawh, thukhat kadong hi. ” Attorney hizah nasep ding om hiam? kacih ciangin, ” Private Business mihau ngentang hi” hong ci hi. Lokho om, Construction Company nei om, sa-licence nei om, attorney nasep pen sidejob khat nahi bek mawk hi. American te a pilmah ding hi e maw! cih simloh.

Laibu khat hong lotziau a, ka-et ciangin Attorney address bebek, amau line ciattawh na-om menman hi.

• Attorney – Accidents
• Attorney – Bankruptcy
• Attorney – Collection
• Attorney – Computer law
• Attorney – Criminal law
• Attorney – Divorce Attorney, DWI, DUI, OWI.
• Attorney – Elder Law
• Attorney – Employment (Discrimination, Estate, Planning & Administration, HealthCare & Hospital law, Inviromental law, Insurance law)
• Attorney – Immigration & Naturalization
• Attorney – Railroad
• Attorney – Real Estate
• Attorney – Social
• Attorney – Taxation
• Attorney – Trial Practice
• Attorney – Veterans
• Attorney – Workers
• Attorney – Wrongful Death

Department khatah lawyers bebek asawm tampi a na-om ahi hi. “USA IS THE LAND OF LAW ” kici leitung in abatzawh ding dinmun hinawnlo hi. Ei Zomi te zong Laws mipil tampi kisam hi. ” Tua mite sepkhop ding omhiam,” ci-a kadot pen kahai luat lamtak hong kidawk lua banah ih kawlgambup dinmun hong kilanglua ahihmanin kazum peuhmah hi. Khangno gam leh minam a khual na om uleh UPADI lam hanciam un. Nainganzi mipil ki-omlo hi. Thang Siangh