Zomi Kumpi Uliante Nasepna – 1 (2015)
1. SIA KHAI DEIH TUANG (Khin Mg Than – Khualui Kapteel)
– Sagaing MP (Kalay No. 2 MP)
– Sagaing Sipin Secretary
– USDP Central member
Mipi Aa Ding anasepte
1) May kha sungin Pa Vung Cin Khup (Phaiza) Innkuan Sapitwine azuak Palikte in matsakin teng 7 ngen a, Sia Khai Deih Tuang in laksak kikin sum zong pia khalo hi ciin news ah kisuah hi.
2) Kawlpi ah Licence neilo mawtawte 2013 kum panin akimat ngeingai ciangin mi 25te kha 6 thong khiatloh dingin Sagaing CM tung ah gensakin kha 1 kikhia a nipi kal 2 bek thong ah omin suakta uhi. Anunglam ciangin mawtaw 8 kiman leuleu a, thong kialo-in sum liau tawh vaivengsak hi. Tuhun a kimante zong gensak hi cih thu kiza hi.
3) Kalay gamsung Tan 4 Sang – Zomite khua Pidawtha, Sawbua, SingUnau, Singzung leh amah Sang Board Chairman asepna Than Tuiphum biakinn gei No. 14 Tan 4 Sang ahi zongin Cia-In. Haikhawl, Tanphu, Taungtha Tan 4 Sangte Tan 8 Sang ngahna dingin May khabei kuanin USDP gambup khawmpi ah USDP Central member ( ဗဟိုေကာ္မီတီဝင္) hihna tawh avapai kawmin hih sangte Tan 8 Sang ngah theihna dingin vaihawm lak ah kihel a, June 1 niin order om ta hi cih thu kiza hi. No.2 SMS -Tahan leh Kyaw ywa ah tan 10 Sang kipia a, asawtloon Sakhangyi SMS sang zong Tan 10 Sang ngah lai ding hi cih ama tung panin kiza hi. Sagaing Sipin Secy ahihna tawh kizuiin Kalay khuasung leh gamsung mawtaw lam budget ngahna dingin zong kihel hi.
2. SIA KHAM LIAN KHAI
– Kalay Sipin Chairman & Kalay City Mayor
– Pinlong vengpilui Hausalui
Anasepna pawlkhat –
1) Kawlpi khuasung Zomite tenna kongzing lampite Coaltal lampi tampi bawl hi. Kalay khuasung Tedim Road pen pi 100 lampi dingin kek khin a လမ္းဆုံ pan tai 9 dong bawl hi. Tun zong Gunkhawm mawtaw gatelui Pinlong Lamadaw lamlianpi pen pi 100 lampi dingin tulaitak sem a lampi tanzau heha-in khuapi suahtuam hi. Singkung lianpute kiphuk a pammaih mahmah hi.
2) Santa hanlui ah No.4 Tan 10 Sang ngahna ding nasia takin phu hi. Ngah khin – inn lamkhin – sang kah thei ta hi. Tukum tanlan – tan 10 hongkim zo nailo hi. Kalay Bus station zong athak kilamin khuapi suahsak hi. Mawtawneu gate gei ah Govt. Nursing School kilam hi.
* * Sagaing Zomi Ulian 2 ( Sia Khai Deih Tuang – gambup level leh Sia Kham Lian Khai -Myone level) ineihte in Zomite hong van mahmah hi. Chin ulian ineih Sia No Than Kap – Chin Afdairs Minister (Sagaing Chin Mangpi) om a asep tampi om phial taleh Zomite genloh akuangluipih Sia Zam Khen Thang (Kalay – Mal Suangzang) leh Sia Kham En Do (Tamu – Tungtuang) in mukha phalo hileh kilawm hi.
Note:
Ahun zuiin Zomi kumpi/ biakna/ hauhna leh adang a ulian makaite thu theih khomkhom hong kisuah zel ding hi. Agelhbeh nuamte zong serial nambat zuiin kigelh kigawm thei a nidang ciangin uliante nasepnate ciaptehna tangthu bu khat ibawl ding hi. Asiklo om theite kikolo zaqin kihilh or behlap ni. Lungdam.
Sia Lang Khai (Zomi Times)
Comment piaknop aomleh...