ZYA News: ZYA DVD kihawm khiata & thutuamtuam

ZYA News (September 01): ZYA DVD kihawm khiata & atuamtuam

ZYA DVD KIHAWM KHIA TA : ZYA in cimawh dongtuakte huh zawh nading lunggulhna tawh i bawl ZYA Series Vol-II pen tu in muntuam gamtuam ah kihawm khia ta a, USA leh Australia gamsungte pen ZYA panin Committee te paisawm ngiat i hih manin kihawm nailo hi. Tua lo tengah kihawmhawm ta ahih manin Zomi a kua mapeuh in tha i piak ciat nading leh Youtube leh Copy bawl loh dingin kithum hi hang. Original DVD ong leisak khempeuh ZYA nasepna ah lamkhat panin mapang khawm i hi a, Copy peuh tawmnono tawh a leite pen ZYA nasepna alangpang leh anawngkai sakte thapia i hih lam kiphawksak hi hang. ZYA DVD Disc tungah Originalte ZYA ki-at ngiat ding ahih manin nalei veve Original mah leizaw mai-in ci-in deihsakna tawh i kiphawk sak hi.

ZYA ZUM INN MABAN : ZYA Zum inn mabante Pasian hehpihna leh Zomite piakkhiatna tawh tu in 80% bang a kizo ding hita ahih manin maban omlaite i zawh siangna dingin mimal, kipawlna, pawlpite hanciam khawm lai dinghi hang ci-in i kithum nuam phapha hi. Zum inn lamna dingin kamciam a pia nailo a kua mapeuh in zong ahun lap in nongpiak kim ciatna dingun kong zasak uh hi. Mimal leh pawlpi, kipawlnate a tuamin lunglutna i neih leh anuai avante kisam mahmah hi. A mangngei nawnlo ding kihelna mualsung khat suak ding ahih manin a kuamapeuh hanciam a kihel dingin i kizawn hi.

• 1. Step Up (20 kv) meitha hatsakna Ks. 1170000/-
• 2. Air con a kitung no. 3te Ks. 580000/- man 3 kisam.
• 3. Kawtut phah (100) kim khat ciang Ks. 8000/-
• 4. Tuisiang votsakna (Water Cooler) Ks. 150000/-
• 5. Nakoih votna (Freeze, a&cJowåm) Ks. 450000/-

ZYA NEWS TAT MAN ZAKSAK NA : ZYA pan kihawl Kalsim thu kizakna ahi ZYA Weekly News tatman Ks. 2000/- te October kha bei ma in Agentte tungah na piaciat un la, Agentte in ahun lap in ZYA Zum ah nongpuak kimciat nadingun i kizasak hi.

TAN 10 LAIVUAN DINGTE ZAKSAKNA : 2018 kum a Tan 10 laivuan dingte peuhmah in laivuan theihna ding form leh a kisam tuamtuamte Sep 1-19, 2017 sungin Form khat Ks. 700/- tawh kilei thei dinga, na laivuan ding Subject tawh kisai-in a mel atuam tek hi ding a, na form sung a na-at bang hi pah ding ahih manin form tungah na-at khialh leh kikhel thei nawnlo banah a hunlap in na formte atun kei leh zong laivuan na khan (Room) sungah tu sak lo laivuan theilo ding ci-in pilsinna zum pan Aug 25, 2017 ni–in thusuah bawl uh hi.

MANYATANAPONG AIR LINE : Kawlgam sung a kizang Mandalay khuapi bulphuh Manyatanapong Airline pen International Airline kipawlna (IATA) in Airline hoih Airline muanhuai kici (IOSA) panin letmat Aug 22, 2017 ni-in ngah uh hi. Kawlgam sung a leng vanleng khempeuh lak ah a muanhuai vanleng tawh khualzinna IOSA theihpihna letmat angah masa pen hi a, hih angahna dingun kum 2 sung bang hunla in hanciam uh ci hi.

POPE FRANCIS KAWLGAM HAWH DING : Pope Francis Kawlgam ahNov 27-30, 2017 sungteng Yangon, Nyipyitaw khuapite pha in Kumpi u lian, biakna makaipite leh khangnote tawh kimuh khopna nei dingin gelna nei hi. Kawlgam panin Bangaladesh, Dhaka khuapi ah Nov 30-Dec 2, 2017 sung hawh ding ci uh hi. Pope Francis pen Dec 17, 1936 kumin suak a, Mar 13, 2013 ni-in a 266 na Pope dingin tel nangah ahi hi. Kawlgam hong hawhna hangin Kawlgam sungah kilemna daihna, ki-itna, kipumkhatnate om dingin lametna kinei hi.

SEN KUMPI-IN HONG HUH : Kawlgam ah natna lauhuai H1 N1 natna tawh kisai, kidalna zatui leh hih natna tawh kisai vanzat tuamtuam America $ Awn3.7 valman huhna vanlengpi tawh hongpuakin Aug 24, 2017 ni-in Yangon International vanlengtual hong tungin Kumpi lampan Vuanzi Professor Dr. Thet Khine Win le Sen Kumpi, Kawlgam palai Mr. Hong Liante in thukimna suaikai-in huhnate piakkhiatna sannanei hi.

