Florida State University ah thaukapna piangleuleu, mi 2 si

US gamsung sanginn huangsung ah thau kikapna thuthang kiza leuleu hi. Florida State University ii Library sungah thautawi khatin mi phialkap a, mi 2 sipah cih Fox News pan kiza hi. Thautawipa zong Campus Police te’n lehkapkik uh a, amahzong sipah cihi.

Tuni Thursday ni thupiang hi a, thauging 4 veibang kiza hi ci’n Campus sung aom te’n gen uhhi. Tua Campus huangsung ahzong Police mi 30 bang tungpah uh a, buai khengkhang uhhi.

Florida State’s Vice President of Student Affairs panmunlen ahi Mary Coburn ii genkhiatna ah thautawipa pen University Police te’n kaplumkhin uhhi ci’n asihlam gencianna nei hi. Ahi zongin amin apuam pen mipi tungah tangko khianailo uhhi.

Tallahassee Memorial HealthCare pan Nursing Supervisor inzong amau kiangah aliam mi 2 hongkipuak cihi. Tuate zong amin apuam genkhiatding phalna omnailo cihi.

US gamsung aom High School leh University te ah hihbang in thautawh ki phialkap gawpna pen omtawntung gige mawk hi. ZD Sawltak