A zahtakhuai mi le panmun ~ Lian Tuang
Gam le minam itna veina linlian tawh leitung gam tuamtuam panin upa makai muan le suan pawlkhat kawlpi biakinn khat ah kikai khawm hi.
Christian kum 100 pawi khit a tangzai pen kimuh khopna ahi hi. A zahtakhuai mipil misiam mi thupi vive ahi hi.
Tua hun sungah ZYA le Siamsinte in zong thuk takin ma kipang hi. Mapanna tampi lakah cycle stand (mawtaw le cycle cing ding) zong kihel hi.
Hun kipat ding ciangin mipite mawtaw le cycle tawh ong kitung ziahziah hi. Cycle stand makaipipa in biakinntual laizangah ding pah in cycle le mawtaw tampi a kitat theihna dingin lampi hilhin a vei a takah khua-ul kai ziahziah hi. Khat veivei amah mahmah in cycle te lem phapha hi. Ittuam zahtak tuam nei se loin cycle le mawtaw hawlte gamtatzia dinga gen ziahziah hi.
Makai vaihawmte gel sak a puan (uniform) silh in kuama tun ma in tung masa hi. Cycle stand a naseppih lawm le gualte ciamnuih peuh bawlpih in nui sak zaizai a, thalawp sak mahmah hi. Cycle stand ban ah laibu le VCD zuakna a kipan tavuan kipia teng lawp takin sem kawm lai hi. Mikhempeuh a ciah khit ciangin ciah pan hi.
Ni nih ni thum khit ciangin a nasep dan a a gamtatzia thupi sa lua mahmah ka hih manin cycle ngak nasep (stand) pen nang nasep ciang a thupi le a nopci mahmah nasep khat ong suak mawk ei, nang bel thupi ong sa taktak ing ka cih leh kei bel meeting kah dingin ong kiseh loin nasem dinga ong kiseh aih cianga, ong kisawlna bangbang lungkimhuai takin a zo sinsen nuam ka hi hi. Ka nasep hoih takin zo kei leng mipite lungsim nawngkai mahmah ding hi. Kei thanemna le ka panmun hangin kuamah buaisak lo ding cih pen ka dihpih thu ahi hi ong cih beh lai hi.
Ama gamtatzia le kammalte ka zak ciangin mi thupi le panmun thupi taktak I cih pen thuneihna, min le za te hi masa loin mimal hihna le ngaihsutzia tungah kinga zaw ahihna ka phawk thak a, kei le kei tha ka ngah mahmah hi.
Tua khawmpi pen GZA khawmpi masa pen hi a, Dr Do Kham le I siapite in ong makaih hi. AMC (Agape, Kawlpi ) hi a, 2011 kum November kha hi hi.
A gamtatna tawh mi thupi le panmun thupi taktakte a hong lakkhia cycle stand makaipi pa pen U Khupboih (ZYA) ahi hi. Japan menta pa zong kici hi. Lian Tuang
Comment piaknop aomleh...