UK Referendum ni khat bek kisamlai – UK Zosuan te mailam ding

UK Referendum ni khat bek kisamlai – UK Zosuan te mailam ding

Zosuan pawlkhat te lenna UK gamte’ EU tawh kipawllai (Remain) leh paikhia (BREXIT) dingvai mipi deihna (vote) piak ding pen, nikhat bek kisam laita hi.

Tuni cianciang Remain leh BREXIT mipi a langtuak bang hi aa, kuan zo ding cih et leh ngak bek in om hi. Khankhatsung aitang khatvei thukhensatna pen khangtampi mah kimang kinawkkha ding a hih man-in, mite’ lungsimla lua kisa, UK gammi te bek hilo, a khangtosa gampi te nangawn linglawng sakzo ta a hihi. UK paikhia mawk leh a dang gamlian pawlkhat inzong nungzuih noptuak mai a hi hi.

A beisa kumtampi mah UK leh EU, vanlei/zuakna bek hilo, ki-ukna lam ah zong kalsuan khawmkhin hi napi’ UK in bang sawm mawk uh hiam? Tawmkhat en kik pak leeng.

A cil in, vanlei/zuakna baih leh nuamtuam ding in kipawl khawm hi-aa, tua kipawlna hang inzong gam khat leh khat kigal neihna tawmtuam ding lunggulhna zong a hihi.

Galpi nihna khit 1950 in European gampi 6 in EEC cih min tawh a kipawlna uh hi na pi’ hun te hong paitoto in, tu-in gam 28 bang phata hi. Van lei/zuak bek hilo, gam ki-uknalam zong khauh semsem a hih man-in, gamkhat ciat, a diakdiak in UK, ii Innkuansung thukhun sang’ EU thukhun in thu hong neizaw ta hi. Pawl khatte bang’ EU federal states a piankhak ding’ lauthawng liangta uh hi.

EU gammi te visa kisam lo zin ziauziau theibek hilo, Innteekgam thukhun palsat leh migilo kimante’ na ngawn hong paina-kipatnagam uh-ah kipuak kik pakthei nawnlo hi. Tua ban ah, UK te’ EU pawlsum piakzong £millions zasim bang hong hi aa, a ngah kikna tawh etkaak hak mahmah ta hi. A tom in, UK gam aa ding’ meetna tamlua nawnlo (ki kaih nawn phalo) kisa hi.

Kipawllaiding a hoihna tampi mah a omzong’ a hoihlohna zong mipi patausak zahdong in om cih’ ki mutheita himawk hi.

A kipawlnuamlai te genna pan ci leeng, EU sung ah om leh UK pen bitzaw leh muanhuai, belhtaak zaw ding cih hi aa, a paikhia nuamte’n genzawhloh in a hang’ haumahmah uh hi. Tualak pan, Immigration (Gentehna.. London bang ah gamdangmi a tawmzaw phial hita kici) leh sumzatna nak gen mahmah uh hi. Gamdang mi tampi hong tunbeh leh Zato leh Sang-inn kicing nawnlo ding aa, nuntaak ki-et, kihuai, khuasakna haksa tuam ding cih hi mai hi. Gamdang mite aa ding’ mainopmawh huai simtham tawh kibang a hihi.

UK aa om Zomi te mailam ding UK referendum a thupit mahbang in, Kawlgam/ Vaigam Zomi mailam ding zong 21st Century Panglong conference thupi mahmah khading hi. 1947 (20th Century) Panglong a gah bangci khum/kha cih gen a kulnawn kei hi. UK Zomi te’n a mailam ding uh lunggulh-piakna (vote) tawh kalsuan ding uh aa, Kawlgam Zomite’n Kawlgam ah bangciang thusungthei, ngaihsutna piathei, gamtangthei ding cih lungngaihhuai lai hi.

A dang tampi lakpan Zogam mailam Zomi te khutsung ah a om masak photloh in, gam leh minam deihbang in, kikem kihuai taktak zolo ding hi. Tu aa bang in, Kawlgam khangto suak mahleh zong, mundang pan sumhau teng in, I innmun logam teng hong leimang ding uh aa, I pupa gam teekteek ah SAL I tan ding ngaihsut leh kidal huai hi. Ngeimah ngei in, I lii-sung bek mah ah I haam kuakkuak denlai aa, khattang angsunglam bek I khuatkhuat lai leh hong kituancil veve ding hi.

Tua hun a tun loh na ding in, khuamin peuh, awkaih peuh, upna biakna leh kipawlna min tawh buai masakhuai nawnlo in, mapang khop ding a hi hi. Ki pilmawhbawl, kituam ngaihsut, ki midang ngaihsutse kei ni. Kuamah dang hi kei’ nang leh kei aa kipan I tu I ta te aa ding mah hi.

It really is about time to “Look at the bigger Picture” – Revd. Dr Do Kham.

Ankamtang cia upna’ I neih leh mualpite nangawn a khinzo ding in hong kamciampa’ I up, I muan aa, I nget takpi leh ki ngahlo ding hiam? Nangtal’suan