AYARWADY GUN TUI KHANG KIK : Ayawady gunpi khang kik ahih manin Pagu Region, Pantaung Township sunga om Kumpi sang 12te Aug 24, 2017 ni panin kikhak leuleu a, nipi ni sang khak hunte tang tawi-in kisinsak dinghi ci-in Township pilsinna zum panin zaksakna bawl uh hi.

MIGILO PAWLIN PULAK KHIATNA : Rakhine State sung ateng palite omna khawng a vabuluh a, palikte leh mipi Kumpi nasemte athat sim den Bangali pawl khat pen Kawl Kumpi-in migilo pawl (tMurf;zuftkyfpk) in ciapteh na leh pulak khiatna Aug 25, 2017 ni-in nei uh a, tua ni a kipanin galkap, palikte in a kul leh a kisam bangin thauvui thautang tawh do theita banah do takpi pah uh hi. Aug 25, 2017 ni-in hih Bangali migilote in palik phual munnnih thakhat thu in luhuh a, palik 8 leh Immigration asem thantlang mi khat tawh gawm mi 9 that lum uh hi.

SAMSUNG MAKAIPI KIMAN : S. Korea gam bulphuh SamsungCompany makaipi lah hi millionaire lah ahi Yi Wai Lee pen sumgolh nekna leh sum zat khialhna hangin thukhen zumpi panin kum 5 thongkia dingin thukhenna pia uh hi. S. Korea Kumpi lui hi Park Guy Hye tawh zong kipaikai kha uh ahih manin kum 12 kiatsak ding lunggulh uh hi mah leh Lee sitnipa in bel suaktazo kik ding lamen ing ci hi. Samsung Company makai 4 zong thukhenna thuakin 2te kum 4 takhia uha, adangnihte nasep khawlsak hi.

THAI PM LUI YING LUCK SHINAWATRA TAI : Thai Prime Minister (PM) lui ahi Ying Luck pen Kumpi neihsa sumte zangkhial hi ci-in mawhsak uh a, a Kumpi panin tawpsak banah tu in Thai thukhen zum lianpen panin thukhenin thongkhum dingin angaihsut kawmkal un, Dubai gamah galtai (gambel) in om cih thuthang kiza hi. Kumpi lui Tek Sen zong Kumpi pan kitawpsak in matsawm uh a, Dubai mah ah gambel in galtai a a unau un Dubai ah om uh hi.

AMERICA AH HARVEY HUIHPI : America gam Hongston State, Texas State sungah huihpi (Haricane Harvey) nunna hangin mun 80 val ah tuidong tuahna nasiatak in tuakin Helicopter 19 tawh cimawhte honkhia uh a, mi 100 val honkhia zo uh hi. Hih huihpi nawkna munteng ah Kumpi Donald Trump leh Pencete zong vahawh dingci uh hi.

BENEZUELA GAM THU : Benezuela gamah Kumpi asem Nicolas Maduro pen U Ne Win dan pian in Kumpi asep suak theih nading hanciam denin, agam uh buai den,mipite nek leh dawn haksa in gen thei mahmah uh ahih manin America Kumpi in Kumpi Maduro nasep leh agelnate akhawl kei leh a vui atang tawh kasual dinghi ci-in pulak nanei a, Kumpi Maduro zongthang pai-in agam sung a om galkap kici namteng gawmkhawmin galkap 700000 khawngin agam uah galkap kisinna khat nasiatak in bawl uh a, America Kumpi-in sum zonpai zonna lamah khaktan na thak khat bawlin suaikai san ziau hi.

VAN KIMU : Pinlong 26/2 Kalaymyo ateng Labai Thian Co.ltd i Shyan 125 Motor Cycle Owner book le Diswai kimu ahih manin anei atheite nahilh sawnin ZYA Zumah honglak nadingin kong zasak uh hi.

Related: Zomi omna peuhah ZYA omding ~ Rev. Thang Van Lian

CIMPHAWNG LUNGNGAIHNA
Dotna : Zomi Christian Pawlpite ah Biakinnpi, Hallpi a kilam simin buaina om zeuhzeuh pen bang hang hi dingin na upmawh a!

Dawnna : Pawlpi sung makaite atamzaw pilna bulphuh in kitel hi lo a, biakna mi, Pasian zahtak mite kitel hi zaw hi. Tua hi na pi-in Biak innpi, Hallpi pi i lam ciangin Engineerte peuh uk zaw sop i hih man ahi tam maw! Tua Engineer uk makaite pen inn gen loh vokbuk, keelbuk nangawng kician tak a, alam ngei nailote na hi zaw banah Engineerte dongin, kikuppih tangtang in a tawpna-ah theihna sinna neilo, sumtawm lak zawte peuh lamsak gawpgawp i hih manin buaina om zeuhzeuh hidingin um ing.