Zopuan leh Khangno

Zopuan leh Khangno

Zopuan silhdan ding, a khui dan ding cih ngeina omlo ahih manin
Khangthak ten khua hunzui in hong silhsilh uhhi. A ki laihlo bel a
Ngatdan ki laihlo hi. Zokhi khibeh bang bel a Nik dawn uh ah kaisak in
apai uhteh ging sengseng lai hi. A taktak in Khi ahih manin Ngawng ah
awk’ ding ahihi. Tu-in May 2015 in Japan ah Zomi Numei khat in Puanza
laisan Nik in hong teeng hi. Khangthak ten tua cih zatding cih tello
ding ahih manin a azangh Zolia in Zomi ihihna a thansaknop manin a
zangh hi aa, hong mindaisak hi-in ka um kei hi. A theihloh mawhna bel
maisak huai aa, maisak nuam kei leng zong kua in vaisai tuam deuh ding
cihzong ngaihsut huaizel hi. Ama kiangah vapai-in a zuakna vapholh
khia in zatdan ding hilh cianna neihleng Khangthak ten Zongeina puante
a thupit zia telzo pan ding uhhi.

Puanza laisan pen ni dangin Mi si khat om leh ki keng sak in tua
khawng bek ah ki mu kha lai hi. Ahangin Zomi Nam Ni cihte ki zangh
khollo, Zomite ngeina puan silh hun ding tam khollo in Sihna khawng
bek ah ki mu kha lai hi. Gam ki uk zia hong ki khel in Khangthakte
sungah hong ki zel henhan in Zopuan silhnopna hong om zaw deuh hi. Ni
dang lai ate danin Zopuan ki silh nuam nawnlo in a ki khuidan
atuamtuam aomteh tuate bek ki silhnuam zawlai hi.

Khangthakte sungah silhnopna hong om semsem nangin vaihawm huai hi. A
zatdan zong a siam nangun hilhcian huai hi. Zopuan Tangcin zong
nidangin mi khempeuh in silhlo hi. Tu hunteh a thu tawh ki silh nawnlo
Ngeina puan khat cih ciang bek tawh ki thei-in ki silh hi. Hun hong
paitoto lai dinga Pasalte Coach puan bek hilo a Pheituam na lengin
hong om lai ding hi. Coach kici pen Mikangte tung panin aki la hi aa,
puantual pen Zomite tung panin a ki la hizel hi. Zopuan pen khanglui
lai-in tu-a ih silh ngeingai danin ki silhlo hi.

Khangno ten silhnopna hong nei keileh i minam puan a silh ding ki zom
om nawnlo ding hi. Zopuan in Thupha ngahlo hi ding hiam ka cihcih hun
om hi. Ahangin namdangten hong silhsak hetlo ban ah Ni thupi na lengah
zong a silh nuamlo Zomi omlai hihang. Mi nam dangte puan bang i silh
ngeingei lai hi. Mai lam ah Zopuan pen Pheituam a sau a tom a sungten
dongin hong thang kha thei lai hi. Lupna kong khak dalna peuh in ki
zangh lai dinga, inn neihten khesikna welcome khawngin hong zangh thei
lai ding uhhi. USA te lan( Flag) danin utut na ah ki zangh lel ding
hi. A ki zatloh ding i deihleh kua-in Zopuan Zongeina tawh ki sai
vaisai ding cih thupi kha ding hi. Tua hilo in tangko ciang tawh
khangnote khaktan zawh ding hi nawnlo hi. Zopuan tawh sum zonna in
aneihten summuhna ciang bek tawh hong zuak khia ziahziah ding uh hilel
hi. Tu-a Puanza laisan Niik in hong ten ciang uh hong khol kei uhleh a
tuamtuam in ki zangh zak ding hi. A zanghten minam mindaisak nopna
zong hilo mai thei ahih manin Zopuan Zongeina vaisai aom ding thupi
kha ding hi. Lungdam.

Thawn Tuang
June 2,2015
Nashville TN USA
www.zomi-angvaan.blogspot.com