Hong ki lamen den ~ Tdkhen

Hong ki lamen den ~ Tdkhen

1. Van zuak ding a deih mi in:
(1) Lai tawm thei in kamsiam peuhleh ci.
(2) Maitai in deidan neilo hileh ci.
(3) Thuman, diktat, sawl mang hileh ci.
(4) Lungduai, citak, thukhual thei mi hileh ci.
(5) A ma’ a’bangin ngaihsunin, van kem thei mi hileh ci.

2. Kumpite in mipi tungah:

(1) Mikim in lai thei kimleh ci.

(2) A tawm pen tan 10 beek ki ongleh ci.

(3) Mikim in kumpi ciaptehna ID nei kimleh ci.

(4) Mimal, innkuan, khua, gam khangto-leh ci.

(5) Leitung in a muh nailoh a musak thei hong piangleh ci.

3. Mipite in vaihawmte’ tungah:

(1) Mimal a it zo ngiat vaihawm deih hang ci.

(2) Meingong, tagah, gual banlote a mu kim thei vaihawm deih hang ci.

(3) Mi kitawng, mi kilemlo, gual banlote a hun lapin hong phawk thei vaihawm deih hang ci.

(4) Ih phawk manloh, i theih batloh thupha a omte hong val saklo vaihawm deih hang ci.

(5) Mundang, gamdang, makai dangte lakah ei’ makaite mah hong kilang gawpleh ut hang ci.

4. Nute pate in tate’ tungah:

(1) Hong pil, hong siamleh ut si hang ci.

(2) Lawmhoih gualhoih bek tawh kikhawlleh ut si hang ci.

(3) Thadah, zulhzau, simtat lo-in cihtakna hong neileh ut si hang ci.

(4) Thu ginalo, thusia lasia te tawh hong kipelhleh ut si hang ci.

(5) Ih si zongin Vangam-ah bel kimu teitei leng ut si hang ci.

5. Tate in nute pate’ tungah:

(1) Amau’ neulai hun bekbek tawh hong tehteh liang uh-a ci.

(2) Ih hanciam’ sim giugiau khat, hong cih kikkik uh ciangin i tha neem ci.

(3) Ih khialhna khat hong tai-in hong ko’ gawp uh ciangin, i lungsim neu ci.

(4) Eizong a hanciam nuam mahmah kimlai, hawmthawhna bekbek a om ciangin, i tha hong dah sak ci.

(5) Hong kimuanloh sangin, hong kimuang lelleh i muanhuai tuak zaw ci.

6. Ih veengte tawh:

(1) Na hong kikawmte hong ki pia kik pahpahleh ut si hang ci.

(2) Ih vokno, i akno tai khat tawh hong ki hamsiat pahpah liang-a ci.

(3) Ih zawn, i ngau, i tagah teng mah i veengte in hong buaipih den, kisuan huai lua ci.

(4) Mundang, veengdanga kisuan’ ding zong, i veengte mahtak ngai hang ci.

(5) Innngak ginalo khat i zat sangin, i veengte i vaikhak hoh i lung nuam zaw lai ci.

7. U leh naute in:

(1) Ih kihuh, i kipanpihna teng zongsang thapai liang-a ci.

(2) Hong huh, hong panpih tengmah hong thanem sakin pang zel ci.

(3) Kihuhna pawlkhat thaman ma piak zong hithei ci.

(4) Hong kihuhnate a kilawm hunin lungdam ko zo kei kha leng maw ci.

(5) Kihuh kipanpih cihte pen khangkhat sungin zong kilumlet kawikawi thei lel ci.

8. Tangval in nungak:

(1) Hong ngai takpi ahi tam, a kamsiamna lel ahi tam, kei bek mah hong ngai tam, kei’ a’ding ahih leh ahih loh, ama’ tung panin kitheihna khat deih mah si’ng!

(2) Ka ngaihna banghang’ hipen-a, ama’ hong ngaihna zong banghang’ hipen-a, ka innkuan-un ma ka pangkhawm thei-ta-um!

(3) Ngaihna pen leengla-vai’ sa ing; itna pen innteek-vai’ sa ing; itna maw, ngaihna, hunkhat sung hu-ngaih dih ning!

(4) Ka lawm ngaih pen ka innkuan phu’ungah ciang leng a kilem ding hiam? Guah hong zu-leh a cim lel ding hiam?

(5) Lawm neihna leh mo neihna i cihte pen, a omsa innkuan behlapna hi a, taihinn lamba’ng zopthuah leh phung cianthuahte tawh kibanga, a kimat theih nadingin a omsate zong nawt-he’ek leh tawh-he’ek a kulna ciang a om hi.

9. Nungak in tangval:

(1) Hong ngai takpi mah ahi tam, kamsiamna lel ahi tam, kei lo ngaih dang a nei tam, kei’ a’ding mah ahi tam, ama’ tung panin theihna khat deih si’ng!

(2) Ka nu, ka pa nusia liangin a belhtak mah tam, ka kisik kha tam, thei khol nuam si’ng!

(3) Ka nungakna, ka namtuina, ka siangthona, ka ngaihbaannate, sing dang’ leel’-na a tang kha tam, ka khan kumkhua duang hong zuun ding, ngalliampa bek siah nuam sing!

(4) Kingaihnate zingmeii-lum bang, kiho-nate huihkhi’ sem’ bang, tak sinthu aw, laikuai itna, na mel ham bang hong haih kha-leng, siingdang kal-ah kei’ a’n ngo bang hong lang sese aw!

(5) Melhoih melsia phamawh kei, kisikna a om’leh kei kisik lo ding, kei’ hang’ a kisik om zaw ding, a nu a pa in hong deih ding maw, ka nu ka pa in hong awi ding maw, hih in hong siampa aw, kong hu-ngaihna hita hen!

10. Pasian in eite’ tungah:

(1) Kei’ a’dinga ka bawl mihingte in hong theihloh uh ciangin nasa ing ci.

(2) Ta bangin ke’n ngaihsun den napi hong kitheihmawh bawl uh ciangin nasa ing ci.

(3) Amaute’ kiangah ka Tapa ka hawh sak pen a thusim’loh mah uh nasa pen ing ci.

(4) A khawnkhonga letsong ka piak, hong awlmawh sak loh uh ciangin nasa ing ci.

(5) Ka ngaih mahmah laitaka hong phawk nuamlote, amau zong ngaih hunkhat hong neih uh ciangin na kithei uh hen ci. Paunak 1: 24-26